Inkomoko y’Umugayo w’Ibigwari, igihembo cyahabwaga abatinye urugamba mu Rwanda rwo hambere

Yanditswe na Nsanzabera Jean de Dieu
Kuya 18 Kanama 2020 saa 08:51
Yasuwe :
0 0

Mu mateka y’umushinga wo kubaka u Rwanda cyane cyane mu rugamba rwo kurwagura no guhashya abagomeramurage wa Gihanga w’igihugu gisangiwe, habayemo intwari zitagira ingano zakirasaniye, zinagihanganira n’abatagikunda, habayemo n’ibigwari byatereranye abandi ku kazi katoroshye ko kugundagurana n’abanzi badakunda u Rwanda.

Abami b’u Rwanda babigize intego ntagamburuzwa ko bazajya babaha impeta z’ishimwe n’ingororano ku bw’ubutwari bagaragaje mu guhanganira u Rwanda, no kugaya abahabaye ibigwari mu rwego rwo kubahwitura bakisubiraho.

IGIHE yifashishije igitabo “Intwari z’Imbanza, zubatse u Rwanda rugahamya igitinyiro” cyanditswe n’Umusizi Nsanzabera Jean de Dieu, Inzobere mu Muco, Amateka n’Ubuvanganzo, yatatuye amateka y’impitabihe ku mitangirwe y’umugayo ku bagaragaje ubugwari ku rugamba rwo kurasanira u Rwanda mu mugambi wo guhashya umwanzi no kumutsinda burundu nk’uko byakorwaga ha mbere.

Mu mateka y’u Rwanda, Umwami Ruganzu Ndoli, ni we waciye iteka rishyiraho umugayo w’ibigwari byatengushye igihugu bigaharira abandi umurimo wo kuruhanganira bonyine.

Iyi nkuru iragaruka by’umwihariko ku by’umugayo w’ibigwari n’impamvu yawo.

Umwami Ruganzu Ndoli wakunze kwitwa Cyambarantama mu mateka y’u Rwanda, yatwaye u Rwanda mu bihe bikomeye aho rwari rumaze imyaka isaga 11 ruraranze, nyuma y’amahano yadutse mu bikomangoma byo kwa Gahima bikarwanira ingoma. Juru na murumuna we Bamara bakica mukuru wabo Ndahiro Cyamatara agatanga adatanze.

Bitewe nuko Ruganzu Ndoli yari afite akazi katoroshye ko gushimangira igitinyiro cy’u Rwanda mu mahanga aruzengurutse no kwihimura ku bapfakaje u Rwanda bakica se Ndahiro Cyamatare na Nyina Nyabacuzi.

Ndoli yashakishije ikintu cyatuma abaturage ayoboye n’Ingabo bari kumwe mu igababitero byo koromya amahanga bayagusha ruhabo, bagira ubushake bwo kwitabira no kwitangira igihugu mu mugambi ukomeye barimo w’umushinga wo kubaka u Rwanda, wari ugeze kure mu bitero byo kwagura igihugu no gukomeza guhashya abagomeramurage wa Gihanga w’igihugu gisangiwe.

Muri icyo kibariro, ni bwo yciye iteka riha umugayo abatereranye abandi muri buri gikorwa cyerekeranye na gahunda yari yimirije imbere.

Ruganzu Ndoli, niwe wagennye inzego z’Intwari bwa mbere mu mateka y’u Rwanda, anaca iteka rigena umugayo w’ibigwari.

Uwo mugayo wahabwaga ingabo zahunze urugamba watumye Abanyarwanda barushaho guhugukira iby’urugamba, gushira amanga no kurwana ishyaka ryo kwikura mu bucakara bw’amahanga no kwigarurira ibihugu.

Umugayo w’ibigwari, wabaga ugenewe abahunze urugamba n’abanze kurwitabira ngo bajyane n’abandi, aho bagayirwaga mu ruhame ariko mu kinyabupfura. Nyuma yo kugena impeta z’ubutwari, n’Ingororano zahabwaga Intwari uhereye ku ngoma ye, yanagennye n’umugayo w’ibigwari wabaga uteye utya:

-  Inka y’Imirindi: Burya mu rugamba rwose habamo intwari hakabamo n’ibigwari, habamo abarwitabira hakaba n’abaruhunga.
Inka y’Imirindi yagabirwaga ibigwari byose byahunze urugamba, mu buryo bwo kugira ubwoba bagatoroka, cyangwa se mu buryo bwo kutarwitabira, ntibanitabire uwo muhamagaro, abandi bafashe iya mbere mu kururwanirira, cyangwa se kwigira ntibindeba no kwikunda.

Yagabirwaga ibigwari byahunze inshingano zo kuba ibitsimbanyi byagombaba kujya gufasha Ingabo ziri ku rugamba mu rwego rwo gushaka ibizitunga no gushorera iminyago, kuko ntizagombaga kururasanira ngo zijye no gushaka ibizitunga.

N’ubwo ibyo bigwari byahabwaga inka imeze kimwe n’iy’Intwari, ariko bwari uburyo bwo kunenga mu kinyabupfura kw’Abanyarwanda.

Icyatandukanyaga izo nka ni izina gusa, kuba warahawe iy’ubutwari, undi agahabwa iy’ubugwari, ntabwo mwakwishima kimwe, guhorana iryo pfunwe ryonyine byatumaga bikosora nabo bagahamya ubutwari.

Ikindi Inka y’Imirindi yasobanuraga, nuko wahunze urugamba cyangwa se ntarwitabire, ibyo ari byose hari uwamuzirikanye nk’umuziho ubutwari akamurarikira gutabara igihugu n’ubwo yabaga yamutengushye ntamwitabe ku rubanza yamuhamagariye.

Abanyarwanda batinyaga izina ribi kuruta ibindi byose byiza wabaha. Kugabira Inka ikigwari, ni umuco w’ikinyabupfura ntagereranywa kigaragaza uburyo Abanyarwanda bahaga agaciro ikiremwamuntu by’umwihariko abaruvukamo.

Aho niho bagiraga bati “UWISHE ABABI YAMAZE ABEZA” byo kuvuga ko nta Malayika uba mu Isi, uwo ariwe wese yakora nabi, ariko ejo akisubiraho agakora neza, uramutse wishe abo wita babi, wamaraho abantu ku buryo abeza ntabo wazabona.

Mu mitekerereze ya muntu habamo kugoma no gukora neza, icyo umuntu agaburiye nicyo gikura. Ikindi bagenderagaho ni umugani uvuga ngo“ IBYAYE IKIBOZE IRAKIRIGATA” Igihe cyose umuntu akunaniye kuri iki, ariko hari ikindi ashoboye ushobora kumukoresha, bityo bigatuma abayoboye u Rwanda barushaho kugaya ibigwari ariko batabihutaza, ahubwo bakagena izindi nshingano zo kubaka igihugu dore ko zabaga zihari.

-  Akeso k’isoni: Mu Rwanda rwo hambere, bagiraga ibikoresho mugerwa bifashishaga mu gupima ibisukika, ndetse bakabyifashisha mu gusangiriraho ibinyobwa.

Muri ibyo bikoresho habagamo Intango, Ikibindi, Urweso n’ Akeso, uko byatandukanaga mu mazina, ni nako byabaga bitangana no mu bunini.

Mu rwego rwo gushimira ingabo zasoje urugamba, zasangiriraga ku ntango y’Abahizi zakundaga guterekwa ingabo n’abagaba bazo mu gitaramo mvarugamba, inzoga yabaga irimo yo yagenwaga n’ibwami.

Ikigwari ntabwo cyasangiriraga hamwe n’abandi ku Ntango, nticyasangiriraga na rubanda ruciriritse ku kibindi, yemwe no ku rweso rw’abatindi, nticyabashaga kurusomaho. Ahubwo mu rwego rwo kugaya ubugwari bwa bamwe, mu gihe intwari zabaga zisangirira ku “NTANGO Y’ABAHIZI” babashakiraga Akeso (Akabindi gato cyaneeeee!!!Kajyamo amacupa nk’atanu cyangwa se munsi yayo) akaba ariko basangiriraho, kuko babaga babuze ubutwari, bakabura no kuba rubanda rwa giseseka kuko bananiwe kumaranira igihugu cyabo.

Akeso ibigwari byasangiriragaho niko bitaga “AKESO K’ISONI” bagangiriragaho mu rwego rwo kubereka ko babaye ibigwari badakwiriye gusangirira n’abandi ku Ntango, nabo bakagasomaho n’isoni nyinshi zivanze n’ikimwaro cy’uko ntacyo bamariye igihugu.

Mu muco w’Abanyarwanda cyaraziraga ko himakazwa umuco w’ubusambo no kugira ubuntu buke.

Kwimana byari ikizira, wahaga umuntu n’iyo mwaba mufite icyo mupfa, ukazamugaya nyuma, hanyuma mukiyunga mukabana mu gihugu amahoro kuko nta wari ufite uburenganzira bwo kukikwirukanamo.

Kubera izo ngororano zose, zaba izahawe Impotore, uwahawe Umudende, Uwacanye uruti, uwahawe Inka y’Umuheto n’uwahawe Inka y’Imirindi, uwasomeye ku ntango y’abahizi n’akeso k’isoni, byose byatumaga Uwagize ubutwari abiratira abandi mu kivugo cyabimburiga kandi kikanasoza ikintu cyose avuze n’uwagize ubugwari akikosora ubutaha akajyana n’abandi kurasanira igihugu.

Ibyo byatumaga Umunyarwanda wese aharanira kuba Intwari bityo agashira ubwoba ku rugamba. Usibye no kubaha impeta z’ubutwari, Ingabo zose zatsinze urugamba, zagabanaga iminyago, ugasanga urugo rufite Ingabo y’igihugu, arirwo rukomeye.

Uwo mujyo wo kugabira Intwari iminyago no kubaha impeta z’Ubutwari, watumye u Rwanda rubona abana benshi bagana mu Itorero kugira ngo bigiremo ibyo kuba Intwari n’imyitozo njyarugamba.

Nuko abitabira kuba Ingabo z’igihugu baba benshi u Rwanda rugira imitwe y’Ingabo myinshi, ku buryo byakangaranyije amahanga aruzengurutse, agatangira kwibaza uko azifata imbere y’u Rwanda.

U Rwanda rwarinze rwinjira mu gihe cy’ubukoloni mu ndunduro y’Ingoma ya Rwabugili rumaze kugwiza imitwe y’ingabo igera kuri 170. Mu gihe rwahanganywe n’imitwe y’ingabo irindwi mu bihe by’ingoma ya Gihanga ahasaga mu wa 1091, kugeza ku ngoma ya Ruganzu Bwimba ahasaga mu wa 1345.

Kubera ishyaka ry’u Rwanda ryagaragaye ku rugamba ruruhanganira, byageze mu bihe by’ubukoloni abaturage bagifite umutima n’ubushake bwo kwitabira kurasanira igihugu, kubera ibanga ryo gushima no kugabira Intwari ryimakajwe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .