Umwiherero mu muco n’amateka y’u Rwanda (Igice cya Mbere)

Yanditswe na Nsanzabera Jean de Dieu
Kuya 8 Werurwe 2019 saa 03:59
Yasuwe :
0 0

Umwiherero w’Abayobozi Bakuru b’Igihugu, ntabwo ari igikorwa gihahano nk’ibindi byinshi u Rwanda rwahashye mu mahanga, ni igitekerezomuzi cya Gihanga cyagiye gikaragirwa n’abandi bakurambere mpangarwanda kugeza ku buvivure n’ubuvivagiza bwa kure, gishinga imizi mu mitima ya benshi kiba umuco karande w’ibihe byose.

Niwo wagiye utuma mu Rwanda hafatwa ibyemezo bidahubukiwe no mu ishyirwa mu bikorwa ryabyo bikagera ku ntego. Nta guhizana no kwivanga kwabagaho kuko buri wese yabaga afite inshingano ze yahabwaga mu mwiherero, ibyo bigatuma nta gitutu gishyirwa ku muntu wese urebwa n’imyanzuro yafashwe cyangwa se ngo habeho guhangana mu bitekerezo kuko byafatwaga habanje kumvwa ibitekerezo bya buri wese.

Muri iyi nkuru tugiye gukeza amateka y’umwiherero mu Rwanda nk’uko tubikesha ibitabo “Intwari z’Imbanza, zubatse u Rwanda rugahamya igitinyiro” n’igitabo “Umushyikirano mu Muco n’amateka y’u Rwanda” byombi byanditswe n’Umusizi Nsanzabera Jean de Dieu.

Igikorwa cy’Umwiherero cyahereye mu Miyoborere y’igihugu, gikomereza mu butabera no mu mutekano. Ni kimwe mu bigaragaza gukunda igihugu, kucyitangira n’ubwizerane bw’abayoboye u Rwanda mu gihe cy’abami, kikimakaza umuco wo kugira ibanga, dore ko n’ubundi “Agaseke k’umutima, kadapfundurirwa imwasama”.

Ni uruzitiro rwagiye rurinda benshi mu barebwa n’ubuzima bw’igihugu, ntibatandukire ngo bajye hirya hahabanye n’ibireba igihugu cy’u Rwanda. Wabaye isoko y’umuziro mu banyarwanda wo kutenderanya cyangwa gukemura ibibazo ku mbaraga n’imirwano itari ngombwa.

Itandukaniro ry’umwiherero w’ubu n’uwo hambere rigaragazwa ni ibi bikurikira:

Umwiherero wo ha mbere wakorwaga n’Abayobozi bakuru bo mu rwego rumwe rw’Abiru gusa, naho muri ibi bihe byo ukorwa n’Abayobozi bakuru bose mu nzego z’igihugu, uhereye kuri Perezida wa Repubulika. Nyamara mu bihe byo ha mbere, umwami n’Umugabekazi, hari igihe batari bemerewe kuwitabira.

Umwiherero wo ha mbere wakorwaga mu ibanga rikomeye, ku buryo ibyemezo byawufatiwemo byahamaga hagati y’ abari bawurimo gusa. Nta muturage wabashaga kubimenya, usibye kubona bishyirwa mu bikorwa gusa.

Ibyo bikaba byaraterwaga n’ihiganwa ryariho muri ibyo bihe n’u Rwanda rugoswe n’amahanga menshi badacana uwaka, ku buryo imigambi yose yagombaga guhora mu ibanga kuko iyo hagiraga ubimenya atari nyira byo, ishyirwa mu bikorwa ryabyo ryabaga ripfubye.

Umwiherero wo mu Rwanda rwo ha mbere, wahuzaga ahanini Abiru bonyine gusa mu mitwe babarizwagamo, nk’abarinzi b’umurage w’imiyoborere n’ubuzima bw’igihugu. Si kenshi na kenshi watumirwagamo umwami, umugabekazi n’abandi batware. Umwiherero w’Abiru benshi bakunze kwita “Inama y’Abiru” yayoborwaga n’Umwiru Mukuru witwaga “Umwiru w’ijambo”.

Abiru bari abagaragu n’Abanyamabanga b’ingoma, bakaba abarinzi b’umuco n’umurage w’ibwami, bakaba abayobozi b’amateka y’ u Rwanda, mbese bari nk’inkingi n’urumuri rw’Igihugu. Ikindi kandi, Abiru bari Abagaragu b’imbata ari bo bihambira kuri Shebuja ntibagire ahandi bajya, shebuja kandi yari igihugu n’ingoma ngabe ikigenga.

Mu by’ukuri rero, Abiru bari Abagaragu b’Ingoma, bakaba abanyamabanga n’abanyamihango b’Ibwami. Abiru bari urwego rw’imiyoborere utabasha kugereranya n’inzego z’ubu, kuko ntiwabona uburyo ubisanisha n’inzego z’ubuyobozi dufite ubu.

Hari aho usanga bari nk’Abajyanama b’umukuru w’igihugu mu nzego zitandukanye, ariko na none ugasanga baramurushaga ububasha mu gufata ibyemezo.

Hari aho usanga, bari nk’urwunge rw’Abanyamabanga ba Leta, ariko ugasanga ububasha bwabo burenze ubwo! Hari aho usanga bari bameze nk’urwego rw’ibanga rw’umutekano w’igihugu, ariko na none ugasanga ari agace gato k’inshingano zabo.

Iki ni ikigaragaza ko inshingano z’Abiru zari iz’ikirenga ku gihugu ari nayo mpamvu usanga urwego rwabo rwari rurenze ububasha bw’umwami, kuko hari aho nabo bamufatiraga ibyemezo.

Niyo mpamvu Umwiherero wabaga ari uwabo bonyine gusa, naho izindi nama zategurwaga n’ibwami nk’iz’umushyikirano n’iz’abaturage zaremeraga mu bitaramo.

Imitwe y’Abiru bitabiraga umwiherero w’ubuyobozi yabaga ari iyi ikurikira:

Abiru b’ibanga ry‘Ingoma: Bari abanyamabanga b’Ingoma, bakayinywera igihango. Abo ni nk’abaragutsi bari Abashumba ba Kiragutse cyangwa se Abanyakalinga baragiraga Kalinga.

Abiru b’Ingoma z’Imivugo: Abiru b’Ingoma z’Imivugo bari Abashiramujinya (Abatoni b’ibyegera by’ Ibwami). Mu ngoma z’imivugo zari zishinzwe abo Biru, harimo Abiru bari bashinzwe ingoma z’Imisango zikoreshwa mu birori n’Abiru b’ingoma z’imihango bari bashinzwe imihango y’ibwami.

Ni bo babagamo Abaroro aribo bitwaga Abatimbo bakomokaga kuri Sebiroro Umutimbo wo ku Mukingo, bakaba abiru b’Ibwami bakabambura bakabikira. Habagamo kandi, Abakaraza bari Abashumba b’Indamutsa, bakavamo Abiru b’i Bugabekazi.

Abaziritsi (abafatagihe b’Ibwami): Abaziritsi babagamo amatorero abiri, abasendamisaka bari Abiru bakuraga Gicurasi, nabo batorwaga mu mutwe w’Abakaraza n’Abanyamuganura.

Abatambira (rubanda ): Barimo amatorero abiri abahanika ni ukuvuga abiru batangaga ibyuhagiro by’inka n’imyaka biyivura ubwandure, bagatanga n’amasubyo y’amahumane, n’Abahinda bari Abiru b’abavubyi.

Ibiyora-nyundo: Ni amatsinda yo hambere yarimo imparamba za Nyirakigeli, Abiru ba Semunyana w’i Mwurire (Mvejuru ).

Mu gice gikurikira, tuzabatekerereza indi mitwe y’Abiru yabaga mu mwiherero, imwe mu myiherero yabayeho n’imwe mu myanzuro yafatwaga mu ibanga yatumaga Abiru aribo bagira umwihariko w’umwiherero bonyine.

Abiru nibo bitabirage umwiherero

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza