Uko ‘Girinka’ yifashishijwe mu guhangana n’ubukene mu mateka y’u Rwanda

Yanditswe na Nsanzabera Jean de Dieu
Kuya 29 Mutarama 2020 saa 11:11
Yasuwe :
0 0

Inka yagiye igira amateka akomeye bikozwe n’abami b’u Rwanda, mu rwego rwo kuziteza imbere, kugira ngo ibe urufatiro rw’ubukungu n’umutekano w’igihugu.

Inka yabaye ishingiro n’inkingi ya mwamba mu kugena ahazaza h’u Rwanda, aho Gihanga I Ngomijana wahanze ingoma y’i Gasabo, yahaye umurongo ubworozi bw’inka mu rwego ruhanitse, anazigira ikintu gitagatifu mu mateka y’u Rwanda.

Inka yabaye ishingiro mu kubaka ubukungu bw’igihugu, ububanyi n’amahanga, kurwanya ubukene mu benegihugu, umuhuza w’imiryango n’igikoresho cya Politiki yo kwigarurira ibihugu bigera kuri 29 byariho mu bihe by’ihangwa ry’igihugu cya Gasabo.

Mu gitabo “Intwari z’imbanza, zubatse u Rwanda rugahamya igitinyiro” n’ikindi cyitwa “Ikeshamvugo mu Kinyarwanda” byombi by’Umusizi Nsanzabera Jean de Dieu, hagaragaramo ko kubera icyo cyerekezo Gihanga yahaye Inka, byatumye aca iteka ko inka zigomba kuba nyinshi mu gihugu kandi buri muturage akabasha kugezwaho ibyiza bizikomokaho.

Gihanga yaciye iteka rishyiraho gahunda yo guteza imbere ubworozi bw’inka no kuzigaba. Iyo gahunda yayise “Gabirwa’’, ari nayo yabaye inkomoko y’izina ry’Umurenge wa Jabana n’ubundi bisobanura “Gabirwa”. Guhera ubwo umuco wo kugabirana inka wimakazwa guhera ubwo, aho yabitoje ahereye ku gihugu cy’igituranyi cy’u Buliza cyane cyane mu Murenge wa Jabana.

Gahunda ya Gabirwa, niyo Gahunda ya mbere yashyizweho mu mateka y’u Rwanda, yo guteza imbere ubworozi bw’inka no kuzigaba.

Uko imyaka yarushagaho kwicuma ari nako umushinga wo kubaka u Rwanda urushaho kujya mbere, niko inka zarushagaho kugira ibigwi, ari no kuba nyinshi no kurushaho gukemura byinshi mu bibazo igihugu cyari gifite.

Ku ngoma ya Mibambwe Gisanura, yifashishije inka arwanya imirire mibi, aho yashyizeho amashyo akamirwa abakene, aho buri gitondo batondaga umurongo baje iwe mu Ruhango ndetse n’ahandi henshi yagiye ashyira ayo mashyo y’inka, baje gukamisha. Ibyo byatumye abaturage bakurizaho kumwita “Rugabishabirenge” kuko yagiraga ubuntu bwinshi.

Mu bihe by’ingoma ya Yuhi Gahindiro inka yagize ibigwi bikomeye inahabwa n’ishingano nyinshi cyane cyane mu kubaka ubukungu bw’igihugu, ubuhahirane n’ubutwererane bw’abenegihugu n’imibereho myiza y’abaturage, ugereranyije n’abamubanjirije. Ku ngoma ye, yaciye amateka menshi agamije ahanini imibereho myiza y’abaturage.

Hari nk’aho yagize ati “Nta munyarwanda ukwiye kubaho atagira inka, amata, umugabo, umugore, abana n’ibindi.” Mu gushyira mu bikorwa iryo teka, buri muntu wese yahawe inka yo korora, udafite umugabo kubera impamvu runaka baramushyingira, udafite umugore nawe nuko n’abadafite abana ku mpamvu zo kuba inshike n’iz’ubugumba, ababyaye benshi bakabaha abana, abadafite amata kubera inka zabo zatetse cyangwa se zitarabyara, bakayoboka iyo kwa Gahindiro cyangwa se ku batware be, bakajya gukamisha.

Mu bihe by’ingoma ye, ni ukuvuga ahasaga mu wa 1746-1802, yaciye iteka rishyiraho gahunda ya “Girinka” naryo rifite umurongo wo guteza imbere ubworozi bw’inka no kuziha umurongo wo kuba urufatiro rwubakirwaho ubukungu bw’ikirenga bw’igihugu n’imibereho myiza y’abaturage.

Kugira ngo iryo teka ryaciwe na Gahindiro ka Sentabyo rikwire kandi rikurikizwe, yarishyize mu ndamukanyo y’Abanyarwanda. Aho bagombaga kuramukanye bifurizanya ibyo byiza byatuwe mu iteka ry’umwami Yuhi Gahindiro. Baramukanyagaga bagira bati “Girinka, Girabana, Giramata, Girumugabo, Girumugore” n’izindi.

Gahunda yaciwe n’iteka rya Yuhi Gahindiro, niyo yiswe “Girinka”, iba gahunda ya gatatu mu mateka y’u Rwanda igamije guteza imbere ubworozi bw’inka.

No mu bihe bya Repubulika, cyane cyane mu bihe byo kongera kubaho k’u Rwanda, nyuma y’uko hahagaritswe Jenoside yakorewe Abatutsi, Umukuru w’igihugu cy’u Rwanda Paul Kagame, ntiyatanzwe no gufata ibyiza biri mu muco n’amateka y’abakurambere mpangarwanda, ngo abyifashishe mu kubaka igihugu no kukizahura dore ko cyari kivuye habi.

Byatumye mu 2006 asaba ko buri munyarwanda agomba gutunga inka, ikaba ishingiro ryo kurwanya ubukene, kwimakaza imibereho myiza y’abaturage no kurwanya imirire mibi. Muri uwo mwaka, nibwo yatangije gahunda ya “ Girinka’’ irongera igira ishyikizo mu mibereho y’Abanyarwanda. Niyo gahunda ya kane mu mateka y’u Rwanda, yeteje imbere ubworozi bw’inka mu Rwanda.

Izi gahunda zose, yaba iya Gihanga, yaba iya Gisanura, yaba iya Gahindiro ndetse n’iya Kagame, zose zari zifite icyo zihuriyeho. Inka zahabwaga abaturage zose zabaga ari iz’ubuntu, ariko uyihawe akazagabira mugenzi we, nawe agatunga agatunganirwa, agahorana amata ku ruhimbi.

Haba mu bihe by’abami, no mu bihe bya Repubulika, inka iracyabonwa nk’igikoresho cyarwanya ubukene cyane mu Banyarwanda, kikaba n’ishingiro ryo kwigira n’imibereho myiza yuje ubuzima buzira umuze.

Inka zamye ari inkingi y'ubukungu n'imibereho y'abanyarwanda bo hambere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .