00:00:00 IGIHE NETWORK KN KINYARWANDA EN ENGLISH FR FRANCAIS

Inkwano ntabwo igomba guhindurwamo ubucuruzi- Antoine Cardinal Kambanda

Yanditswe na Cyprien Niyomwungeri
Kuya 16 April 2022 saa 01:36
Yasuwe :

Ni kenshi twumva inkuru zivuga ngo ’ubukwe bwa kanaka na kanaka bwapfuye’, amatsiko atubana menshi tukifuza kumenya ikirogoye uwo mugambi mwiza bakatubwira ko iwabo w’umukobwa bagaye inkwano zatanzwe n’umusore cyangwa se bifuza izirenze ubushobozi bwe.

Ingero ni nyinshi. Bishobora kuba byarakubayeho, byarabaye ku nshuti yawe, umuturanyi, umuvandimwe wawe cyangwa se akaba ari n’umuntu wa kure wumvise. Ndemeranya nawe ko iki gikomere n’ihungabana bigoye ko gikira.

Reka ngaruke ku rugero rwa hafi aha muri Nzeri 2021 umusore wo mu Karere ka Nyagatare yimwe umugeni ku munsi w’ubukwe nyuma y’uko kwa sebukwe bagaye inkwano yari yatanze bavuga ko ari nke.

Niyomwungeri Jeremie wimwe umugeni yari amaze imyaka itatu akundana n’umukobwa bari hafi kurushinga. Yavuze ko abizi neza ko uwo mukobwa amukunda ngo kuko bacanye muri byinshi bikomeye, gusa ngo icyatumye amubenga ni umuryango we wagaye inkwano yatanze.

Yari yumvikanye n’umukobwa ko azamukwa inkwano y’ibihumbi 500 Frw kuko niyo yari kubona. Bamubwiye ko nta mukobwa wakobwa ayo mafaranga, ikindi ngo amafaranga Niyomwungeri yatanze ngo ntiyagura n’inka ebyiri.

Uretse uyu musore, hari n’ahandi uzasanga mu misango y’ubukwe abasaza baciririkanya ku nkwano nk’abagurisha itungo cyangwa isambu. Simvuze amananiza azamo ku buryo hari abisanga gahunda y’ubukwe bwabo isubitse no kutumvikana ku ngano y’inkwano.

Abakurikiranira hafi umuco basanga ibi ari ubucuruzi bukomeye ndetse nka Ingabire Ingabire Marie Immaculée, uyobora Umuryango Mpuzamahanga urwanya ruswa n’akarengane (Transparent International) mu Rwanda, yiyemeje kurega abashinzwe umuco ’kurebera icuruzwa ry’abantu’.

Ati “Ab’iwabo w’umukobwa bati ‘nibura miliyoni eshatu na maganatanu’ ab’iwabo w’umuhungu bati ‘rwose mwaciye inkoni izamba [ukagira ngo ni icyaha bakoze cyo kuza kubasaba umugeni] mukagira nibura nka miliyoni 2,1’.”

Akomeza abinenga agira ati “Njyewe icyo gihe mpita mbaza nti ‘none iyo mugurisha isambu cyangwa itungo mubigenza gute?’ nti ‘ubwo muri guciririkanya ku muntu?’.”

Mu kiganiro IGIHE iherutse kugirana na Antoine Cardinal Kambanda yavuze ko inkwano ari umuco mwiza kuko umukobwa uyihabwa na we ibyo azana mu kubaka urugo usanga biba bitanahwanye ahubwo akenshi birenga ibyo ya nkwano batanze. Gusa anenga ababibona nk’inyungu bakifuza ko umukwe wabo yabaha amafaranga anarenze ubushobozi bwe.

Ati "Inkwano ntabwo igomba guhindurwamo ubucuruzi, ushyize mu kuri, iyo umuhungu agiye kubaka urugo umukobwa na we bagiye gufatanya ababyeyi baba bakwiye gufatanya bakubakira abana".

Cardinal Kambanda yongeraho ko inkwano itagomba kubangamira ugushaka kubaka urugo k’umukobwa n’umuhungu ndetse bigomba gukorwa ku buryo bujyanye n’amikoro n’urwego bafite.

Ati "Kuba waca inkwano ikenesha wa muhungu agatangira ntacyo afite cy’ibyangombwa by’urugo kubera ko yayatanze mu gutanga inkwano, uba uhemukiye na wa mukobwa kuko urwo rugo ntabwo ruba ruzafata ahubwo ababyeyi bubatse [iwabo w’umukobwa n’iwabo w’umukobwa] baba bagomba guteranya no gufatanya kugira ngo bubakire abana".

Iki kibazo gituma hari abakobwa bajya bishyingira kubera ko iwabo barimo guca inkwano akabona umuhungu ashaka ko bashyingiranwa ntabwo afite ubwo bushobozi kandi amukunda abona ko bashobora kubakana.

Cardinal Kambanda ati "Ni uguhemukira umwana, bakwiye gushyira mu kuri ntibabangamire urukundo rw’abana bashaka kubaka ibintu ni ibishakwa".

Ubusanzwe inkwano nta giciro igira kandi ntigomba guciririkanywa kuko umuntu atari igicuruzwa. Yasobanuye kandi ko inkwano idakwiye kuba ikibazo hagati y’imiryango, ahubwo ko ari ikimenyetso cyiza cy’urukundo gikwiye gutuma imiryango irushaho gukundana no kubana neza.

Itegeko Nº 32/2016 ryo muri 2016 rigenga abantu n’umuryango, mu ngingo yaryo ya 167 rivuga ko “Ishyingirwa rikorewe imbere y’ubutegetsi rishobora kubanzirizwa n’imihango gakondo ndangagaciro y’umuryango nyarwanda irimo iyi ikurikira:

1° umuhango wo gusaba no gufata irembo uhuza imiryango y’abifuza gushyingiranwa ikemeranwa ko nta nzitizi yo gushyingiranya abana bayo;

2° umuhango wo gusaba umugeni no gukwa ugaragaza amasezerano y’ubwumvikane hagati y’imiryango ibiri (2) yemeranya ko umuhungu n’umukobwa bayikomokaho bazashyingiranwa kandi ko iyo miryango yombi izakomeza gufasha no guhagararira ishyingirwa ryabo. Icyakora, iyo inkwano itabonetse ntibibuza amasezerano y’ubushyingiranwa kwemerwa.”

Cardinal Kambanda asanga imiryango ikwiye kubakira abana aho gushyira imbere inkwano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .