Inkomoko y’Insigamugani: Uwo u Rwanda rutakuye umutima ni uko ntawo yari afite

Yanditswe na Nsanzabera Jean de Dieu
Kuya 16 Ukwakira 2019 saa 11:17
Yasuwe :
0 0

Uyu mugani bakunze kuwuca iyo u Rwanda rwabaga rusumbirije inteko z’ishyanga rukazigusha ruhabo, abahungu bateraniye mu gitaramo mvarugamba bakivuga imyato z’ibikenya bisasiye, abambikwa imidende, impotore n’abacanye uruti, bakagira bati “N’ubundi uwo u Rwanda rutakuye umutima, ni uko ntawo yari afite’’.

Wakomotse ku biganiro by’inkirirahato z’ingabo z’u Burundi, ubwo zarokokaga inzara z’ingabo za Cyilima Rujugira, umwami w’u Rwanda mu gitero bagabye mu Rwanda, ahayinga umwaka wa 1700.

Cyilima Rujugira ubwo yimaga ingoma ya se Yuhi Mazimpaka, yahuye n’amakozere atagira uko yabarwa, menshi yari aturutse ku bavandimwe be barwaniye ingoma harimo Karemera Rwaka, haza kuziraho n’ibitero by’ibihugu bine birimo u Burundi, u Bugesera, i Gisaka na Ndorwa, byishyize hamwe ngo bihanagureho u Rwanda rwa Rujugira. Igitero ibyo bihugu bine byagabye mu Rwanda, n’icyo kizwi nk’izina ry’Inzora mu mateka y’u Rwanda n’u Burundi.

Nta gushidikanya urugamba rwararemye, ingabo z’u Burundi zari zirangajwe imbere n’umwami wabo Mutaga III Sebitungwa, iz’u Bugesera zigabwe n’umwami wazo Nsoro III Nyamugeta, izo mu Gisaka zitwawe na Kimenyi IV Getura umwami w’i Gisaka, naho izo mu Ndorwa zirangajwe imbere n’umwami wazo Gahaya II Muzora.

Rujugira ubwo yigiraga inama z’uko azasakirana n’ibyo bitero akabasha kubihashya, nibwo yatekereje uburyo ibyo bihugu byishyize hamwe bifite amaboko, asanga bizanyukanyuka abaturage be ntihagire n’usigara wo kubara inkuru, imyaka yabo n’amatungo, bikanyagwa buheriheri.

Ni uko yigira inama ati “Mu Rwanda nta kibuga gihari cyo kurwaniramo ngo batwangirize igihugu, abaturage n’umutungo tumaze kugeraho, reka biriya bihugu tubitange ku nkiko zabyo n’u Rwanda, azabe ariho urugamba ruremera, icyo gihe kandi tuzabahashya tubaganisha mu bihugu byabo kuko tuzaba turi hafi neza y’Inteko zabo n’u Rwanda, bizatworohera no kwambuka tujya mu bihugu byabo, bityo tuzaba twirinze ko hari ibyacu byakwangirika n’abaturage bacu bakahasiga ubuzina”.

Rujugira afata umugambi wo gushyira ingerero z’ingabo nyinshi ku nkiko z’u Rwanda na Ndorwa mu Majyaruguru, ku nkiko z’u Rwanda n’i Gisaka mu Burasirazuba no ku nkiko z’u Rwanda n’u Bugesera mu Majyepfo y’Iburasirazuba n’u Burundi mu Majyepfo. Nyinshi mu ngabo z’Abarundi, zari zikambitse ku mugezi witwa Rwantambi, ahari hateganye n’urugerero rwa Nyaruteja ku ngabo z’u Rwanda mu majyepfo y’igihugu.

Ku rugamba rw’injyanamuntu rutari rworoshye na hato, Cyilima Rujugira afashijwe n’umuhungu we Ndabarasa waje no kumuzungura ku ngoma, wari umugaba w’ingabo za se zirimo: Abadahemuka, Ababanda, Indilira, Abalima, Indara, Imvejuru, yabashije kwanamiza ibyo bitero arabitsinda. Abami b’ibyo bihugu bose uko ari bane, babigwamo, igihugu cya Ndorwa cyo gikurizaho guhanagurwa burundu, ubutaka bwacyo bwomekwa ku Rwanda.

Abo mu ngabo z’u Burundi zarokotse ibyo bitero, zajyaga zicarara zikaganira, ari nako zisubira mu mateka y’ibitero byabo ku Rwanda n’uko byabatwariye umwami wabo Nsoro Nyamugeta akabigwamo. Rimwe umwe yateruye avuga ibigwi by’ingabo z’u Rwanda n’uburyo zabagushije ruhabo bagakwirwa imishwararo, mu gusoza aterura ijambo agira ati “U Rwanda rwadukuye umutima, na n’ubu nturasubira mu bitereko!”

Uwo baganiraga, amusubiza atangara agira ati “u Rwanda, uwo rutakuye umutima, ni uko ntawo yari afite’’.

Iyo mvugo y’ikuzo ry’u Rwanda ku bihugu byari bituranye narwo, yogera hose, iba kimomo n’ikiganiro kuri bose.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza