Imyaka 26 irashize umwamikazi wa nyuma w’u Rwanda, Rosalie Gicanda yishwe

Yanditswe na IGIHE
Kuya 20 Mata 2020 saa 11:41
Yasuwe :
0 0

Tariki 20 Mata 1994 nibwo inkuru mbi yakwirakwiye ko umwamikazi wa nyuma w’u Rwanda, Rosalie Gicanda yishwe n’ingabo za Leta yakoraga Jenoside, azizwa ko ari umututsi.

Gicanda yashakanye n’Umwami Mutara wa III Rudahigwa Charles Léon Pierre Kuwa 13 Mutarama 1942. Yabayeho nabi asuzugurwa nyuma y’urupfu rw’umwami Rudahigwa, ubwo yatangiraga i Bujumbura ku buryo bw’amayobera tariki 25 Nyakanga 1959.

Nyuma yo gutanga kw’umugabo we byajyanye n’ihurura ry’abarwaniraga Repubulika, ariko barushaho gutesha agaciro ingoma ya Cyami n’ibimenyetso byayo.

Mu 1961 Perezida Kayibanda Grégoire yirukanye mu rukari Umwamikazi Gicanda. Yaje gutura mu Mujyi wa Butare mu Karere ka Huye, ari naho abahoze ari abasirikare ba Habyarimana hamwe n’Interahamwe bamusanze bakamwica kuwa 20 Mata 1994.

Urupfu rw’Umwamikazi Rosali Gicanda

Muri Repubulika ya mbere n’iya kabiri, umwamikazi Gicanda nubwo yari mu gihugu, yabayeho nta gaciro afite nk’uwahoze mu buyobozi bukuru bw’igihugu.

Gicanda wari umuyoboke ukomeye wa Kiliziya Gatolika, yabayeho mu buzima bworoheje mu mujyi wa Huye, abana n’umubyeyi we ndetse n’abandi bagore bake bamufashaga mu mirimo itandukanye.

Ubwo Jenoside yatangiraga, Umwamikazi Gicanda yagiye yishingikiriza Jean Baptiste Habyarimana wari Perefe wa Butare, warwanyije cyane umugambi wo gutsemba Abatutsi.

Tariki 17 Mata, Perefe Habyarimana yatawe muri yombi, nyuma aza kwicwa. Umwamikazi Rosalia Gicanda yatangiye guterwa ubwoba ko nawe agiye kwicwa n’umuryango we.

Raporo ya Human Rights Watch yasohotse mu 1999, ivuga ko Umwamikazi Gicanda wari ufite imyaka 66 yasabye Joseph Kanyabashi wari Burugumesitiri wa Komini ya Ngoma i Butare kumurinda, undi akabyanga.

Tariki 20 Mata ahagana saa tanu z’amanywa , abasirikare bayobowe na Lt Pierre Bizimana binjiye mu rugo rw’umwamikazi Gicanda ku mabwiriza yari yatanzwe na Capt Ildephonse Nizeyimana wari umuyobozi ushinzwe ubutasi n’ibikorwa mu ishuri rikuru rya gisirikare, ESO ubwo Jenoside yakorwaga.

Abo basirikare bamaze kwinjira mu rugo rw’umwamikazi, baramufashe we n’abandi bagore batandatu babanaga barabatwara. Muri urwo rugo hasigaye mama wa Gicanda wari ufite imyaka 80 n’undi mukobwa wo kumwitaho.

Abasirikare bafashe Gicanda n’abo bari bafatanywe bajyana inyuma y’ingoro y’inzu ndangamurage y’u Rwanda barabarasa, barapfa.

Ku gicamunsi abasirikare bagarutse mu rugo rwa Gicanda gusahura, hashize iminsi ibiri baragaruka bica umubyeyi we.

Raporo ya Huma Rihgts Watch ivuga ko hari umupadiri wasabye ko umubiri wa Gicanda washyingurwa mu cyubahiro, burugumesitiri Kanyabashi yohereza abagororwa bo kuwujyana bawushyingura hafi y’urugo rwe.

Umwe mu baganiriye n’umukobwa wabashije kurokoka witaga ku mubyeyi wa Gicanda, ngo yamubwiye ko mbere y’uko Gicanda n’abo bari kumwe bicwa babanje kuvuga isengesho bishyira mu maboko y’Imana.

Muri 2012, urukiko rwashyiriweho u Rwanda rwakatiye Capt Ildephonse Nizeyimana igifungo cya burundu ashinjwa kwica Umwamikazi Gicanda n’abandi batutsi muri Jenoside yakorewe Abatutsi. Nizeyimana yari yafatiwe muri Uganda mu 2009.

Mu 1998 Lt Pierre Bizimana yakatiwe urwo gupfa n’urukiko rwa gisirikare i Kigali ariko icyo gihano kiza guhindurwamo igifungo cya burundu nyuma y’uko u Rwanda rukuyeho igihano cy’urupfu.

Umwamikazi wicishaga bugufi, akagira impuhwe

Ababanye n’abazi neza Umwamikazi Gicanda, bavuga ko yari umubyeyi wicisha bugufi kandi agakunda abantu bose atarobanuye.

Mu buhamya Perezida Paul Kagame yatanze mu 2017 avuga ku mateka y’ubuto bwe kuva afite imyaka ine y’amavuko ubwo yatangiraga ubuzima bw’ubuhunzi, yashimiye na Gicanda nk’umwe mu bamufashije akabasha kurokoka.

Ubwo buhamya bugaragara mu nimero 2944 ya Jeune Afrique yasohotse ku wa 11 Kamena 2017, yiswe amabanga y’ubuto [Secrets de Jeunesse] bw’abakuru b’ibihugu barimo Perezida Kagame, Ali Bongo Ondimba, Umwami Mohammed VI wa Maroc na Alpha Condé.

Perezida Kagame yasobanuye ko mu 1961 mbere gato y’uko u Rwanda rubona ubwigenge, ubwo yari afite imyaka ine, Abahutu bari batuye ku musozi wa Tambwe bashyigikiwe n’ubuyobozi, bigabije aho umuryango we wari utuye batwika inzu zaho ndetse bagirira nabi Abatutsi. Icyo gihe umubyeyi we yatangiye kumutegura ngo bahunge.

Hahise haza imodoka, umushoferi wayo ashyikiriza umubyeyi wa Perezida Kagame ibaruwa ivuga ko atumwe n’Umwamikazi Gicanda wari utuye i Nyanza mu rugendo rw’iminota nka 45 uvuye aho bo bari batuye. Rosalie Gicanda yari amusabye kubahungisha muri ibyo bihe by’amakuba.

Perezida Kagame n’abantu bari baturanye binjiye muri iyo modoka mu gihe igihiriri cy’ababahigaga cyaturukaga ku wundi musozi, gihita cyirara mu byo bari batunze.

Icyo gihe ngo basanze Umwamikazi i Nyanza, mbere y’uko bafata inzira bakerekeza mu Mutara aho naho ubwicanyi bwabasanze bakabuhungira muri Uganda.

Gicanda yavukiye i Rwamagana mu 1928. Yakuze arangwa n’ikinyabupfura ari nabyo byatumye abengukwa n’Umwami Mutara III Rudahigwa.

Umwamikazi Gicanda aruhukiye i Mwima ya Nyanza ahatabarijwe Umwami Mutara III Rudahigwa na Kigeli V Ndahindurwa.

Buri mwaka tariki 20 Mata hategurwa gahunda yo kwibuka Umwamikazi Rosalie Gicanda, itegurwa ku bufatanye bw’umuryango we n’ubuyobozi bw’Ikigo cy’Igihugu cy’Ingoro Ndangamurage z’u Rwanda.

Umwamikazi Rosalie Gicanda abamumenye bamushimira ubumuntu bwamurangaga
Umwami Rudahigwa n'umwamikazi Rosalie Gicanda ubwo bari mu ngoro i Nyanza mu myaka ya 1950
Umwamikazi Gicanda aha yari kumwe n'Umwami Rudahigwa mu rugo rwabo i Nyanza
Nyuma y'itanga rya Rudahigwa, Umwamikazi Gicanda yabayeho ubuzima bworoheje atitabwaho na Leta zahiritse ubwami
Ifoto yafashwe mu myaka ya za 1980 igaragaraho umwamikazi Gicanda (wambaye imyenda itukura)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .