Akariza Laurette yanditse igitabo kigaragaza ibibazo by’urubyiruko rwavutse nyuma ya Jenoside

Yanditswe na Ferdinand Maniraguha
Kuya 25 Ugushyingo 2020 saa 10:52
Yasuwe :
0 0

Akariza Laurette yanditse igitabo cyitwa ‘Wet under the Rainbow’ gikubiyemo ibibazo urubyiruko rwavutse nyuma ya Jenoside yakorewe Abatutsi ruhura nabyo birimo n’ihungabana ry’amateka batabayemo (Trans -Generation Trauma).

Iki gitabo ugenekereje mu Kinyarwanda gisobanuye ‘Gukonja munsi y’umukororombya’. Akariza yabwiye IGIHE ko yacyise gutyo kuko urubyiruko rwavutse nyuma ya Jenoside rumeze nk’urukonje bitewe n’ibibazo bikomoka ku mateka u Rwanda rwagize, ariko akavuga ko rufite amahirwe n’icyizere cy’ejo hazaza kuko rufite igihugu cyiza kandi gifite intego nziza.

Iki gitabo gikoze mu buryo bw’ibarankuru (Novel), kikabamo inkuru z’urubyiruko rutandukanye rurimo urwavutse ku babyeyi bakorewe Jenoside, abavuka ku bayikoze n’abandi.

Akariza avugamo uburyo urubyiruko nubwo rutabaye muri Jenoside ariko ibibazo byayo byarukurikiranye, nk’abavutse bagasanga ababyeyi babo barahemukiwe bagakura icyo gikomere n’umujinya wo kwihorera, abakuze ababyeyi babo bafunzwe bazira ibyo bakoze muri Jenoside n’ibindi.

Yavuze ko hari n’abakuze bafite inzozi zo gukora imyuga runaka ariko kubera ko itaratezwa imbere mu gihugu bitewe n’ibindi bibazo byihutirwa igihugu cyagombaga guhangana nacyo, impano zabo zikazima.

Ati “Mu gitabo bagaragaza ukuntu Jenoside yabagizeho ingaruka nubwo batari bariho icyo gihe. Ni ikibazo cy’ihungabana ryambukiranya ibisekuru (trans-Generation trauma) abantu benshi badakunze kuvugaho.”

Akariza Laurette avuga ko igitabo cye kigamije kuragaragaza uburyo ibibazo urubyiruko rufite ubu bifite aho bihuriye n’amateka “kugira ngo amateka bayagire ayabo kurusha ababyeyi babo kuko nibo bagiye kuyasigarana mu gihe kizaza.”

Yakomeje agira ati “Bashobora kumva ko bireba ababyeyi babo gusa bagakomeza kwiryamira ariko bagomba kumva ko amateka nabo yabakozeho, ntibaterwe isoni no kuyavuga.”

Iki gitabo kinashishikariza ababyeyi gufasha abana babo gusobanukirwa amateka, bakayarenga bakiteza imbere. Kutabigenza gutyo, ngo ni ikibazo ku rubyiruko no kuri ejo hazaza.

Ati “Bakwiriye gufasha abana gushyiramo imbaraga mu kwiteza imbere no guhangana n’izo ngaruka no kubumvisha ukuntu amateka ari ayabo. Nta handi hantu bayahungira n’aho baba baragiye mu mahanga. Batabivuze byatera indwara zirushijeho kuko hari aho byagiye bigaragara. Bakwiriye kubifatirana kuko ibuye ryagaragaye ntabwo riba ricyishe isuka.”

Iki gitabo cyasohotse ku bufatanye na Imfura Heritage Rwanda, kikaba cyatangiye kugera mu nzu zigurisha ibitabo mu mujyi wa Kigali.

Akariza yavuze ko urubyiruko rwavutse nyuma ya Jenoside yakorewe Abatutsi ruhura n'ibibazo bikomoka ku mateka y'iyo Jenoside
Ubwo Akariza yamurikaga igitabo cye mu isomero rikuru rya Kigali kuwa 21 Ugushyingo 2020
Akariza yavuze ko urubyiruko rufite ihungabana ryambukiranya igisukuru rituruka kuri Jenoside nubwo batayibayemo
Iki gitabo cyitezweho gufasha urubyiruko gusobanukirwa no kuganira ku mateka kugira ngo babashe kugira imbaraga zizabateza imbere ejo hazaza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .