Inkomoko y’Insigamugani “Aratayanjwa”

Yanditswe na Nsanzabera Jean de Dieu
Kuya 25 Nzeri 2019 saa 07:45
Yasuwe :
0 0

Uyu mugani uvugwa kenshi, bawuca iyo babonye umuntu uteshagurika mu bitandampaka kandi ahunga ibimuriho; ni bwo bavuga ngo “Aratayanjwa” (arata Yanjwa).

Wakomotse kuri Kidende cya Mugema w’i Gabiro mu Mutara (Byumba); ahasaga umwaka w’i 1700.

Ubwo hari ku ngoma ya Kigeli Ndabarasa, hakaba umuhungu witwa Yanjwa rya Kidende cya Mugema wa Gahurira ka Tene rya Kinimba, bakaba abanyiginya b’Abaganzu; kavukire kabo hari i Gabiro.

Bukeye uwo Kidende Ndabarasa amugabira Nyantango, atura ahitwa i Nzaratsi kwa Cyubaka. Cyubaka uwo yari umwe mu bakungu bo mu Nyantango, akaba umubanda wo kwa Mashira ya Nkuba ya Sabugabo watwaraga i Nduga ku ngoma ya Mibambwe Sekarongoro.

Aho Kidende amariye kugabana ubutaka n’inka mu Nyantango, bose baramuyoboka; batanga amakoro bararunda, mbese arahakomera aranezerwa.

Bukeye Cyubaka bimurya mu nda arigomeka; akoranya bene wabo n’abaturanyi be, arababwira, ati “Koko muremeye dutwarwe n’umunyamahanga waturutse mu Mutara ?” Abo mu Nyantango barisamira hejuru; bemeza ko ari we mutware wabo. Bamaze kumwemera no kumuyoboka atera Kidende bararwana. Abarwanaga kuri Kidende barasumbirizwa bareguka; abura uko agira arahunga.

Mu ihunga rye, wa mwana we Yanjwa yari ingaragu amwomaho barihishana. Bigeze aho Yanjwa ubwoba buramuturagiza. Kidende abonye ko umuhungu we ari bumufatishe ashaka kumwihisha, atangira gutataba. Aho yikinze Yanjwa akahamukurikira, aho ageze Yanjwa akaba arahashinze. Kidende ageze aho akuramo ariruka.

Yanjwa amwoma mu nyuma; abo mu Nyantango barababona babirukaho. Kidende n’umuhungu we barabasiga. Aho bigeze ariko na bo baratatana; Kidende yibeta Yanjwa aramusiga; akabuza amasigamana ahungira kwa Ndabarasa. Agezeyo amutekerereza uko Nyantango yamugenje; ati “Cyubaka yamariye ingabo, ndetse n’umwana wanjye Yanjwa yaziguyemo rugikubita.” Ndabarasa ararakara, ahuta agera ingabo zo gutera Cyubaka. Ubwo yari i Munyaga h’i Rwamagana mu Buganza.

Nuko ingabo zitera Cyubaka bararwana; iza Cyubaka ziranesha. Ndabarasa ntiyashirwa yongera gukoranya ingabo ubwa kabiri; ziratera barwana inkundura. Noneho iza Cyubaka ziraneshwa. Cyubaka arafatwa, abakomeye baho baracika. Inka zo mu Nyantango ziranyagwa bazijyana i Gabiro. Ndabarasa azigabanya ingabo zaharwanye ziba ingororano zazo aziraza n’inkera ukwezi kwose.

Nibwo umusizi witwaga Musare yatuye igisigo gifite imivugo myinshi irimo ibiri isobanura icyo gitero cyo mu Nyantango. Umwe hari aho uvuga ngo “Mu Kiberabagore (Nyantango) barimutse iwa Miganda (Cyubaka)” ari ukuvuga ko abari mu Nyantango barwaniraga Cyubaka bamwegutseho. Uwa kabiri, uti “Izo Misakura (Ndabarasa) yanyaze i Busabanabagore (Nzaratsi) arazabiza ku Kiberabasabyi (i Gabiro)”, ari ukuvuga ko inka Ndabarasa yanyaze i Nzaratsi yazijyanye i Gabiro.

Kwa kundi rero Kidende yagize ubwoba bw’uko umuhungu we yamufatisha bigatuma amwibeta, yanagera kwa Ndabarasa akamubwira amateshwa y’ibitandampaka ngo Yanjwa yarapfuye; ariko mu kanya bagira batya bakabona aradutse; rubanda babigira ibitwenge; babiseka iminsi, kugeza ubwo bihindutse umugani baca iyo babonye umuntu uvuga ibiterekeranye nk’uko Kidende yabigize; cyangwa agerageza guhunga ibimuriho, bakavuga rero bamuseka, bati “Naka aratayanjwa”. Gutayanjwa (Guta Yanjwa) ni ugutarataza ay’ubusa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza