Umuganura w’uyu mwaka ugiye kwizihizwa mu buryo budasanzwe, imiryango yifite iganuza itifite

Yanditswe na Uwiduhaye Theos
Kuya 2 Kanama 2020 saa 02:53
Yasuwe :
0 0

Umunsi w’Umuganura uba buri mwaka ugiye kwizihizwa mu buryo budasanzwe kubera icyorezo cya COVID19 cyugarije isi muri iyi minsi.

Imiryango yaronse muri uyu mwaka yasabwe kuganuza itarabashije kugira icyo isarura uyu mwaka bitewe n’ibibazo bitandukanye yahuye nabyo.

Uyu munsi w’umuganura wizihizwa mu Rwanda buri mwaka , kuri iyi nshuro uzaba insanganyamatsiko igira iti ‘umuganura, isooko y’ubumwe n’ishingiro ryo kwigira’.

Iyi nsanganyamatsiko ishingiye ku ndangagaciro z’umuco nyarwanda zo kwizihiza umuganura ari zo kunga ubumwe kw’abanyarwanda, gusabanya abayobozi n’abayoborwa, kwicisha bugufi kw’abayobozi kubaka umutimanama no gukunda ndetse n’izindi.

Uyu munsi uteganyijwe kuzaba ku wa 7 Kanama 2020 nk’uko bigaragara mu itangazo ryashyizwe hanze n’Inteko Nyarwanda y’Ururimi n’Umuco, RALC.

Bitewe n’uko umuganura w’uyu mwaka uzaba mu gihe Isi iri mu bihe bidasanzwe byo kwirinda Coronavirus, hazajya habaho ibiganiro bitandukanye mu cyumweru cyawo ariko bikorwe hifashishijwe ikoranabuhanga cyangwa itangazamakuru.

Umuganura w’uyu mwaka uzizihirizwa mu ngo imiryango yishimira ibyiza yagezeho ariko banahigira umwaka utaha.

Buri muryango urakangurirwa kwizihiza umunsi w’umuganura, ababyeyi bagasaba n’abana.

Kuri uwo munsi, buri muryango uzakurikirana ibiganiro bizanyuzwa mu bitangazamakuru bitandukanye. Ibyo biganiro bizaba bivuga ku muganura.

Uhagarariye umuryango azafata akanya aganirize abagize umuryango we bisuzume barebe ibyo bagezeho ku muco n’indangagaciro zibaranga nk’umuryango kandi barebere hamwe imihigo y’umuryango. Ngo byaba byiza kandi buri muntu wese wakoze kuba yashimirwa.

RALC yasabye inzego z’ibanze kuzageza ku bahagarariye imiryango ubutumwa buzabafasha gusuzuma ibyo bagezeho no gutegura imihigo y’umuryango.

RALC ivuga ko ishishikariza imiryango kuzaganuza indi itarabonye umusaruro mwiza uyu mwaka bitewe n’ibibazo bitandukanye.

Umuganura watangiye kwizihizwa mu Rwanda ku Ngoma ya Gihanga Ngomijana mu kinyejana cumi na kimwe, uza kongera guhabwa imbaraga na Ruganzu II Ndoli (1510-1543) ubwo yabohoraga u Rwanda nyuma y’imyaka irenga 11 ruri mu maboko y’abanyamahanga (Abanyoro, Abanyabyinshi n’Abanyabungo).

Imiryango yabashije kuronka uyu mwaka yasabwe kuganuza itaragize icyo ibona

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .