00:00:00 IGIHE NETWORK KN KINYARWANDA EN ENGLISH FR FRANCAIS

Imvano y’ubuhanzi bwa Mireille Mukakigeli wihebeye umuziki gakondo

Yanditswe na Uwiduhaye Theos
Kuya 4 May 2022 saa 08:49
Yasuwe :

Umunsi ku wundi ubuhanzi bugenda bwaguka mu buryo butandukanye. By’umwihariko mu bijyanye no kuririmba havuka abaririmbyi benshi b’abanyempano barimo na Mukakigeri Mireille uri mu bihebeye kuririmba ariko by’umwihariko we akora umuziki gakondo.

Ni umutaramyi mu birori bitandukanye yaba mu bukwe, akaba n’umukobwa udasanzwe mu gusohora abageni mu bukwe. Ni umuririmbyi muri gakondo uhimba ibihangano, ndetse ari kwitegura gushyira hanze album y’indirimbo za gakondo.

Mu kiganiro yahaye IGIHE yavuze ko yakuze akunda umuziki ndetse ko kuva mu bwana bwe ari ikintu yiyumvagamo cyane ko se yari Intore.

Ati “Nakuze umuziki umeze nk’ikintu kintembera mu maraso kuko na data yari intore. Nawiyumvagamo cyane ariko ntarafata icyerekezo cyo kuwukora, mu mashuri yisumbuye mu 2004 ntangira kuwukora gake gake uza guhinduka umwuga, ndirimba muri Hôtel des Mille Collines.”

Yavuze ko kimwe mu bintu bimuraje ishinga ari ugutanga umusanzu kugira ngo u Rwanda rugire akarango karwo mu muziki.

Ati “Nifuza ko gakondo yacu yagera kure cyane ikarenga imbibi. Ntihinduke kuba gakondo ariko ikaba ari injyana ikoze neza ku buryo n’umuntu uyumvise amenya ko ari injyana yo mu Rwanda.”

Yavuze ko inganzo ye iza bitewe n’ibihe arimo cyangwa se ibyo abona bigezweho muri icyo gihe. Ati “Iyo ngiye guhimba indirimbo ngendera ku marangamutima cyangwa ibiriho cyangwa se imitekerereze mfite muri icyo.”

Mukakigeli yitabiriye Tusker Project Fame ariko ntiyabasha gukomeza kuko yahise arwara. Atangira umuziki yabanje gukora Jazz & Blues ariko kubera ko mu muryango w’iwabo ari abataramyi nyuma aza guhitamo kwiyegurira gakondo.

Ubu ari kwitegura gushyira hanze album ye ya mbere ariko umuziki awumazemo igihe. Yagiye asubiramo indirimbo z’abandi bahanzi ndetse ari mu baririmbye muri ‘Mo fire’ umuraperi Bac-T yahurijemo abahanzi benshi batandukanye.

Mu myaka itanu yifuza kuzaba ari umwe mu bahanzi b’indirimbo gakondo bafashe ibendera ry’u Rwanda ku ruhando mpuzamahanga. Ati “Mu myaka itanu iri imbere nifuza kuzaba ndi umwe mu bahanzi gakondo bafashe ibendera ry’u Rwanda kurusha uko biri ubu ntumirwa mu maserukiramuco akomeye n’ibitaramo mpuzamahanga.”

Amaze iminsi muri Suède, aho yatumiwe na Ambasade y’u Rwanda muri icyo gihugu. We n’umuhanzi Jules Sentore bataramiye abantu mu Mujyi wa Stockholm.

Asanzwe atoza itorero ryitwa Itetero ryo mu Bubiligi mu buryo bw’iya kure ariko ubu agiye kuritoza imbona nkubone cyane ko agiye kumara iminsi i Burayi.

Mukakigeli yihebeye injyana gakondo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .