Uko Abanyoro bateye u Rwanda, bakabura uko barusohokamo bikarangira bamwe babaye Abanyarwanda

Yanditswe na Nsanzabera Jean de Dieu
Kuya 20 Mutarama 2020 saa 10:37
Yasuwe :
0 0

U Rwanda ni igihugu cyabaye igihangange kuva kera, gito mu buso ariko kikaba kinini mu mitekerereze ku buryo ibihugu byahoze bituranye narwo kuva kera biruzi nk’ishyanga ritisukirwa.

Ubuhanga bwarwo wabubaza Abanyoro, baruteye baje kwihimura bakahavana amateka na n’ubu ataribagirana, biviramo bamwe muri bo kuyoba no kuyoberwa iyo baje baturuka, bagahitamo kuguma mu Rwanda ari ingazurwamuheto.

Ibyo bisekuru by’Abanyoro babuze inzira n’abafashwe mpiri ubwo bateraga u Rwanda, byaje kuhamara igihe bihinduka Abanyarwanda bo mu bwoko bw’Indara n’Abasigari bazwi cyane mu bice byo mu Majyaruguru n’Iburengerazuba bw’Amajyepfo.

Ayo moko abiri cyangwa imiryango migari, yaje yiyongera ku yandi 24 yari asanzwe mu Rwanda.

Ibitabo birimo icyitwa “Intwari z’imbanza, zubatse u Rwanda rugahamya igitinyiro’’ n’igitabo “Iyoroka ry’Abanyarwanda, inkomoko y’imiryango migari” byombi by’umusizi Nsanzabera Jean de Dieu, bigaragaza ko Abanyoro bagabye ibitero ku Rwanda mu bihe by’ingoma ya Mibambwe Sekarongoro Mutabazi, ahasaga mu wa 1411.

Abanyoro babanje kugaba igitero cyabo cya mbere mu Rwanda ku ngoma y’umwami Kigeli Mukobanya ahasaga mu wa 1378, baratsindwa. Uko gutsindwa kwabasigiye umujinya nk’ubwoko bwashakaga kwigarurira ibindi bihugu mu karere. Baragiye barisuganya bategura ikindi gitero cya kabiri, ari nacyo bagabye ku ngoma ya Mibambwe Sekarongoro Mutabazi, umuhungu wa Mukobanya.

Icyo gihe Abatasi b’u Rwanda babwiye Mibambwe I Sekarongoro ko atazatsinda Abanyoro kuko bari benshi bikabije ugereranyije n’abaje mu gitero cya mbere. Bwa kabiri, bari baje ari ingabo 10.000 mu gihe ingabo za Sekarongoro zo zari 4.000 gusa.

Icyo gihe Sekarongoro yagerageje kwitabaza umwami w’u Bugesera Nsoro II Sangano, na Kimenyi II Shumbusho w’I Gisaka na Mashira ya Nkuba ya Sabugabo, umwami wa Nduga,. Ibyo bihugu byanze kumutabara, bimutera utwatsi maze Sekarongoro abonye asumbirijwe kandi u Rwanda rwe rushobora gusibama, ahitamo guhunga n’ingabo ze, abaturage ndetse n’amatungo berekeza i Bunyabungo (mu ntara ya Kivu y’Epfo ). U Bunyabungo bwatwarwaga na Mulira Muhoyo wari ku ngoma muri ibyo bihe, amutuza mu murwa mukuru w’u Bunyabungo, ari wo Rusozi ( Bukavu y’ubu) abandi banyarwanda batura ku nkengero z’umugezi wa Rusizi.

Abanyoro baraje basanga Sekarongoro yagiye kera, bayogoza igihugu, batwara inka nkeya zishaje zahasigaye, batera Kimenyi w’ i Gisaka ariko ntibyakomera, batera u Bugesera umwami Sangano baramufata baramuboha baramujyana ngo ajye kubereka aho umuturanyi we Sekarongoro yagiye.

Bafashe urwo rugendo kugeza aho bagereye mu Kinyaga aho bari bitegeye ingabo za Sekarongoro, nuko Sangano w’u Bugesera bamwicira mu ishyamba rya Ngiga barenga bareba mu Kinyaga aho Sekarongoro yari aganje n’abaturage be.

Amateka avuga ko Abanyoro bamaze imyaka ine bidegembya ku butaka bw’u Rwanda mu gihe Sekarongoro n’abaturage be bari barahunze.

Abanyoro bakurikiranye Mibambwe Sekarongoro i Bunyabungo, Mashira abaha inzira, ariko Mibambwe Sekarongoro yari yagarutse hakuno y’umugezi wa Rusizi mu ngoma y’u Busozo kuko Abanyabungo bari birukanye Abanyarwanda, kuko imfizi ya Sekarongoro yari yishe iya Muhoyo, Abanyarwanda barwana n’Abanyabungo, ndetse Nyiramibambwe i Nyabadaha arahagwa.

Ubwo Abanyoro bari bahingutse, Abanyarwanda babanje kubatinya kubera ubwinshi bwabo. Bigeze ku mugoroba, Abanyarwanda biga ubucakura bwo gusambura amazu y’ibyatsi yari hafi aho, bahira n’ibindi byatsi ahari habazengurutse. Ubwo Abanyarwanda batangiye kugenda banyonyomba bigendera nk’abahunze, nyamara barimo kuzenguruka ibirindiro by’Abanyoro, mu rwego rwo kurema igico cyo kubata hagati.

Aho abanyoro bari bakambitse bategereje gukoma imbarutso ngo rwambikane bakabona abanyarwanda bagenda uruhongohongo, bakagira ngo ni ukubatinya babahunga. Igihe kigeze, Abanyarwanda batwitse bya byatsi by’inzu barundanyije, Abanyoro aho bakambitse bashya ubwoba batangira guhunga batazi n’iyo bajya kuko ako karere batari bakamenyereye.

Umunyoro uhunze kubera ubwoba bw’ikome ry’umuriro yabonaga, akiroha mu muheto w’ingabo z’u Rwanda wahogeraga n’amacumu avuza ubuhuha nuko ingabo z’u Rwanda zica Abanyoro umusubizo, igitinyiro bashakaga muri Afurika y’Iburasirazuba kiyoyoka burundu.

Uko bigaragara mu gitero cya kabiri Abanyoro bagabye mu Rwanda, haguye Abanyoro benshi kurusha abahaguye mu gitero cya mbere. Abanyoro bagiye barorongotana bahunga, bamwe batungukira mu Bungwe ahitwa Buhanga, babura inzira yabahuza n’ababo, baguma mu ishyamba riri i Burwi bararikonda, bararitura. Abo Banyoro nibo biswe Indara [abantu bayobye inzira], n’aho batuye hakurizaho kwitwa “Buhanga–ndara”.

Bamwe muri bo bahafatiwe mpiri abandi barayobagurika baza gutura mu Rwanda mu bice by’Amajyaruguru mu turere twa Burera na Musanze, bakaba ari bo bagize ubwoko bwitwa “Abasigari cyangwa se Basigi’’. Abandi banyoro barokotse umuheto wa Sekarongoro bagerageje kwambuka umugezi w’Umuvumba uri mu karere ka Nyagatare, nuko bageze mu Nkore umwami waho Ntare abahukamo arabica arabatsemba, niko kumuhimba ’’Kitabanyoro (Cyicabanyoro)’’.

Imiryango migari y’Abasigari n’Indara, ni ibisigara by’Abanyoro basize mu Rwanda bikomoka mu gitero cya kabiri bahagabye. Ni ukuvuga ko Indara n’Abasigari ari Ubuvivagiza bw’Abanyoro baba mu Rwanda. Iyo miryango yabaye imwe mu miryango migari ituye mu Rwanda mu buryo buyigwiririye kuko ntihagira inkomoko n’ubwo ihatuye igihe kirekire.

Aho imiryango y’Abasigari yiganje kuri ubu ni mu Turere twa Burera na Musanze mu Ntara y’Amajyaruguru naho imiryango y’Indara, igatura mu Turere twa Gisagara na Nyaruguru. Abasigari cyangwa se Abasigi, nibo bakunze kwiyita “Abarera’’ izina bakomora kuri Sekuruza wabo “Murera’’.

Mu nzu y’Abarera, ari nayo nzu imwe Abasigari bibumbiyemo, niho hakomotse umutware umwe rukumbi ukomoka mu Basigari watwaye mu gihugu cy’u Rwanda, ari we Kabanda ka Mivumbi ya Ndabaramiye wo mu Basigari b’Abarera, watwaraga Susheferi ya Gitare muri Sheferi y’u Bukamba-Ndorwa muri Teritwali ya Ruhengeri.

Ingabo z'u Rwanda zatsinze iz'Abanyoro, babura aho banyura bamwe bakurizamo kuguma mu Rwanda kugeza ubu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza