Inkomoko y’Insigamugani “Barapfa iz’imibaya”

Yanditswe na Nsanzabera Jean de Dieu
Kuya 7 Kamena 2019 saa 05:13
Yasuwe :
0 0

Uwo mugani bawuca bahinyura abantu bahayurana bapfa icyo badafite cyangwa ikitabafitiye akamaro; ni bwo bavuga ngo “Barapfa iz’imibaya”. Byakomotse ku mutwa wari utuye i Gihogwe na Gihembe h’i Musambira mu nduga ya ruguru, (Gitarama); ku ngoma zo hambere.

Muri iyo mpugu, higeze gutera inzara, umwe mu batwa b’aho asuhukana na nyina n’umugore we n’abana babo, bagenda berekeje iyo mu Kabagari.

Bahamaze iminsi umwe mu bana babo arwara amacinya. Babwira se ko amacinya avurwa n’amata. Umutwa ajya kuyasaba mu batunzi, barayamuha ayazanira umwana aranywa, ariko biba iby’ubusa yanga gufuma. Umutwa ashira ubute akomeza kuyasaba, kugeza igihe bamwinubiye barayamwima, aho agiye kuyasaba bakamwaka ikibindi.

Bamaze kumushwishuriza yemera guteba ibibindi, kugira ngo bakunde bayamuhe. Akomeza kubiteba, ariko biba iby’ubusa umwana yanga gukira arirenga arapfa.

Amaze gupfa, nyirakuru w’uwo mwana abwira umuhungu we ati “Ino hatuguye nabi, none uko ndora ikiruta n’uko twasubira iwacu i Gihogwe tugasanga bene wacu”. Umuhungu aremera basubirayo. Bahageze basanga harakize inzara. Basubira mu byari ibyabo. Babumba inkono bagura ibishyimbo; n’ibijumba n’amasaka.

Bamaze kugira amasaka menshi barinika, amamera; amaze kuma barasya benga amarwa. Amaze gushya umugore ayamurikira umugabo we. Bemeranya kuyanywa nimugoroba bihereye, byo gukumira abavumbyi.

Nuko bugorobye bose bateranira ku marwa yabo baranywa baraganira. Ibiganiro bimaze kurimbanya, bibuka ibyago bagiriye mu Kabagari. Nyina, ati “Muribuka uko ya mata twaseheye nyakwigendera yaduhaze urukuru” Umuhungu we ati “Hora wibinyibutsa!”

Abwira umugore we ati “Mbega urabizi ! Kuva ubu ngiye kujya njya mu ibumba nditunde ndikwegereze ujye ubumba ibibindi tubigure ibishyimbo, na njye hagati aho njye njya guca umubaya nkeneke umunyu w’ingasire na wo tuwugure ibishyimbo, maze nibimara kugwira, tubigure amasuka, nagwira tuzayagure ihene tuzorore, nizigwira tuzigure ikimasa tukirere, nikimara kuba igisore tukigwatirize inyana tuyiragire neza, abana banjye bayikuranwe ye gukena, nimara kuba indinzi tuyibangurire imfizi nziza, maze nijya kubyara, mama azajye ayikama kane na we uyikame kabiri abana banywe amata, maze tuzarebane n’abatunzi twatebeye ibibindi byacu ku busa”.

Umugore abyumvise atyo ati “ashwi ! Ndakambura data ntabwo nyoko yayikama kane ngo nyikame kabiri kandi ari jye wayiruhiye mbumba inkono abana banjye birirwa ku nkuba y’izuba nyiragiye’. Umugabo ati “Ubwo wanze ibyo ngutegetse noneho umukecuru azayiharire”.

Ubwo baratangira batera hejuru bararwana. Abaturanyi barahurura baza kubakiza. Bababajije icyo bapfuye babibasubiriramo. Bumvise intandaro y’uwo murwano barabaseka, bati “Ntimuraca n’umubaya, ntimurasumba inkono, none inka ni yo ibatanze kugera mu rugo? Barikubura baragenda. Abo bahuye na bo bitabiriye iyo nduru bakababaza bati “Induru twumvise ni bwoko ki ?” Abandi bati “Ni kwa wa mutwa bapfa iz’imibaya!”.

Kuva ubwo abantu babigira urwenya mu biganiro, babona abahayurana bose bapfa ubusa bakabagereranya n’abo batwa, bati ‘Barapfa iz’imibaya (inka)”.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza