Urugamba rw’injyanamuntu rwa Rwabugili, mu gitero cy’Imigogo cyigishije Abanyarwanda uburyo bushya bwo kurwana

Yanditswe na Nsanzabera Jean de Dieu
Kuya 27 Mutarama 2020 saa 11:49
Yasuwe :
0 0

Mu bami bayoboye u Rwanda, iyo bigeze kuri Kigeli Rwabugili buri wese aca akarongo kuko ni umwe mu bami b’indwanyi kabombo u Rwanda rwagize kuva ari umwaka kugeza ku munsi we wa nyuma.

Mu bami bayoboye u Rwanda, iyo bigeze kuri Kigeli Rwabugili buri wese aca akarongo kuko ni umwe mu bami b’indwanyi kabombo u Rwanda rwagize kuva ari umwana kugeza ku munsi we wa nyuma.

Ni umwami wahuye n’ibizazane ubwo yateraga ubwami bwa Nkore muri Uganda, akagenda yitwaje imyambi n’imiheto abo agiye kurwanya asanga bitwaje imbunda maze baramurasa karahava, ingabo ze nyinshi zirahatikirira.

Uburyo yari indwanyi, yatashye agatoki agakubita ku kandi, abigira amayeri maze aza gusubirayo ahakora akantu, imbunda z’abagande zihinduka ubusa imbere y’imyambi y’abanyarwanda.

Nk’uko tubikesha igitabo “Intwari z’imbanza, zubatse u Rwanda rugahamya igitinyiro’’ cyanditswe n’Umusizi Nsanzabera Jean de Dieu, igitero Rwabugili n’ingabo ze bagabye ku Banyankore b’Abahinda ku nshuro ya kabiri, cyasize amateka ndetse cyitirirwa igitero cy’imigogo, kuko cyasize imirambo myinshi y’Abanyankole kugeza ubwo imwe bayifashisha bambuka umugezi.

Mu gitero cya mbere bagabye muri Ankole kiyobowe na Nyamuhenda wa Kajeje n’ingabo z’Ibisumizi yari atwaye, bazibiranyijwe n’amasasu n’imbunda by’Abanyankole, niko gutabaza Rwabugili aho yari mu bitero yagabye mu Burengerazuba bw’u Rwanda.

Rwabugili n’ingabo ze bitabye Nyamuhenda, ngo baze gukuraho igisuzuguriro cy’Abanyankole ku Rwanda kuko bwari ubwa mbere mu mateka Rwabugili atsindwa n’abanyankole.

Bakoranyije abaturage, abagabo n’abasore ngo bitegure bagabe ikindi gitero, bivaneho icyo gisuzuguriro.

Bakigera i Rutaraka babanje kwitoza uko bazarwana urwo rugamba, mu gihe ingabo zahasesekaye zitegereje izindi ko zihagera ngo bashoze urugamba, nibwo bitoyemo imitwe ibiri, umwe bawitirira Abanyankole, undi bawitirira Abanyarwanda. Barakirana karahava, umutwe w’Abanyarwanda utsinda uw’Abanyankole, bihita biha igihamya ko Abanyarwanda bazatsinda Abanyankole.

Mu gihe bari mu myitozo y’uko bazivugana Abanyankole, Rwabugili yari yatarabukiye mu rugo rwe rwari i Gatsibo, aho agarukiye atangira gushyiraho abagaba b’ingabo b’icyo gitero. Hatoranyijwe Nyamuhenda wa Kajeje n’Ingabo z’Ibisumizi yari akuriye nk’Umugaba wazo ngo bajye kurwana n’Abanyankole bari bafite imitwe itatu itatu y’Ingabo zirimo Imigogo n’ingogo n’umutwe witwaga Inyana w’intwari zarobanuriwe gutoza kurashisha imbunda.

Ubwo Nyamuhenda bamuhaye izina ry’ubugaba rya Kigeli Ndabarasa nk’umukurambere w’ibihangange by’abami b’u Rwanda byatsinze ingoma ya Ndorwa, bamuha n’umugaba wungirije Ruvuzacyuma rwa Semuzigura watwaraga umutwe w’ingabo z’Abadahemuka. Rwabugili amuha izina ry’ubugaba rya Mibambwe Sekarongoro Mutabazi, kuko ariwe wabashije gutsinda Abanyoro akabatsinsura burundu ubutazagaruka gutera u Rwanda.

Ibigwi by’abo bami bagirije ayo mahanga, byahesheje u Rwanda ubugabo bwo guhangana n’Abanyankole. Umutasi wa Rwabugili muri icyo gihe yari Kambwa ka Rwakarengwa.

Ntare Rugingiza rwa Migereka umwami wa Nkole, yagerageje kohereza Abatasi benshi ngo bamubwire imiterere y’ingabo Rwabugili yitwaje, maze bamukurira inzira ku murima ko atazazitsinda, bagira bati “Ingabo Rwabugili yitwaje, si abantu babyarwa, ubanza Rwabugili abahinga, akabasarura nk’imyaka! Ikiruta ni uko twagirana imishyikirano tukabasubiza inka zabo, naho ubundi ntituzabakira”

Icyakora Ntare yanze kumva izo nama z’abatasi be akomeza kurasa mu ngerero z’ingabo z’u Rwanda by’ubushotoranyi. Yiringiye imbunda yahawe n’Abongereza, yibwira ko ari we uzifite wenyine, ntamenye ko na Rwabugili yari afite umutwe w’ngabo ugizwe n’abagabo b’inkorokoro 60, barwanishaga imbunda bitwaga “Ibyinigiri”.

Nyuma yo kurushaho gutekereza ku magambo Nyamuhenda yamubwiye y’uburyo barashwe n’ingabo z’Abanyankole bagahitamo kugaruka kugira ngo zitabamara, Rwabugili yahise yunguka igitekerezo cyihuse dore ko yagiraga n’ubwonko bunyaruka mu gushaka igisubizo cy’ibibazo abajijwe mu buryo bwihuse.

Yahise abaha igitekerezo ati “Ndabona muri iriya myuko bafite hari ikintu gishamitseho kimeze nk’ishami ry’igiti bakurura kigakaka, hanyuma bagahita bakura akandi kari mu nsi yaho bakohereza umuriro mu kirere. None ubwo bimeze bityo, niba barasa hejuru, nibajya batangira gukurura kiriya kintu gikaka mujye muhita muryama, kuko nabonye gitinda mu kugikurura, nibamara kuboherezaho uriya muriro bitegura kongera gukurura cya kintu gikaka nabonye kibatwara umwanya, mujye muhita mubyuka n’ingoga mwoherezeyo imyambi n’amacumu’’.

Rwabugili kuba yarise imbunda imyuko, si uko atari azizi, ahubwo bwari uburyo bwo kuzihinyura no kuzitesha agaciro. Amateka y’u Rwanda agaragaza ko icyo gitero cyo mu Nkole cyabaye Rwabugili afite imbunda zigera kuri 60 zari mu mutwe w’Ingabo z’Ibyinigiri. Bityo bakaba nta gaciro yazihaye mu bitero yagabye ku mahanga kuko we yabonaga kuzikoresha ari ukwisuzuguza no gutesha agaciro ubutwari bw’Abanyarwanda.

Ingabo za Rwabugili n’abagaba b’Ingabo zose bari kumwe baba abarwanira mu mazi no ku butaka, bamaze iminsi itari munsi y’itatu bitoza uko bazabigenza.

Umunsi warageze, basatira Ingabo z’Abanyankole, zitangira kurasa nabo bakaryama, isasu ryamara gusohoka bagahita babyuka bwangu, bagatamika imyambi n’amacumu mu gihe abandi bakirangariye mu byo kwambika amasasu mu mbunda no kwizihirwa n’ako gashya kadutse, abandi bakaba baboherejemo urufaya rw’imyambi n’amacumu.

Babikoze rimwe, kabiri, ubwa gatatu babona bamaze kugarika Ingabo z’Abanyankole nyinshi, nubwo hatabuze n’Abanyarwanda bagwamo batari bacengewe neza n’amabwiriza mashya y’urugamba.

Rwabugili amaze kubona ko hari abamaze kumenya ubucakura bushya bw’imirwano, atanga umurishyo w’impuruza, Ingabo ziravunura zigaruka inyuma. Barongera basubira i Rutaraka bajya gusubiramo imigendekere y’urugamba. Bamaze kubona ko uburyo bize aribwo kandi burimo gutanga umusaruro, batangiye gutekereza neza uburyo bakomeza urugamba, ariko nta ngabo nyinshi zikomeje gupfa.

Rwabugili yabunguye indi nama y’uburyo bushya bwo gukomeza kurwana. Yatangiye kubaha imyitozo mishya yo kurasa imyambi bagaramye, ku buryo umuntu yashoboraga gutamika umwambi umuheto awufatiye mu mano ubundi akohereza, ibyo byari kubafasha kuticwa n’amasasu y’Abanyankole kuko bo barasaga hejuru gusa, ku buryo uryamye batabashaga kumuboneza mu cyico. Rwabugili n’abagaba be b’Ingabo, bitoza uwo mwitozo barawunoza neza neza, banawutoza n’Ingabo bari bakuriye, babona ko nta cyababuza gutsinda Abanyankole. Uburyo bwo kurasa “Umugaramirizo” bwinjira butyo mu mirwanire y’Abanyarwanda.

Rwabugili ntabwo yari afite umugambi wo gutsinda Abanyankole gusa, ahubwo yashakaga no kubambura izo mbunda akazitwara nawe akazajya azirwanisha. Yahise abwira Ingabo ze ko bagomba no kwiga uburyo bwakoreshwa ngo babambure ziriya mbunda, atari ukubatsinda gusa.

Nyamuhenda wa Kajeje umugaba w’ibisumizi, yunguka igitekerezo cy’uburyo bamwe mu gihe baba barimo kurasana n’Abanyankole barangamiye imirwano, hatoranywa undi mutwe w’ingabo ukagenda wihishahisha mu byatsi ku buryo bagera ku ngabo z’Abanyankore zikirangamiye imirwano, bakazifata mpiri bakazambura izo mbunda, dore ko muri ibyo bihe habaga ibyo bitero muri Gashyantare 1894, ibyatsi by’umukenke biboneka muri ako Karere k’i Burasirazuba, byari byishimiye imvura y’umuhindo byari byarakuze cyane, ku buryo umuntu yashoboraga kugendamo akambakamba cyangwa se akicaramo ntumubone.

Aho niho bungukiye igitekerezo gikomeye cyo gufata imitwe y’Ingabo irimo abagabo b’abanyambaraga bakagenda bakambakamba nk’ibikururanda bakagera mu rugerero hagati babatunguye, bakabambura izo mbunda.

Uburyo bushya bw’imirwano bwatanze umusaruro mwinshi muri icyo gitero, kuko abatamikaga bagaramye, boherezaga imyambi n’amacumu akica Ingabo z’Abanyankole gitunguro batabona ubarasa uwo ariwe. Abakusha, bagenda babyuka baryama, bahaguruka, bicara, nibo barangaje Ingabo z’Abanyankole noneho ntibamenya ko hari indi mitwe y’Ingabo igiye kubagwa gitumo, indi irimo kubarasa iryamye.

Icyo gitero cyarangiye u Rwanda rutsinze abanyankole, barabica ku buryo bukomeye kugeza ubwo mu kugaruka bambuka, Abanyarwanda bifashishije imirambo y’abanyankole ngo bambuke umugezi.

Umwami Rwbugili n'umugaba w'ingabo, Nyamuhenda wa Kajeje babanje kwiga amayeri bazakoresha batsinsura abanyankole
Mu gitero cya mbere, Abanyankole bishe Abanyarwanda benshi kuko barashishaga imbunda abanyarwanda bafite imiheto n'amacumu
Kugira ngo Abanyarwanda babashe gutsinda Abanyankole, bize amayeri yo kurasa umugaramirizo, umuheto uri mu mano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza