Nzaharanira kutaruta ubutumwa kuko buruta intumwa! Isezerano rya Bamporiki nyuma yo kugirwa Minisitiri

Yanditswe na Nsengiyumva Emmy
Kuya 5 Ugushyingo 2019 saa 12:00
Yasuwe :
0 0

Ku wa Mbere tariki 4 Ugushyingo 2019 nibwo Perezida wa Repubulika Paul Kagame yashyize mu murimo mishya bamwe mu bayobozi banyuranye. Bamporiki Edouard yagizwe Umunyamabanga wa leta muri Minisiteri y’Urubyiruko n’Umuco.

Nyuma yo guhabwa uyu mwanya Bamporiki Edouard yashimiye Perezida Kagame amwizeza ko atazamutenguha ndetse azasohoza ubutumwa amutumye.

Abinyujije ku rukuta rwe rwa Twitter, Bamporiki yagize ati “Witaba kare ugatumwa kure, Watumwa n’Umukuru ugashima ushingura ugana iyo utumwe. Ubutumwa mumpaye Nyakubahwa Mutoza w’Ikirenga Paul Kagame nzabusohoza bwemye, nzaharanira kutaruta ubutumwa kuko buruta intumwa. Nzaba Mudahusha ku ruhembe muntumye kurasaniraho. U Rwanda nirweme.”

Ubu butumwa buri mu Kinyarwanda cyiza, bwumvikanisha uburyo uyu mugabo wari usanzwe ari umukuru w’Itorero ry’Igihugu yishimiye inshingano nshya yahawe.

Usibye kuzishimira, ikindi Bamporiki yavuzemo ni uko atazigera ashaka kuruta ubutumwa ahawe kuko buruta intumwa. Aha akaba yumvikanishaga ko atazitwaza umwanya abonye ngo akomere kuruta inshingano ze.

Bamporiki yamenyekanye nk’umukinnyi wa filime, ikinamico akaba n’umwanditsi w’ibitabo, imivugo n’ibisigo, azwi cyane mu ikinamico urunana aho akina yitwa Tadeyo cyangwa se Kideyo, aho akina ari se wa Budensiyana na Solina, inshuti ya Bushombe na Sitefano b’i Nyarurembo.

Yavutse tariki 24 Ukuboza 1983, i Nyamasheke mu Ntara y’Iburengerazuba, ari naho yaje kwiga amashuri abanza ndetse n’ayisumbuye, nyuma yiga amategeko mpuzamahanga muri Kaminuza yigenga ya Kigali ULK.

Yakuze akunda cyane kwandika imivugo, bituma yitabira amarushanwa atandukanye mu bigo by’amashuri.

Afite imyaka 11 gusa y’amavuko, yakoze umuvugo witwa “Iyo badatsembwa tuba dutwenga” ari nawo watumye amenyekana nk’umusizi akiri umwana.

Amaze kuba umusore yagiye abona umwanya wo kuvuga imivugo mu birori bitandukanye byo ku rwego rw’igihugu, nko ku munsi mukuru w’Intwari n’indi minsi mikuru itandukanye.

Bamporiki wari usanzwe yumva ikinamico “Urunana” akiri muto, akifuza kuba umwe mu bakinnyi bayo, mu 2003 yashakishije aho umushinga uyitegura ukorera, arahamenya maze agezeyo arabinginga ngo bareke ajye akinamo. Aza kubyemererwa maze ahabwa umwanya yitwa Tadeyo.

N’ubwo abantu bagiye bumva Tadeyo akina ari umusaza ndetse ufite abana bakuru n’abuzukuru, yari muto kuko icyo gihe yari afite imyaka 20 y’amavuko, bamwe mu bakinaga byumvikana ko ababereye umubyeyi baramurutaga.

Mu bindi bijyanye n’ubuhanzi, Bamporiki yakunze kugaragara muri filime zitandukanye ndetse ahabwa ibikombe n’ibihembo muri sinema, haba mu z’abandi yagiye akinamo ndetse no mu zo yagiye yandika akanazikinamo.

Muri z’abandi yagaragayemo harimo iyitwa ’Munyurangabo’ y’uwitwa Isaac Chung ukomoka muri Amerika, iyitwa ’Rwanda take two’ ya Pia nawe wo muri Amerika, n’iyitwa ’Imitoma’ ya Kwezi John.

Mu mafilime yanditse ku giti cye akanakinamo harimo iyitwa ‘Ukuri kuri he’ ndetse na ‘Long Coat’ (Ikote rirerire).

Mu 2006 yitabiriye Iserukiramuco ry’amafilime rya Cannes mu Bufaransa, mu 2010 yitabira iryabereye i Rotterdam mu Buholandi, mu 2011 yitabira iryabereye muri Turikiya ryitwa “Crimes and punishment”.

Mu 2008 yabonye igihembo yakuye i New York muri Leta Zunze Ubumwe za Amerika, akaba yarahembewe kwandika filime nziza (Best Script) abikesheje filime “Long Coat”, yagaragayemo abahanzi b’Abanyarwanda nka Nirere Shanel, Mani Martin n’umukinnyi Jimmy Gatete.

Mu 2011 yabonye igihembo cy’umukinnyi mwiza (Best Actor) mu iserukiramuco rya Heart Land.

Nyuma y’ubuhanzi mu byiciro bitandukanye, Bamporiki mu 2013 yatorewe kuba intumwa ya rubanda, aba Umudepite mu Nteko Ishinga Amategeko y’u Rwanda.

Ku itariki ya 30 Kanama 2017, Bamporiki yahawe imirimo mishya agirwa Umuyobozi w’Itorero ry’Igihugu.

Bamporiki ni umugabo wubatse, wambikanye impeta y’urudashira na Uwingabire Claudine tariki ya 18 Ukuboza 2010.

Bamporiki yize amasomo atandukanye, arimo ajyanye na sinema yize i Burayi ahitwa Plague, aza no kwiga muri Leta Zunze Ubumwe za Amerika ibijyanye no kubaka amahoro no kurwanya amakimbirane. Mu masomo asanzwe yize muri Kaminuza yigenga ya Kigali ULK aho yakuye impamyabumenyi y’icyiciro cya gatatu mu mategeko mpuzamahanga..

Ubutumwa bwa Bamporiki Edouard nyuma yo guhabwa umwanya mushya

Bamporiki Edouard yari asanzwe ari Umuyobozi w'Itorero ry'Igihugu
Bamporiki Edouard afite impamyabushobozi y'Icyiciro cya gatatu cya Kaminuza mu bijyanye n'amategeko mpuzamahanga (International Public Law)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza