00:00:00 IGIHE NETWORK KN KINYARWANDA EN ENGLISH FR FRANCAIS

Yandikiwe ibaruwa na Habyarimana, yise Misa ubufindo arahamagazwa: Ikiganiro na Damien Rwegera

Yanditswe na Karirima A. Ngarambe
Kuya 20 January 2022 saa 03:48
Yasuwe :

Damien Rwegera ni umwe mu bahanga u Rwanda rwagize mu bumenyamuntu (Anthropologie) n’imibanire y’abantu (sociologie), abiherwa impamyabumenyi mu ba mbere, ari nabyo byamuhesheje kwigisha mu mashuri yari akomeye muri Repubulika ya Kabiri.

Rwegera ni umushakashatsi ku mateka y’u Rwanda, cyane cyane kuri Jenoside yakorewe Abatutsi.

Ubwo yari avuye kuminuza mu by’ubumenyamuntu mu Bufaransa mu myaka ya 1980, yahawe akazi muri Kaminuza y’u Rwanda, Seminari ya Nyakibanda no mu Ishuri Rikuru rya Gisirikare (École Supérieure Militaire, ESM) ari naho yaboneye ubukana bw’ivanguramoko ryari riganje muri iyo Leta, ko Umututsi atagomba kwakirwa nk’abandi mu mashuri nk’ayo akomeye.

Mu kiganiro cyihariye yagiranye na IGIHE, Rwegera yavuze ko byari ibihe bikomeye kwigisha mu mashuri nk’ayo akomeye kandi yajyagamo indobanure.

Perezida Habyarimana ni we wamutumyeho mu ibaruwa y’akazi

Uko byari bimeze icyo gihe, kubera ko yari Umututsi, ntabwo yagombaga kwigisha muri ESM kuko yari amashuri yigishwamo n’Abahutu cyangwa abanyamahanga.

Kutamumenya byatumye bamwibeshyaho kandi ari na we Munyarwanda rukumbi wari ufite impamyabumenyi ihanitse muri Anthropologie.

Rwegera yagize ati “Mvuye kwiga mu Bufaransa 1980, nigishije muri Kaminuza y’u Rwanda, noneho muri 1983 mu Nyakibanda no mu Ishuri Rikuru rya Gisirikare ryari i Kigali bantumaho ngo nze kubigishiriza abanyeshuri.”

“Ndabyibuka nabonye urwandiko ruturutse kwa Perezida Habyarimana, rumbwira ko mpamagariwe kujya gutangira kwigisha muri ESM. Ni ibintu byantunguye kuko nko mu Iseminari Nkuru ya Nyakibanda higishaga Abapadiri gusa ariko icyo gihe bari batangiye gushyiramo abarimu bo muri Kaminuza y’u Rwanda.”

Akigera muri ESM, Rwegera avuga ko yatunguwe no kuhasanga irondamoko rikomeye kuko nta Mututsi cyangwa Umunya-Nduga wahigishaga. Abarimu bari Abahutu bo mu Majyaruguru cyangwa Abasirikare b’Abafaransa n’Ababiligi.

ESM ni ishuri ryatangijwe n’umusirikare Mukuru w’Umubiligi Col Guy Logiest. Yageze mu Rwanda mu Ugushyingo 1959 avuye muri Congo, asanga mu Rwanda hatangiye imvururu Abatutsi bari kumeneshwa, abandi bari kwicwa.

Rwegera avuga ko Logiest ageze mu Rwanda yabaye umunyabubasha, ndetse aba ari we uyobora ibikorwa byo gutwikira no kwica abatutsi, ashyigikiye Parmehutu n’abayoboke bayo.

Yavuze ko ikintu cya mbere Col. Guy Logiest yakoze ari ukwirukana Abatutsi b’Abatware, bamwe barafungwa abandi barirukanwa.

Ati “ Ni we wazanye icyo yise Guerre Révolutionnaire, intambara mpinduramatwara hakoreshejwe abaturage, akaba ari we wica, utwikira mugenzi we bari baturanye, ngo babyita kwirwanaho.”

Mu gihe hari inkundura yo guha ubwigenge ibihugu birimo u Rwanda, nibwo Logiest yatangije ishuri rya ESM kugira ngo Abanyarwanda batangire gutozwa igisirikare ku rwego rwisumbuye.

Mu bize bwa mbere muri iryo shuri rya gisirikare, harimo Habyarimana Juvénal waje kuba Perezida nyuma yo guhirika Grégoire Kayibanda mu 1973.

Mu mabwiriza Logiest yari yarashyizeho, ngo harimo ko abagomba kwiga muri ESM bagombaga kuba baturuka mu bice by’Amajyaruguru kuko ari bo bafatwaga nk’Abahutu buzuye kandi ngo bakagira ibigango.

Avuga ku byigishwaga muri ESM, Rwegera yagize ati “Biza guhinduka rero mu 1982, ESM yigishaga imyaka ibiri n’igice umuntu akarangiza ari Sous Lieutenant, batekereza kongera ikaba ine ikajya ku rwego rwa Kaminuza, amasomo ya Gisirikare akaba yari 37%, andi yose asigaye agafata 48%, hakabaho no kwandika igitabo gisoza ESM.”

Yakomeje agira ati “Ndibuka ko rwose muri ESM hari isomo ryo kwiga Coup d’Etat, uko bahirika ubutegetsi. Ndibutsa ko abakoze Coup d’Etat bakuraho Perezida Kayibanda ari itsinda ryize muri ESM kandi abenshi bari bavuye mu Iseminari Nkuru ya Nyakibanda. Ibyo byose babifashijwemo n’Ababiligi n’Abafaransa kugira ngo birinde umwanzi wari Umututsi wari hanze, biza bijyanye n’ibyo Col. Gy Logiest yasize abibye avuga ko ntawe uvanga ubwoko nk’uko ntawe uvanga divayi n’amazi.”

Rwegera avuga ko ESM yatangiye irimo Umututsi umwe ari we Epimaque Ruhashya.

Yavuze ko na we kugira ngo bamwemere nk’umwarimu kandi ari Umututsi ari uko batamenye inkomoko ye.

Ati “Undi wari uhari ni Gahigi Gerard yari yarirukanywe na Gashegu Dismas wayoboraga Kaminuza icyo gihe kubera amacakubiri yari yaratangiye i Ruhande. Byaje no gutera amashyari kuko nigishaga Kaminuza, ESM na Seminari Nkuru ariko byari amaburakindi ntihagira umpagarika.”

Ubwo yigishaga muri ESM, Rwegera abanyeshuri bamuhishuriye ko bahawe itegeko ryo kudashaka abagore b’abatutsikazi.

Nk’inzobere mu bumenyamuntu, abanyeshuri bamubajije ikibi cyo gushakana mu moko y’Abanyarwanda, ababwira ko ntacyo bitwaye ahubwo ari ivangura ryazanywe na Leta.

Byageze aho bamurega ko yabigishije ibyo babujijwe, atumizwa kwa Col. Buregeya wayoboraga ESM, nibwo asobanuye ko yigishije Anthropologie, amwereka neza uko byabajijwe n’ingero yabahaye birangira Buregeya abishimye ko ahubwo yazaza kubyigisha abandi basirikare bakuru akanamushyira Perezida Habyarimana. Rwegera avuga ko yagiye abica ku ruhande birangira atagiyeyo.

Yigishije ko Misa ari magie (ubufindo) ahamagazwa kwa Musenyeri

Mu iseminari Nkuru ya Nyakibanda ni hamwe muho Rwegera yigishije avuye kwiga mu Bufaransa. Nk’uko Rwegera abivuga iyi ni yo Seminari ya kera mu Rwanda kuko muri Gashyantare 1900, ari bwo Abazungu bageze ku Mwami Musinga abohereza i Save.

Nyuma y’imyaka 12 nibwo Seminari Nkuru yavuye ahitwa Rubya muri Tanzania bayizana i Kabgayi ari na ho hatangiwe ubupadiri ku Banyarwanda ba mbere barimo Donat Rebero mu 1917.

Mu mwaka wa 1935 ni bwo Seminari Nkuru yavuye i Kabgayi ijya mu Nyakibanda, yigamo abavuye i Burundi, u Rwanda na Congo muri Bukavu.

Rwegera yatangiye kwigisha mu Nyakibanda mu 1984, ahamara imyaka itanu. Kumutoranya ngo atangire kwigisha na byo byabaye ihurizo kuko abapadiri bamwe bari babyanze, bavuga ko batajya bamubona mu Misa.

Ati “Abapadiri bagiye mu nama baravuga bati ‘tugiye kuzana Rwegera yigishe Anthropologie’, abandi bati ariko ko turamubona mu misa i Butare aho ntiyaba ari Umushenzi w’Umupagani? Abandi bati ‘niwe Anthropologie dufite wenyine kandi bavuga ko abifitemo ubuhanga.”

Rwegera avuga ko muri ESM hari harimo irondamoko rikomeye, dore ko no kwemera ko ajya kwigishamo byabanje kugorana

Amaze gutangira kwigisha mu Nyakibanda, Rwegera yigishije abanyeshuri ko igitambo cya Misa ari nka ‘Magie’ cyangwa se ‘ubufindo’.

Byose yabyigishaga agereranya imyemerere Abanyarwanda bahoranye mbere y’umwaduko w’abakoloni, kugira ngo abategura kuba abapadiri bamenye neza aho u Rwanda ruva n’aho rugana.

Ati “Mu Iseminari Nkuru nabigishije ko Magie ishingiye ku kintu kigaragara uvugiraho amagambo kandi ya magambo akaba ari amwe, kigahinduka ikindi, ikintu cy’indengakamere, kigahinduka ikintu kijyana. Ubyumva cyangwa ubikurikira agomba kuba yemera ayo mahame urimo.”

Rwegera avuga ko impamvu yigishaga ibyo, ari uko Abapadiri Bera baje bavuga ko imigenzo n’imihango ya Kinyarwanda ari ibya gipagani na shitani.

Ati “Ibi rero byari ngombwa kubyigisha kuko umupadiri urangije yashoboraga guhura na byo nko mu ntebe ya penetensiya aho umukirisitu abimubwira mu byo yirega undi akamenya uko abyitwaramo.”

Yakomeje agira ati “Ndababwira nti buriya Misa ni magie, munyumve neza kuko uwemera we ntabibonamo ubufindo, ariko muri Anthropologie, Ubumenyamuntu niko bimeze. Biba rero magie cyangwa ubufindo igihe Padiri azamuye Hositiya avuga ati ‘uyu ni umubiri wanjye, yazamura karisa irimo Divayi ati aya ni amaraso yanjye”.

“icyo gihe rero wa Mugati na Divayi bihinduka umubiri n’amaraso ya Yezu, Abakirisitu bakaza guhazwa kugira ngo bazakire bajye mu ijuru. Ndababwira rero nti ‘ibyo muri Anthropologie, Ubumenyamuntu iyo ni Magie, ni Ubufindo.”

Rwegera yavuze ko ntaho bitaniye no guterekera, aho ababikora bagenda bavuga ngo “seka seka”, ati “ubwo aba yinjiye mu kiganiro n’umukurambere kandi akaba azi koko ahari aho ngaho akanamwibuka, ni kimwe rero, utabyemera ni magie, ubufindo, ubyemera ni ukuri kwe kujyanye n’imyemerere.”

Abafaratiri bamaze kwigishwa ko Misa ari ubufindo, babigejeje kuri Musenyeri Misago wayoboraga Seminari Nkuru ya Nyakibanda. Rwegera yarahamagajwe kwa Musenyeri ngo asobanure ibyo yigishije abihayimana.

Ati “Musenyeri arampamagaza ndabimusobanurira, amaze kubyumva ati ‘ahubwo wagize neza kuko uri kubafasha kuzaca mu nzira z’inzitane bazahura na zo babaye abapadiri.”

Nubwo mu iseminari bateruraga ngo bigishe irondamoko ku mugaragaro, Rwegera avuga ko babyigishwaga mu bundi buryo.

Ati “Mu i Seminari Nkuru nubwo batigishaga iby’amoko ariko babacengezagamo mu bundi buryo ayo matwara kugira ngo bayamenye kuko hari ibintu bigomba guhinduka.”

Rwegera avuga ko guhera mu myaka ya 1960 ubwo mu Rwanda hatangiraga imvururu z’amoko muri Politiki, abenshi babigizemo uruhare ni abavuye mu i Seminari, ndetse n’abize muri ESM.

Nko muri Kiliziya Gatolika, iby’ivangura muri za seminari byashimangiwe cyane na Musenyeri Vincent Nsengiyumva wari Arkipeyiskopi wa Kigali wari no mu bagize komite nyobozi y’ishyaka MRND.

Ikiganiro kirambuye muri Video:

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .