Amateka adasanzwe y’Abasigari n’Indara babaye Abanyarwanda ku bw’impanuka

Yanditswe na Nsanzabera Jean de Dieu
Kuya 13 Mutarama 2020 saa 09:17
Yasuwe :
0 0

U Rwanda kuva kera na kare rwahoranye abarutuye kavukire hakaba n’abaruzagamo bashaka imibereho, bikarangira bashimye amaronko ntibazasubire iwabo.

N’uyu munsi birakorwa uretse ko bwo bica mu mategeko aho ushaka kuba umunyarwanda abisabira uruhushya yaba yujuje ibisabwa akemererwa.

Mu moko agera kuri 24 y’abanyarwanda (imiryango migari ariyo dusangamo Abazigaba, Abagesera, Abega….), harimo ayisanze yabaye abanyarwanda ku bw’impanuka, nta n’umwe muri bo wigeze abirota.

Abo barimo ubwoko bw’Abasigari n’Indara, bamwe mu bagize inzu izwi nk’Abarera bakomoka ku mukurambere wabo Murera. Ubu babaye abanyarwanda nk’abandi ariko si ko byahoze kuko babaye bo bibatunguye, bavuye mu bwami bw’u Bunyoro (muri Uganda), ubwo ubwami bwabo bwagabaga igitero ku Rwanda, rukabanesha abarokotse bakayoberwa aho baca basubira mu Bunyoro, bakaguma mu Rwanda.

Mu mwaka wa 1378, Ku ngoma y’Umwami Kigeli Mukobanya w’u Rwanda, nibwo u Bunyoro bwahawe amakuru y’intasi, ko mu Majyepfo yabwo hari igihugu cyitwa Rwanda, kirimo kubica bigacika, cyazahaje ingoma z’abami b’ibindi bihugu, ubutaka bwabo kikabwomeka ku bwacyo.

Icyo gihe u Bunyoro, bwabafashe umwanzuro wo gutera u Rwanda rwa Mukobanya kugira ngo ari bwo busigara ari igihangange muri Afurika y’Iburasirazuba.

Abanyoro nibo bayoboraga igihugu cyitwaga u Bunyoro nk’uko izina rya benigihugu ribigaragaza, kikaba cyari kimwe mu bihugu byari biherereye mu Majyaruguru y’Iburengerazuba bw’u Rwanda, kuri ubu ni mu Burengerazuba w’igihugu cya Uganda. Ni igihugu cyari cyarazengereje ibihugu bigituriye kibigira ingaruzwamuheto, ndetse cyari cyarabihatse.

Mu bihugu byari mu maboko y’u Bunyoro harimo nk’u Bugande, Bukiri, Bukede, Busogo, Toro na Nkore y’Abahima.

Ku ngoma ya Mukobanya, Abanyoro bateye igitero cya mbere, gifite umugambi wo kunesha u Rwanda, bagasigara aribo baganje. Mu gitero cya mbere cy’Abanyoro bagabye mu Rwanda, bigabanyijemo imitwe ibiri. Igitero kimwe cyamanutse mu Bugara, gica mu Ndorwa y’i Burengerazuba gihinguka mu Buliza cyambuka Nyabugogo ahari urugabano rwa Gasabo n’u Buliza, ugana i Ntora ( Ubu ni mu Murenge wa Gisozi) ahari ingoro ya Mukobanya.

Ikindi gitero cyaturutse mu Ndorwa y’Iburasirazuba, gica mu Ngoma y’u Rweya rw’u Mubali, cyambukiranya i Gisaka (mu Ntara y’Iburasirazuba ubu) gihinguka mu Bwanacyambwe, gihawe inzira n’umwami w’u Bwanacyambwe Nkuba ya Nyabakonjo. Abo nabo baje bagana ku ngoro ya Mukobanya.

Ingabo z’u Rwanda zatunguwe n’icyo gitero gikaze zirahanyanyaza ngo zirwane biranga ziraneshwa zirahunga. Abanyoro bakurikiranye Abanyarwanda, bashaka kubanyaga inka mu gihe bambukaga Nyabarongo, bagana mu Nduga. Abanyarwanda, babibonye, bashira ubwoba babifashijwemo n’ingabo z’Abanyenduga zari ziyobowe na Mashira ya Nkuba wari inshuti ya Mukobanya.

Nkuko tubikesha igitabo “Intwari z’imbanza, zubatse u Rwanda rugahamya igitinyiro’’ n’ikindi cyitwa “Iyororoka ry’Abanyarwanda, inkomoko y’imiryango migari” byombi dukesha Umusizi Nsanzabera Jean de Dieu, ingabo z’u Rwanda zimaze kwifatanya n’iz’Abanye-Nduga, bahindukiranye ingabo z’Abanyoro, barwanira ku Muganzacyaro wa Runda muri Kamonyi . Barazirwanyije bazambutsa Nyabarongo bagaruka mu Bwanacyambwe, bazamuka ku musozi wa Kigali, ari naho urugamba rwasibaniye bikomeye.

Aho urugamba rw’inkundura rwaremeye, kuri ubu ni mu Kagali ka Cyivugiza mu Murenge wa Nyamirambo, mu Kagali ka Nyakabanda II ( cyane cyane ahubatse Stade) no mu Mudugudu wa Akanyamirambo mu Kagali ka Rwesero mu Murenge wa Kigali, yose yo mu Karere ka Nyarugenge.

Ingabo z’u Rwanda zihageze, zacunshumuye iz’abanyoro, zirabica cyane izihonotse zirayoba zibura aho zaje zituruka.

Abanyoro bamaze gutsindwa mu gitero cya mbere, baragiye bitegura ikindi gitero cya Kabiri bagabye ahasaga mu wa 1411 ku ngoma ya Mibambwe Sekarongoro ka Mukobanya. Icyo gitero cya Kabiri cy’Abanyoro cyari kirangajwe imbere n’umuhungu wa Nyabwongo II Buhemu, ariwe bakunze kwita mu mateka :’’ Cwa Rya Nyabwongo”, wari ufite izina ry’ubwami rya ’’ Cwa I Cwamwali’’.

Se wa Cwa ari we Nyabwongo II Buhemu, yari yaraguye mu gitero cya mbere Abanyoro bagabye ku Rwanda mu bihe by’ingoma ya Kigeli Mukobanya. Bagarutse barangajwe imbere n’umuhungu we, baje kwihimura kuri Sekarongoro se Mukobanya, yari yarishe ingabo z’Abanyoro nyinshi.

Muri icyo gitero cya kabiri, Abanyoro bazanye zimwe mu ngabo z’ibihugu byari ibituranyi by’u Bunyoro birimo n’ibyo bwari bwaragize ingaruzwamuheto, ngo bize bibufashe kuza kwikiza u Rwanda. Izo ngabo z’ibyo bihugu zarikusanyije ziyongereyeho n’iz’Abanyoro, zishyika umubare usaga Ibihumbi icumi mu gihe iz’u Rwanda zageraga ku bihumbi bine.

Muri icyo gitero bagabye, batsinzwe uruhenu nk’uko tuzabibona mu gice gikurikira, abasigaye barayoba bayoberwa aho baturutse baza kwisanga baraheze mu Rwanda. Mu bwoko bwasigaye mu Rwanda harimo Abasigari n’Indara, bakunze kwita Abasigi ari nabo bibumbiye mu nzu yitwa ‘Abarera’ bakomoka kuri Murera.

Mu nkuru zikurikiyeho, tuzabatekerereza imigendekere y’igitero cya Kabiri cy’Abanyoro, ari nacyo cyabaye inkomoko y’Abasigari n’Indara.

Abasigari n'Indara ni bumwe mu bwoko bwabaye Abanyarwanda kubw'impanuka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .