Rutangarwamaboko yakoze umuhango gakondo wo gusohora no kwita izina Ubuheta (Amafoto)

Yanditswe na Uwiduhaye Theos
Kuya 20 Nzeri 2019 saa 12:23
Yasuwe :
0 0

Umupfumu Rutangarwamaboko Modeste Nzayisenga n’umugore we Umuziranenge Sana Cynthia, bakoze umuhango gakondo wo gusohora umwana no Kwita Izina ubuheta bwabo nk’uko wakorwaga kera mu muco nyarwanda.

Rutangarwamaboko n’umufasha we bibarutse ubuheta muri Nzeri 2019, babwita Benimana.

Muganga Rutangarwamaboko wabaye icyamamare mu Rwanda kubwo gukomera ku muco nyarwanda bakoze umuhango utagikunze kumenywa no gukorwa na benshi bo muri iki gihe, wo gusohora umwana no kumwita izina nk’uko byakorwaga kera mu muco w’u Rwanda.

Ni umuhango wabereye mu rugo rwabo ruri ku Gisozi ho mu Karere ka Gasabo mu Mujyi wa Kigali kuwa 18 Nzeri 2019.

Rutangarwamaboko avuga ko kwita umwana we Benimana ari igihango gikomeye agiranye na bene wabo b’abanyarwanda.

Ati “Umwana yitwa Benimana, kuko ari igihango ngiranye na benewacu b’Abanyarwanda kibahonora kandi kibibutsa ko turi Benimana, ko abanyarwanda tutari dukeneye kuzanirwa Imana mu buryo mvamahanga boshye ababuramana, nicyo gituma mukuru we, imfura yacu yitwa Umugiramana, wavukiye mu Rwanda rwongeye kwisubiza agaciro karwo rwiyubakira kuri nyirizina yarwo, umuco warwo.”

Rutangarwamaboko agaragaza ko umuhango wo gusohora no Kwita izina umwana wabagamo imigenzo itandukanye isobetse nk’uko imbingo, imiganda n’imbariro bisobekerana bikarema urugo rugakomera ntiruhirime ari nako ukomera ku mihango n’imigenzo.

Habanzaga imigenzo yo Gutinda Ikiriri, Kuhagira umubyeyi no kumukanda. Gutinda ikiriri bikaba kumusasira uburiri bwabaga bunepa kandi buterereye bunaseguye neza.

Nyuma umubyeyi yahabwaga igikoma agahembera kandi akayobora amashereka umwana akonka akanogerwa, agacanirwa akota agasusuruka, akuhagirwa agakandwa umugongo n’imibirizi ndetse no kwicazwa mu miti yabugenewe itandukanye yatumaga yongera kwegerana n’umugongo ugasubirana ugaterana.

Ibyo byose byakorwaga n’ab’umuryango n’abantu ba bugufi b’inshuti z’umuryango, umubyeyi adasohoka aruhuka akorerwa gusa, atagendererwa n’abo aribo bose kuko hashoboraga kuzamo n’ab’umugongo mubi bakaba bakwanduza umwana. Ibyo byamaraga iminsi irindwi.

Hakurikiragaho umugenzo wo Guhinga, uyu wabaga ku gicamunsi cy’umunsi wa karindwi ubwo ababyeyi begeranyaga amasuka y’abana bazahingira murumuna wabo, rwa ruhinja rwavutse, aya masuka akaba yabaga akozwe mu duti dufite inkonzo tw’imitobotobo, byagirirwaga guhora byibutsa umuco wo kwigira no kwishakamo ibisubizo kw’abanyarwanda kuva kera kuko aribo biremeye amasuka y’inkonzo akoze mu biti.

Habagaho n’umugenzo wo Guhinga, abana bahingira uruhinja rwavutse, uyu nawo hakoreshwaga udusuka tw’inkonzo ziva mu mitobotobo bikaba ari ubwo bukungu n’ubuhanga bw’Abanyarwanda.

Uyu mugenzo wo guhinga ukaba warakorwaga n’abana bato kuva ku mwaka n’igice kugeza nko ku myaka irindwi.

Muri iki gikorwa habagaho n’umugenzo wo Kurya Ubunnyano, uyu nawo wakorwaga nyuma y’umugenzo wo guhinga.

Aha muri rwa rugo rwavutsemo umwana baba bateguye ibishyimbo bigeretseho isogi, isogo, isogereza, intoryi zidasatuye n’intagarasoryo, bagashyiramo imboga z’uburyo butandukanye inyabutongo, imbwija, ibisusa n’ubututu.

Barikaga kandi umutsima w’amasaka bakabizana ku nkoko bagaterekera abana ku musambi abana bakarya inombe nk’ikimenyetso cy’uko ntawe uzanena umwanda w’umwana.

Nyuma hakurikiragaho umugenzo wo Kwita amazina Umwana, ibi byabaga nyuma yo kurya ubunnyano aho abana bose bahagurukaga bwangu banyaganwa buri wese ajya kwita umwana izina afite n’amashyushyu menshi yo kureba ako gahinja kaba kavutse.

Nyuma bagasubiza umwana nyina, bakaririmba, bagatarama bagasusurutsa umubyeyi, abasizi bakamutura inganzo yabo, inanga zikamuvugirizwa, impundu zikavuga urwanaga igitaramo mu muryango kikizihira ababyeyi n’umwana, umwana agatozwa kandi agakurira muri icyo kinyotera cy’ubuntu mu bantu n’ibintu.

Habagaho n’umugenzo wo Kwakira amazina y’Umwana no komora umubyeyi, nabyo byazaga ubwo umugenzo wo kwita amazina no gutuka umwana ibitutsi n’imitongero by’ineza iyo byabaga bihumuje.

Umuhango wo gusohora umwana n’umubyeyi, guterura umwana no kumusimbiza akitwa izina na se niwo washyiraga akadomo ku gikorwa cyo kwita izina bya Kinyarwanda.

Aho mu rukerera rw’umunsi wa munani bigeze ku munsi wa cyenda. Se w’umwana yabyukaga kare nta wundi uwo ariwe wese baravugana, akicara mu irebe ry’umuryango ku ntebe ya Kinyarwanda.

Nyina w’umwana akaza ahetse umwana, akamwururikiriza imbere ya se akamumuhereza ati “Akira umwana.”

Se na we akamwakira akamuterura akamwitegereza neza mu maso, akamuterura akamwumva neza. Ni uko se akamuterura agasimbiza ati “Kura ujye ejuru mwana wanjye!” akabigira atyo gatatu nko kumutongera ubuzima bwuzuye kandi busendereye.

Rutangarwamaboko asanzwe ari umushakashatsi, umwigisha w’ubuzima bushingiye ku muco akaba n’inzobere mu by’umuco, amateka, imbonezabitekerezo (Filosofiya) n’ubuzima bwa muntu bushingiye ku myizerere, imyumvire, imitekerereze, imyitwarire ndetse n’imigirire.

Umugore wa Rutangarwamaboko ateruye ubuheta baherutse kwibaruka
Abakuru bari bari mu muhango wo kwita izina umwana w'ubuheta bwa Rutangarwamaboko
Rukizangabo Shami Aloys wamamaye mu biganiro by'umuco yari ari muri iki gikorwa
Rutangarwamaboko n'umugore we bise izina umwana wabo umaze iminsi icumi
Rutangarwamaboko asangira n'abaje mu muhango wo kwita izina ubuheta bwe
Rutangarwamaboko yakoze umuhango wo kwita izina ubuhta ushushe nk'uko byakorwaga hambere, hazanwa amafunguro
Abana bakoze umugenzo wo Guhinga
Abana bato bariye bamaze kwijuta bajya kwita izina umwana wavutse
Umusizi Nsanzabera Jean de Dieu yari yagiye mu muhango wo kwita izina umwana wa Rutangarwamaboko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza