00:00:00 IGIHE NETWORK KN KINYARWANDA EN ENGLISH FR FRANCAIS

Ingoma ngabe Kalinga yagiye he?

Yanditswe na Nsanzabera Jean de Dieu
Kuya 8 July 2022 saa 08:53
Yasuwe :

Hari ibintu byinshi biboneka mu mateka y’u Rwanda bikomeje kubera benshi amayobera, byagera ku birangagihugu nk’ingoma ngabe Kalinga byo bikaba ihurizo.

Iyo ubajije abakuru bakiriho bakubwira ko batamenye irengero ryayo, abakiri bato bo baheze mu rungabangabo, kubera kutamenya irengero ry’icyo kirangagihugu cya kera benshi bafitiye amatsiko.

Ingoma Ngabe, ni yo yari Ibendera ry’Igihugu, akaba ari na yo yari nkuru mbere y’Umwami n’Umugabekazi. Umurimo wayo wari uwo kwimika Abami no guhuza Umwami na Rubanda.

Ingoma Ngabe ntiyari ingoma nk’izindi zakoreshwaga mu misango no mu mihango y’ibwami, kuko yo ntiyavuzwaga, ahubwo izindi zarayivugirizwaga zikayitaramira nk’uko zataramiraga Umwami.

Mu mateka y’u Rwanda rwagize Ingoma Ngabe ebyiri ari zo Rwoga na Kalinga. Rwoga ni yo ngoma ya mbere yabayeho mu bwami bw’u Rwanda ariko ikaba yararamvuwe nk’ikirango cy’ibihugu byihuje, nyuma y’amasezerano y’ihuzabihugu yemeranyijweho i Nkotsi na Bikara ahasaga mu wa 1100.

Rwoga yasobanuraga kogera cyangwa kwamamara, naho Kalinga igasobanura inkingi y’icyizere cy’ahazaza.

Kalinga ni yo yasimbuye Rwoga, ubwo yanyagwaga n’Abanyabungo ubwo ibikomangoma byo kwa Gahima byarwaniraga ingoma ahasaga mu wa 1499, umwami Ndahiro Cyamatare akahasiga ubuzima.

Kuva ubwo Kalinga niyo yabaye ikirango gishya cy’u Rwanda kuva ku ngoma ya Ruganzu II Ndoli wayiramvuye ahasaga mu wa 1510, kugeza mu wa 1961 ubwo ingoma ya cyami yasezererwaga mu Rwanda rugahinduka Repubulika.

Ubusanzwe ingoma Ngabe Kalinga yari yarahiriye ku Rucunshu ubwo bene Rwabugili ari bo Musinga na Rutalindwa barwaniraga ingoma, n’uko Rutalindwa abonye asumbirijwe yitwikira mu nzu n’ibimetso by’ubwami byose harimo Ingoma Ngabe Kalinga bihiramo. Nyuma yaho haramvuwe indi ngoma Ngabe isubirana izina rya Kalinga ari nayo igaragara henshi mu mafoto.

Ubwo Repubulika yinjiraga nta wigeze yita kuri icyo kirango cy’igihugu, kuko cyari cyateshejwe agaciro nk’ubwami Abaparimehutu bari bamaze guhirika. Nta wari ukiyitayeho ngo ayitarure ishyinguwe nk’amateka y’igihugu. Abakoroni n’abanyamadini bo ntibanayegeraga ngo kuko yakorerwagaho imihango ya gipagani.

Abakuru bakubwira amakuru atandukanye ku irengero rya Kalinga, wasoma n’inyandiko zicicikana hirya no hino zirimo n’igitabo cyanditswe na Col. Lizinde, ugasanga zimwe zibara urunyurane ku makuru y’aho Kalinga iherereye.

Hari abavuga ko mu gihe cy’imyivumbagatanyo yabaye mu Ugushyingo 1959 bari kumenesha Abatutsi mu gihugu, Umugabekazi Rosalie Gicanda ngo yategetse ko bafata Ingoma Ngabe Kalinga n’ibigamba byayo (ibyegera by’ingabe) birimo Cyimumugizi bakajya kuzihisha ku mukozi wakoreraga Umunya-Pakistan wacururizaga i Nyanza wari inshuti ya Rudahigwa, kugira ngo amufashe kuzihisha mu buryo bukomeye bazitaba mu butaka, nk’uko biri mu gitabo La découverte de Kalinga ou la fin d’un mythe cya Théoneste Lizinde wahoze ashinzwe iperereza ku bwa Perezida Juvenal Habyarimana.

Hari abandi bavuga ko Leta ya Habyarimana yafashe ingabe Kalinga, Cyimumugizi n’izindi ngoma bakazitwika, mu rwego rwo kugaragaza ko ubwami burimbutse butazagaruka.

Ntwari Innocent, umusenguzi ku mateka y’u Rwanda, yavuze ko ibyanditswe mu gitabo cya Lizinde bidasobanutse ndetse n’ababibonye bavuga ko hashobora kuba harimo kubeshya.

Ati “Uko nabitekererejwe n’abakuru bariho icyo gihe, Col. Lizinde wari ukuriye iperereza ku butegetsi bwa Habyarimana, yaje ku kibuga cy’indege kiri ahitwa i Gahondo k’i Nyanza, ngo baracukura bakuramo ingoma nyinshi zigera kuri eshanu. Arangije ahamagara Padiri Alex Kagame wabanye n’abiru, ngo amusigurire imitandukanire y’izo ngoma, niba haba harimo n’ingabe Kalinga.”

Ntwari Innocent, yakomeje avuga ko aho Padiri Alex Kagame ahagereye yarebye izo ngoma zibyagiye aho, ubundi arahigima asekana agasuzuguro kenshi, asubira mu ivatiri ya arigendera. Col. Lizinde yasigaye yitotomba, ahita ataha ari bwo nyuma yasohoraga igitabo.

Mu nzu ndangamurage ya Afurika yo Hagati iherereye i Tervuren mu Bubiligi, hari abagiye bagerageza kujyayo gushakisha ko ingabe Kalinga yaba yaratwawe n’Ababiligi ariko ntabwo ihari. Mu mwanya wagenewe ingoma ngabe Kalinga, usanga hateretsemo imwe mu ngoma z’imisango isa n’Inyahura.

Ingoma ngabe Kalinga yaburiwe irengero nyuma y'aho ubwami bukuriweho mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .