Ibigwi n’ibirindiro: Amateka n’ibigwi by’inka mu Rwanda ( Igice cya mbere)

Yanditswe na Nsanzabera Jean de Dieu
Kuya 5 Ukuboza 2019 saa 12:57
Yasuwe :
0 0

Abatekereza b’amateka y’u Rwanda n’abayatekererezwa, bakunze gutangaza byinshi ku mateka y’ibigwi by’inka mu Rwanda rugari rwa Gasabo, inka yafatiweho ibintu byinshi mu mateka y’u Rwanda no mu ruhando mpuzamahanga.

Muri iki gice tugiye kubavunguriraho gato ku bigwi n’ibirindiro by’amateka y’ibigwi by’inka mu Rwanda, dore ko utabikuyeho akamanyu nibura gato gato, utashobora kubiva imuzi ngo ubigere imuzingo.

Nk’uko tubikesha igitabo “Intwari z’imbanza, zubatse u Rwanda rugahamya igitinyiro’’ cyanditswe n’Umusizi Nsanzabera Jean de Dieu, inzobere ku Muco, ubusizi n’amateka, tubimburiye ku iyinjira ry’inka mu Rwanda n’uko zatejwe imbere zikaba urufatiro rukomeye rw’ibintu byinshi mu mateka.

Inka ifite ibisekuruza byinshi mu mateka y’Afurika, aho bisaga imyaka 3000. Inka zahanganywe n’u Rwanda, aho zadukanywe n’Abasangwabutaka b’Abasinga n’Abazigaba ahasaga mu wa 300.

Abanyiginya bahasesekaye, bateje imbere cyane ubworozi bw’inka bituma inka zose zo mu gihugu bazitirirwa, aho mu mateka bagira bati “Gihanga niwe wahanze inka n’ingoma’’ . Bikomoye ku kuba Abanyiginya aribo bahaye intera ndende n’urwego rw’ikirenga ubworozi bw’inka, ziba nyinshi mu gihugu.

Inka yahawe intera iyingayinga iy’umuntu. Aho mu Bucurabwenge bw’inka, bagiraga bati “Inka ni imfura, kuko upfa ikakurerera, wabumbira ( wabura amashereka) ikakugoboka, ikakurwanyiriza indwara z’ibyorezo n’ubujyahabi”.

Inka niyo yarangaga ubukire, Inka niyo yari ipfundo ry’ubuhake nk’akazi ko hambere, Intwari yo ku rugamba yagororerwaga inka, Inka yungaga inshuti, Inka yahuzaga inshuti (abahanaga inka, babaga babaye inshuti ), Inka bayikwaga umugeni nk’ikimenyetso cy’uburere bwiza.

Mu Kinyejana cya Munani nyuma ya Yezu, ni ukuvuga ahasaga mu wa 700, nibwo hadutse ishyanga rishya mu Rwanda, ari ryo ryaje kuvamo umuryango mugari w’Abanyiginya, baza n’ubundi, bagowe n’iyimukayimuka ryabo n’umutungo wabo urangajwe imbere n’inka bagendaga bashakira inzuri zitoshye kandi ngari.

Mu gusesekara mu Rwanda, binjiriye bwa mbere mu Gihugu cy’u Rweya rw’u Mubali ( mu mirenge ya Murundi na Mwili yo mu Karere ka Kayonza na Rwimbogo yo mu Karere ka Gatsibo). Kuko ubutaka bubereye ubworozi bw’inka zabo bari babugezeho, bishimiye umukenke w’Iburasirazuba bw’u Rwanda, ugaragiwe n’ubutohe bw’umurambi w’ubutaka bwiganjemo icyogogo cy’uruzi rw’Akagera, ibiyaga bya Rwanyakiziga, Nasho, Ihema n’ibindi.

Imyaka isaga 300(700-1091), umuryango mugari w’Abanyiginya wamaze mu busembere mu ngoma y’u Rweya rw’Abazigaba, nta kindi cyera cyangwa se cyirabura bakoze, usibye guteza imbere ubworozi bw’inka, bakora ubugenge n’ubuhanga bwo kuzibangurira kugira ngo zirusheho kororoka, maze nazo zirabakundira ziroroka karahava!! Aha akaba ari naho, bakuye umwihariko w’inka zitirirwa u Rwanda z’Inyambo aribyo bivuga “Itungo ry’intoranywa’’.

Imisozi yose bacumbikiwemo, yari yiganjemo inzuri z’inka, aho gutura ari hato, ku buryo aribo ba mbere bateje imbere gutura mu nsisiro mu rwego rwo kurinda akajagari mu miturire byari kugabanya ingano y’inzuri z’inka zabo.

Mu misozi batuyemo myinshi kuri ubu ibarizwa mu Karere ka Gatsibo ¾ byayo byari inzuri z’inka. Muri yo twavuga Imisozi ya Nyagihanga, Rugarama, Ngarama, Kabarore, Gitoki, Gatsibo na Kageyo

Imisozi batuyemo muri ibyo bihe, ari nayo baremyemo insisiro, ni mu mu Murenge wa Remera na Muhura yo mu Karere ka Gatsibo.

Uko imyaka yashiraga indi igataha, niko Abanyiginya barushagaho guteza imbere ubworozi bw’inka, ari nako butuma bagira ijambo ry’icyizerabuhake mu Rweya, kugeza ubwo byabahesheje ijambo mu nzu y’ubwami bwabo, banashakamo abagore b’ibikomangoma. Muri bo twavuga nka Nyirarukangaga rwa Nyamigezi ya Kabeja, washatswe na Kazi ka Kizira, bakabyarana Gihanga.

Inka zamye ari inkingi y'ubukungu n'imibereho y'abanyarwanda bo hambere

Abanyiginya bakomeje kugwiza ubutunzi bw’inka, amashyo n’amagana, bibaha imbaraga n’icyubahiro cy’ikirenga, kugeza ubwo ibwami batangiye kubakeka amababa ko bashobora kuzabambura ingoma, ari nabwo Gihanga yabimenyaga agashyira nzira akabahunga ajya guhanga igihugu cye mu bisigara by’ubutaka Abasangwabutaka banennye, akabuhangaho igihugu cy’i Gasabo.

Gihanga, akimara guhanga Gasabo, Umuryango mugari w’Abanyiginya akomokamo akawukura mu busembere mu ngoma y’u Rweya, yashyizeho igenamigambi ryeruye rishingiye ku nka mu kubaka igihugu cye. Inka ihabwa umwanya ukomeye mu buzima bwose bw’igihugu, aho yifashishwaga muri Politiki z’igihugu zitandukanye nko mu Bubanyi n’amahanga, mu kubaka ubukungu bw’igihugu, mu mutekano no mu ntambara zo kwigarurira amahanga, mu mibereho myiza y’abaturage, mu mibanire n’ubumwe bw’abenegihugu n’ibindi.

Inka yayishyize mu igamigambi ry’ ububanyi n’amahanga n’ubutwererane n’abami b’ibindi bihugu bituranyi by’u Rwanda ku buryo yagombaga guhuza u Rwanda n’ibihugu by’inshuti kandi ikagabirwa abami b’ ibihugu byanga u Rwanda, bityo bikagabanya urwango, ubundi rukabasha gukora ibikorwa by’iterambere rwifuza.

Inka yabaye inkingi ya mwamba yo kurwanya umwanzi w’imbere mu gihugu. Umwanzi w’imbere mu gihugu, burya ni ubukene. Iyo umunyarwanda atakennye, nta nabi agira, kandi umwanzi wo hanze y’igihugu ntiyabona aho yinjirira, kuko uwakamubereye icyitso wo mu gihugu hagati, baba baramugushije ruhabo. Nuko Gihanga, agena gahunda zo kugabira abaturage inka ku buntu, kugira ngo biteze imbere, ubundi amahoro ahinde mu miryango yabo.

Inka yashyizwe mu rwego rwo gufasha igihugu mu kugera ku mutekano n’intwaro yo guhashya amahanga adakunda u Rwanda. Niho Gihanga, yahereyeho ashyiraho gahunda yo kugabira inka Ingabo zose z’igihugu, kugira ngo zirusheho kwitabira intambara zo kwivuna abanzi, no kugira imbaduko ku rugamba rwo kwagura igihugu.

Inka yafatiweho umurongo mugari wo kwigarurira imitima y’abaturage b’ibindi bihugu u Rwanda rwashakaga kwigarurira. Aho buri muturage u Rwanda rwabaga rwanyaze mu bitero byo kurwagura, yahabwaga inka nyinshi zo korora zikamufasha kwikura mu bukene, bityo akinjira muri Paradizo nshya y’igihugu cy’u Rwanda, irimo amata n’ubuki, umutima akawukura kuri gakondo y’iwabo, akaganza i Rwanda.

Gahunda yo kugabira abaturage b’ibindi bihugu banyazwe n’u Rwanda, yatumye benshi mu baturage batoroka ibihugu byabo, biyizira mu Rwanda, bahabwa inka zo korora, ubundi batangira gutanga amakuru y’imbamutima y’uburyo u Rwanda ruzigarurira ibihugu bakomokamo.

Ubukungu bw’ibihugu mu bihe byo hambere, bwari abaturage ku isonga, ubundi butunzi bugakurikiraho, ari nayo mpamvu u Rwanda, rwihatiye kwigarurira abaturage b’ibindi bihugu, rwifashishije inka.

Inyambo nizo nka za mbere zageze mu Rwanda zifasha igihugu kwaguka no gutera imbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza