Ubuhanzi nyarwanda bwahawe umwihariko udasanzwe mu muganura w’uyu mwaka

Yanditswe na Ferdinand Maniraguha
Kuya 25 Nyakanga 2019 saa 08:28
Yasuwe :
0 0

Icyiciro cy’abakora ubuhanzi nyarwanda mu ngeri zitandukanye, bahawe umwihariko mu cyumweru cyahariwe kwizihiza Umuganura muri uyu mwaka, hagamijwe kuzamura urwo rwego rusa n’urwasigaye inyuma.

Guhera tariki ya 29 Nyakanga kugeza tariki ya 4 Kanama, mu Rwanda hazizihizwa Icyumweru cy’Umuganura 2019, kizarangwa n’ibikorwa bitandukanye.

Minisiteri ya Siporo n’Umuco (MINISPOC) ku bufatanye n’Inteko Nyarwanda y’Ururimi n’Umuco (RALC), batangaje ko uyu mwaka umwihariko uzaba guteza imbere inganda ndangamuco, hamurikwa ibihangano nyarwanda mu ngeri zitandukanye.

Mu kiganiro IGIHE yagiranye n’ Umuyobozi w’Ishami ry’Umuco muri RALC, Dr Nzabonimpa Jacques, yavuze ko uyu mwaka bahisemo kwibanda ku buhanzi kuko ari icyiciro cyafasha igihugu gutera imbere ariko cyasigaye inyuma.

Ati "Impamvu ni uko ari icyiciro kimwe mu bigize ubukungu bw’u Rwanda cyagiye gisigara inyuma. Abahanzi bakomeje gufatwa nka ba Sagihobe, nk’abantu baza bakaririmba cyangwa bagashimisha abantu bagahabwa ikinyobwa barangiza bakigendera. Ntibyahawe agaciro kandi iyo urebye neza usanga ari icyiciro gifite kuba cyazamura ubukungu bw’igihugu mu buryo bwihuse kandi buhamye. Mu gutanga akazi, ni icyiciro gifite guha abantu benshi akazi.”

"Nitwibanda ku buhanzi bukaduhangira imyambaro, za nganda ndangamuco zizatera imbere. Nk’icyiciro cya sinema giteye imbere, ntabwo cyazamuka cyonyine ahubwo cyazamura icya muzika, kikazamura icy’ubwiza n’imideri.”

Guhera tariki ya 29 Nyakanga kugeza tariki ya 31 Nyakanga, mu Mujyi wa Kigali ahazwi nka “Car Free Zone” buri munsi guhera saa kumi n’imwe hazajya habera imurikabikorwa ry’urwego rw’ubuhanzi nyarwanda, mu ngeri zitandukanye zirimo kuririmba, imideri, sinema, urwenya, imbyino n’ibindi.

Hari n’Uturere twemeye ko muri icyo gihe tuzategura aho gukorera imurikabikorwa ry’abahanzi batwo mu rwego rwo kubateza imbere.

Tariki ya 1 Kanama nibwo hazaba igitaramo cy’Umuganura kimaze kumenyerwa ku izina rya “I Nyanza Twataramye” kizatangira saa kumi n’ebyiri z’umugoroba mu Rukari i Nyanza.

Ku wa Gatanu tariki ya 2 Kanama, hazizihizwa Umuganura 2019 ku rwego rw’Igihugu, ibirori byawo bizabera kuri Sitade ya Nyanza; ariko bikazanizihizwa ku rwego rw’Uturere n’Umudugudu.

Dr Nzabonimpa yatangaje ko uyu mwaka hari undi mwihariko w’uko tariki ya 3 n’iya 4 Kanama, Umuganura 2019 uzizihizwa ku rwego rw’umuryango, hagamijwe gushishikariza imiryango y’Abanyarwanda kuba umwe no gufashanya.

Ati “Bigumye ku rwego rw’Igihugu ntibibe mu muryango ntabwo Umuganura 2019 waba wabaye. Umuganura ni cya gihe ngewe manuka nkajya iwacu ku isȏoko, nkifatanya n’abandi banyamuryango tugasabana nk’umuryango. Abana bato baba i Kigali bagahura na babyara babo, bakamenya ibibaranga nk’umuryango. Umuryango ukarebera hamwe uko umeze, abarimo bakennye batabonye mituweri bagafata ingamba nk’umuryango.”

Umuganura 2019 mu Banyarwanda baba mu mahanga uzizihizwa ku munsi bazahitamo ariko bitarenze tariki ya 31 Kanama uyu mwaka.

Dr Nzabonimpa yashishikarije abakozi ba Leta badafite impuzankano yihariye, ko mu Cyumweru cy’Umuganura 2019 bakwiriye kuza bambaye kinyarwanda cyangwa bakambara imyenda yakorewe mu Rwanda.

Mu mateka y’ u Rwanda, Umuganura wari umunsi mukuru ngarukamwaka wubahwaga kandi ugahabwa agaciro ibwami no mu muryango w’Abanyarwanda.

Uwo munsi wizihizwaga ku mwero w’amasaka, maze Abanyarwanda bagashimira Imana uburumbuke bw’umuryango, imyaka n’amatungo yabahaye.

Bivugwa ko Umuganura watangiye kwizihizwa ku ngoma ya Gihanga Ngomijana mu kinyejana cya cyenda. Kwizihiza uwo munsi byaciwe n’abakoroni mu wa 1925 ubwo umutware Gashamura ka Rukangirashyamba wari umwiru ushinzwe Umuganura, yacibwaga mu Gihugu.

Abanyarwanda bakomeje kwizihiza umuganura mu miryango yabo, uwo munsi wongera guhabwa imbaraga na Leta y’Ubumwe yanashyizeho ikiruhuko buri wa Gatanu wa mbere w’ukwezi kwa munani (Kanama).

Dr Nzabonimpa yavuze ko uyu mwaka bahisemo kwibanda ku buhanzi kuko ari icyiciro cyafasha igihugu gutera imbere ariko cyasigaye inyuma
Dr Nzabonimpa yashishikarije abakozi ba Leta badafite impuzankano yihariye, ko mu Cyumweru cy’Umuganura 2019 bakwiriye kuza bambaye kinyarwanda cyangwa bakambara imyenda yakorewe mu Rwanda

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza