Bamurangirwa agiye gusohora ibitabo bibiri birimo igikebura abanyafurika abategereje amakiriro mu mahanga

Yanditswe na Ferdinand Maniraguha, Joy Monique Dukuze Umutesi
Kuya 3 Mutarama 2020 saa 04:22
Yasuwe :
0 0

Bamurangirwa Patricia, Umunyarwandakazi uba mu mahanga, agiye gusohora ibitabo bibiri birimo icyo yise “Africanism” gikangurira urubyiruko gukunda Afurika no kwigirira icyizere.

Bamurangirwa w’imyaka 69, amaze kwandika ibitabo bitanu. Bibiri ateganya gusohora birimo icyo yise “Africanism” na “New Rwanda From Hell to Heaven” akazabimurika ku itariki 16 Mutarama uyu mwaka.

Mu kiganiro yagiranye na IGIHE, Bamurangirwa yavuze ko igitabo yise “Africanism” cyangwa “uburwanashyaka muri rusange ku mugabane wa Afurika” yacyanditse kugira ngo akangurire urubyiruko kwikunda no gukunda iby’iwabo.

Yagize ati “Ni igitabo nanditse ari ugukangurira urubyiruko muri rusange, bigirire icyizere, bakunde iwabo, ndetse kandi na bo ubwabo bibuke kwiyubaha, bikunde ko ari beza ku mubiri, bamenye ko ubwenge babufite, ntibagire icyo bakeka cyangwa uwo bakeka wabaruta ku buryo ubwa ari bwo bwose kubera ko ari bo; kandi bamenye ko muri Afurika iwabo ntacyo babuze, bareke kurarikira ahandi hanze y’umugabane wacu.”

Bamurangirwa yavuze kandi ko iki gitabo yacyanditse kugira ngo kiburire urubyiruko rufite imyumvire yo kujya mu bihugu by’abazungu bizeye kuhakirira.

Ati “kubera umubare munini w’urubyiruko muri Afurika bafite iyo myumvire, ari abo nahasanze n’abahansanze, nasanze ntabona ukundi mbwira abana bacu kugira ngo bigarure, biyemere, bakunde aho bari, bamenye ko ari heza kandi ntacyo habuze.”

Indi mpamvu yateye imbaraga Bamurangirwa kwandika iki gitabo ni uko hari abandi bafite imyumvire nk’iyo yarafite mbere y’uko agera bihugu byo hanze y’umugabane wa Afurika, ngo abone ko ibyo yatekerezaga atari byo.

Yavuze ko ibyo benshi bakeka ko mu bihugu by’i Burayi na Amerika haba ubuzima bwiza, baba bibeshya kuko akenshi bajyayo bagakora akazi gasuzuguritse gahari, bahembwa amafaranga y’intica ntikize.

Bamurangirwa avuga ko ubwe azi benshi bagiye bagenda bazi ko bagiye gukira, bikarangira babayeho ubuzima bubi, bakagira isoni zo kugaruka iwabo.

Yavuze ko hari icyizere cy’uko imyumvire ibihugu bya Afurika byasigiwe n’ubukoroni yo kumva ko bikennye kandi ntacyo byakwishoboza, yahinduka ariko mu gihe urubyiruko rubigizemo uruhare.

Ati “Twebwe nk’abirabura batwumvishije ko iwacu turi abakene natwe turabyakira. Kugira ngo tuzabyigobotore, ni byo bizakunda ariko ni urugendo rurerure ruzatangirwa n’aba bana bacu, abana babyiruka badukundiye n’ubwo bitoroshye twabigeraho.”

“Inama yanjye ni uko bankundira nkabuhagira ubwo bukoroni bubarimo nkashyiramo ubundi, kuko urugendo ruracyari rurerure. Ntabwo byahita bishoboka ariko intangiriro yo irahari ntabwo twahita tuvuga ngo nta cyizere.”

New Rwanda From Hell to Heaven” cyo yagikomoye ku iterambere yasanze mu Rwanda ubwo yahagarukaga mu mwaka wa 2016, ubwo yari amaze imyaka isaga icumi atahakandagira.

Yavuze ko iterambere ry’u Rwanda ari igihamya ko Afurika yatera imbere ishyize hamwe.

Kumurika ibyo bitabo ku mugaragaro bizaba tariki 16 Mutarama 2020 mu isomero rikuru ry’igihugu ku Kacyiru guhera saa kumi n’imwe.

Nubwo adafite amashuri menshi, ngo ntibimuza kwandika ibitabo kubera ko yegera inzobere muri uyu mwuga zikagenda zimugira inama.

Iduka ’Waterstones’ niryo mu Bwongereza rimufasha gusohora ibitabo rikanabishyira ku isoko.

Mu Rwanda ibitabo bye biboneka mu maduka y’ibitabo, Ikirezi na Caritas, ndetse n’ababishaka bashobora kubisanga kuri interineti. Ibi bitabo bibiri yasohoye bizajya biboneka mu isomero ry’igihugu.

Bamurangirwa amaze kwandika ibitabo bitanu byose biri mu rurimi rw’Icyongereza. Harimo icyo yise “Rwanda Yesterday” avugamo amateka y’u Rwanda, ‘‘Patriotism” kigizwe n’ibisigo biri mu Kinyarwanda no mu Cyogereza yahimbiye Perezida Kagame, icyo yahimbiye Umwami Mutara wa III Rudahigwa, ndetse n’icyo yahimbiye Inkotanyi zambuka, “My Mother’s Dreams” agaragazamo uburyo yapfushije nyina akiri muto agacikiriza amashuri ye kandi inzozi ze zari ukwiga, “New Rwanda From Hell to Heaven” avugamo uburyo u Rwanda rwahindutse nyuma ya Jenoside. Igitabo cya gatanu ni icyo yise “Africanism” twabavwiyeho byinshi.

Bamurangirwa amaze kwandika ibitabo bitanu
New Rwanda, From Hell to Heaven ni igitabo kigaruka ku iterambere u Rwanda rumaze kugeraho
Igitabo Africanism kirimo inama ku rubyiruko rwumva ko amakiriro yarwo ari mu mahanga
Bamurangirwa amaze imyaka 15 aba mu mahanga

Amafoto: Munyarugerero Gift


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .