Imiryango yahamije ubuhangange mu mateka: Igicumbi cy’Umuryango w’Umwami Yuhi Mazimpaka

Yanditswe na Nsanzabera Jean de Dieu
Kuya 4 Ugushyingo 2019 saa 12:13
Yasuwe :
0 0

Mu mateka y’abakurambere mpangarwanda, hari imiryango yagiye ihamya ibirindiro, ikavugwa cyane ku bw’ibigwi n’ibirindiro yabaga yarakoreye igihugu, hagati mu muryango mugari ikomokamo.

Muri iki gice tukaba tugiye kubimburira ku mateka y’igicumbi cy’umuryango mugari ufite inkomoko ku Mwami Yuhi Mazimpaka twifashishije igitabo “Iyororoka ry’Abanyarwanda, inkomoko y’imiryango migari ’’ dukesha Umusizi Nsanzabera Jean de Dieu, inzobere mu Busizi, Umuco n’Amateka y’u Rwanda.

Yuhi III Mazimpaka ni mwene Sekarongoro Gisanura cya Kigeli Nyamuheshera, Umunyiginya wo mu nzu y’Abaganzu na Nyamarembo ya Majinya, ukomoka mu muryango mugari w’Abakono, wategetse ahasaga mu wa 1642 kugeza mu wa 1675. Ni umwami wa 18 muri 28 bategetse u Rwanda, akaba n’umwami wa 18 mu Berekeza 34 b’umushinga wo kubaka u Rwanda, kugeza ubwo aya mateka yandikwaga. Izina rye ry’ubutwari ryari “Insarikanamakuza.’’

Umwami Yuhi Mazimpaka ni umwe mu Bami b’u Rwanda bagize inzu z’imiryango nyinshi ugereranyije n’abandi bami, akaba akurikira Ndoba na we wagize inzu z’imiryango ntabarika.

Amateka atugaragariza ko Umwami Yuhi Mazimpaka ya Gisanura, yabyaye abana benshi, biganjemo abahungu 10 barimo Rwaka, Rujugira, Nyarwaya, Gakomba, Mureganshuro, Gapfizi, Mukungu, Mukuku, Rushara na Bukombe.

Umuryango w’Umwami Yuhi Mazimpaka wabayemo ingabo z’ibikongote ku ngoma ye n’iy’umuhungu we Cyilima Rujugira wamuzunguye ku ngoma. Banabaye abagaba b’ingabo b’intahusha mu gihe cye. Imitwe y’Ingabo yatwarwaga n’abahungu be, irimo Indara zatwarwagwa na Mukungu wa Yuhi Mzimpaka,

Inkoramaraso: Zatwarwaga na Mukungu wa Yuhi Mazimpaka

Abashahuzi: Batwarwaga na Nyarwaya Karuretwa wa Yuhi Mazimpaka

Ababaga: Batwarwaga na Nyarwaya Karuretwa wa Yuhi Mazimpaka

Ababanda: Batwarwaga na Nyarwaya Karuretwa wa Yuhi Mazimpaka

Inkuba: Zatwarwaga na Mureganshuro ya Yuhi Mazimpaka

Abakungu: Batwarwaga na Mureganshuro ya Yuhi Mazimpaka

Abatabaga: Batwarwaga na Yuhi Mazimpaka za Gisanura

Intaremba: Zatwarwaga na Yuhi Mazimpaka ya Gisanura

Hari n’ababaye abagaba b’ingabo ku ngoma y’umuhungu we akaba n’umuvandimwe wabo Cyilima Rujugira, aribo aba bakurikira:

Abakemba: Batwarwaga na Sharangabo ya Cyilima Rujugira,

Imvejuru: Zatwarwaga na Sharangabo ya Cyilima Rujugira,

Indirira (Rugamba): Zatwarwaga na Muciye ya Serutaro rwa Mukuku wa Mazimpaka,

Abarima: Batwarwaga na Mitunga ya Cyilima Rujugira n’umugabo we Seruhuga,

Abatanyagwa: Batwarwaga na Gihana cya Cyilima Rujugira,

Intarindwa: Zatwarwaga na Ndabarasa ba Cyilima Rujugira,

Ababito: Batwarwaga na Ndabarasa ba Cyilima Rujugira,

Indara: Zatwarwaga na Cyilima Rujugira rwa Yuhi Mazimpaka,

Ababanda: Batwarwaga na Cyilima Rujugira rwa Yuhi Mazimpaka

Aba bagabo b’Intarumikwa, ni bo babaye inkomoko y’inzu z’imiryango zo kwa
Mazimpaka zikomoka mu muryango mugari w’Abanyiginya. Inzu z’imiryango zikomoka kwa Yuhi Mazimpaka ni izi zikurikira:

Abanyiginya b’ABAKA bakomoka kuri Karemera Rwaka rwa Yuhi Mazimpaka

Abanyiginya b’ABAYA bakomoka kuri Nyarwaya rwa Yuhi Mazimpaka;

Abanyiginya b’ABASIGAYE bakomoka kuri Nsigaye ya Gakombe ka Yuhi Mazimpaka;

Abanyiginya b’Abahwege bakomoka kuri Segahwege ka Nsigaye ya Gakombe ka Yuhi mazimpaka;

Abanyiginya b’ABAPFIZI bakomoka kuri Gapfizi ka Yuhi Mazimpaka;

Abanyiginya b’ABAREGANSHURO bakomoka kuri Mureganshuro ya Yuhi Mazimpaka;

Abanyiginya b’Abashamakokera bakomoka kuri Shamakokera ya Ndabaramiye wa Bukombe bwa Yuhi Mazimpaka;

Abanyiginya b’ABASAMANZI bakomoka kuri Rwasamanzi rwa Mukungu ya Yuhi Mazimpaka;

Abanyiginya b’Abakuku bakomoka kuri Mukuku wa Yuhi Mazimpaka;

Abanyiginya b’Abashara bakomoka kuri Rushara rwa Yuhi Mazimpaka;

Izindi nzu zihamye mu mateka y’u Rwanda zikomoka kwa Yuhi Mazimpaka, harimo n’izo kwa Cyilima Rujugira umuhungu we w’ubuheta wabaye umwami wa Rubanda akamuzungura ku ngoma. Inzu zimukomokaho zirimo Abanyiginya b’Abadenge bakomoka kuri Mudenge wa Cyilima Rujugira;

Abanyiginya b’Abakore bakomoka kuri Kanyankore ka Kanyoni ka Baziga ba Cyilima Rujugira;

Abanyiginya b’Abahabanyi bakomoka kuri Bihabanyi bya Gashikazi ka Cyilima Rujugira;

Abanyiginya b’Abamo bakomoka kuri Rwamo rwa Gihana cya Cyilima Rujugira;

Abanyiginya b’Abanana bakomoka kuri Munana wa Gihana cya Cyilima Rujugira;

Abanyigiya b’Abasharangabo bakomoka kuri Sharangabo ya Cyilima Rujugira.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza