Imvano y’igitutu cy’u Burayi na Amerika ku Rwanda ubwo Habyarimana yacudikaga na Koreya ya Ruguru

Yanditswe na Ferdinand Maniraguha
Kuya 6 Mutarama 2020 saa 08:28
Yasuwe :
0 0

Intambara n’ibitutsi, ibisasu kirimbuzi no kwigerezaho niyo makuru benshi bazi aturuka muri Koreya ya Ruguru y’umugabo w’igisunzu, Kim Jong Un.

Iyo Koreya isa n’iyitajwe n’ibihugu kuri ubu, yabaye inshuti ikomeye y’u Rwanda ku butegetsi bwa Perezida Habyarimana Juvénal mu gihe cy’intambara y’ubutita kugeza ubwo Leta Zunze Ubumwe za Amerika n’u Burayi zari zimurabye ivu, bikamusaba amayeri ngo atabizira.

Habyarimana yashatse gukina amayeri Amerika n’u Burayi, bamuha gasopo

Ikibazo cyo kutavuga rumwe kwa Koreya ya Ruguru n’iy’Epfo cyo mu 1948 ubwo zacikagamo kabiri, cyakomeje gukururuka kigeza mu 1973 ubwo Habyarimana yafataga ubutegetsi mu Rwanda.

Nk’umuntu wari ugiye ku butegetsi vuba, yagombaga gushaka ibihugu by’inshuti ariko agahera ku bitari bisanzwe bifitanye ubushuti bwa hafi n’u Rwanda, kugira ngo inkunga iva hanze yiyongere.

Koreya ya Ruguru yari ishyigikiwe n’ibihugu by’u Bushinwa na Leta Zunze Ubumwe z’Abasoviyeti, iy’Epfo ishyigikiwe n’u Burayi Leta Zunze Ubumwe za Amerika.

Ibihugu byinshi muri Afurika byari byarahisemo guca umubano n’ibindi bikoresha Communisme ari nacyo gice Koreya ya Ruguru yabarizwagamo kugira ngo ba shebuja b’i Burayi na Amerika babirebe neza, hato badakoma rutenderi ingoma zabo zigahirima.

Leta ya Habyarimana yashakaga ubufasha no kwimenyekanisha mu mahanga, yatangiye kugenda rwihishwa ikorana n’ibihugu bikoresha Communisme, dore ko muri ibyo bihe byatangaga inkunga itubutse kandi itariho amananiza menshi nk’ayo Amerika n’u Burayi bashyiragaho.

U Rwanda rwatangiye kwiyegereza Koreya ya Ruguru, nayo irarukundira umubano uratangira.

Tariki 15 Mata 1974 mu Rwanda haje itsinda ryo muri Koreya ya Ruguru riyobowe n’uwari Minisitiri wungirije w’ububanyi n’amahanga, Chun Nyung Soo, ryakirwa na Perezida Habyarimana.

Icyo gihe Radio Rwanda yatangaje ko Koreya ya Ruguru yemeye gufasha u Rwanda mu bijyanye n’amahugurwa y’urubyiruko, kubaka inzu mberabyombi y’urubyiruko n’ibindi.

Radio Rwanda kandi yavuze ko iryo tsinda ryashyikirije Habyarimana ubutumwa buvuye kuri Perezida, Kim il Song wa Koreya ya Ruguru.

Inyandiko z’ibanga za Ambasade ya Leta Zunze Ubumwe za Amerika mu Rwanda zo muri ibyo bihe zashyizwe hanze n’urubuga Wikileaks, zigaragaza ko Koreya ya Ruguru nyuma yaje no kwemera guha imyitozo urubyiruko rw’ishyaka MRND ryari ku butegetsi, gutoza abasirikare ibijyanye n’akarasisi n’ibindi.

Uruzinduko rw’intumwa za Koreya ya Ruguru mu Rwanda rwaje mu gihe Koreya zombi zari mu biganiro byo kwiyunga ariko bigatambamirwa n’ibindi bihugu bikomeye.

Abasesenguzi icyo gihe bavugaga ko Koreya ya Ruguru nta gihambaye yashakaga ku Rwanda kitari ijwi ryarwo mu Muryango w’Abibumbye.

Habyarimana icyo gihe yabwiye itsinda rya Koreya ya Ruguru ko u Rwanda rufata ikibazo kiri hagati ya Koreya zombi nk’icy’imbere mu gihugu gikwiriye gukemurwa hatajemo ukuboka kw’amahanga.

Umubano w’ibihugu byombi warakuze, ndetse Koreya ya Ruguru ifungura Ambasade yayo i Kigali.

Mu Ukwakira 1976, inyandiko z’ibanga za Ambasade ya Amerika zigaragaza ko Habyarimana afatanyije na Ambasade ya Koreya ya Ruguru, bashyizeho Komite yiga ku kongera kwiyunga kwa Koreya zombi. Inama yabereye mu nyubako z’uwari uhagarariye Koreya ya Ruguru mu Rwanda.

Iyo komite yari igizwe n’abajyanama muri MRND, Umuyobozi Mukuru ushinzwe Ububanyi n’Amahanga muri Perezidansi, abo muri Minisiteri y’ububanyi n’amahanga n’abandi.

Iyo nama yabaye buri buke ngo Umunyamabanga Mukuru wa MRND wafatwaga nk’umuntu wa kabiri ukomeye mu butegetsi, ajye mu ruzinduko i Pyongyang.

Iyo komite yashimwe cyane na Djeun Yeung Oun wari ushinzwe ibikorwa muri Ambasade ya Koreya ya Ruguru i Kigali, aho yavuze ko gushyiraho iyo komite bizongera ubushuti n’umubano mu by’ubukungu w’ibihugu byombi.

Nubwo u Rwanda rwakoraga ibishoboka byose ngo rushimishe Koreya ya Ruguru, byakorwaga mu ibanga rikomeye ngo ibihugu bya Amerika n’u Burayi bitabimenya.

Ibanga ryaje kumenyekana!

Mu 1976 intambara y’ubutita yari irimbanyije. Gufatwa n’abanyaburayi cyangwa abanyamerika ucuditse n’ibihugu by’Uburusiya, u Bushinwa n’abakorana nabyo, byari icyaha kitababarirwa.

Ibihugu bya Amerika n’u Burayi biciye muri Ambasade zabyo i Kigali, byaje kuvumbura ko u Rwanda ruri mu bushuti bwihariye na Koreya ya Ruguru.

Ubwo hari hashize iminsi Komite ishyizweho ndetse n’Umunyamabanga wa MRND avuye muri Koreya ya Ruguru, Ambasaderi w’u Bubiligi yahamgaje Minisitiri w’Ububanyi n’Amahanga w’u Rwanda, amusaba ibisobanuro ku mubano wihariye uhari na Koreya ya Ruguru.

Ambasaderi yamubwiye ko ababajwe no kuba u Rwanda ruri kugendera ku icengezamatwara rya Koreya ya Ruguru no guhengamira ku ruhande rumwe, avuga ko u Rwanda rukwiye kumenya neza inshuti z’u Burayi n’umwanzi wabwo.

Wikileaks igaragaza ko Minisitiri w’Ububanyi n’Amahanga w’u Rwanda yatunguwe, aryoshyaryoshya u Bubiligi, avuga ko umubano uri hagati y’u Rwanda na Koreya udakanganye.

Yavuze ko u Rwanda rushyigikiye kongera kwihuza kwa Koreya zombi, gusa yemera ko kuba barashinze komite yiga kuri icyo kibazo ntibazanemo Koreya y’Epfo kandi nayo biyireba, ari amakosa asabira imbabazi.

Yijeje u Bubiligi ko umubano w’u Rwanda n’icyo gihugu ndetse n’ibindi bihugu by’i Burayi na Amerika utazangizwa n’iryo shyirwaho rya Komite kuko icyerecyezo cy’ububanyi n’amahanga bw’u Rwanda bakizi neza.

Ambasaderi w’u Bubiligi yavuze ko yifuza kubona inyandiko z’ibyo Umunyamabanga Mukuru wa MRND yavugiye muri Koreya ya Ruguru, kugira ngo bemeze koko niba nta kindi cyihishe inyuma y’uwo mubano udasanzwe.

Habyarimana yasuye Koreya ya Ruguru ahasiga amacumu, ahabwa umudari

Ibihugu by’u Burayi na Amerika bimaze kwihanangiriza u Rwanda, rwagabanyije amarere ariko rukomeza kubana na Koreya ya Ruguru kuko yarufashaga muri byinshi.

Tariki 7 Kamena 1978, Habyarimana yahagurutse i Kigali agiye mu ruzinduko rw’iminsi icumi muri Koreya ya Ruguru no mu Bushinwa.

Yahagurutse ku kibuga cy’indege i Kanombe aherekejwe n’abantu 70, bagenda mu ndege yatanzwe n’u Bushinwa ya Boeing 107.

Uretse kuba uruzinduko rw’iminsi icumi rudasanzwe ku mukuru w’igihugu, bwari n’ubwa mbere Habyarimana agiye hanze aherekejwe n’abantu bangana gutyo, nkuko inyandiko za Ambasade ya Amerika zibigaragaza.

Habyarimana yakiriwe neza muri Koreya ya Ruguru no mu Bushinwa. I Pyongyang yakiriwe n’indirimbo za MRND zaririmbwe mu Kinyarwanda n’abana bo muri Koreya ya Ruguru.

Bivugwa ko Habyarimana yasigiye Perezida Kim Il-Sung amacumu nk’ikimenyetso cy’umubano mwiza, na we agororerwa umudari uzwi nka Order of the National Flag. Amacumu Habyarimana yatanze ari mu nzu ndangamurage yiswe International Friendship Exhibition, irimo impano Kim Il-Sung na Kim Jong-il bagiye bahabwa n’abanyamahanga.

Nyuma y’iminsi icumi, tariki 17 Kamena 1978, Habyarimana n’abo bari bajyanye bagarutse mu Rwanda.

Ageze ku kibuga cy’indege, yavuze ukuntu yashimishijwe n’umuhate w’Abashinwa n’Abanya-Koreya n’uburyo bamwijeje inkunga itubutse bazaha u Rwanda.

Icyo gihe Koreya ya Ruguru yavuze ko igiye kwihutisha umushinga wo kubaka ingoro y’urubyiruko no guhinga umuceri kuri hegitari 200 mu Rwanda.

Banatanze inkunga ijyanye n’imodoka zirekura amajwi n’amashusho zigenewe urubyiruko ndetse n’iz’Ikigo cy’amatangazo ya Leta, Orinfor.

Mu 1979, Koreya ya Ruguru yahaye u Rwanda ibijyanye n’intwaro za gisirikare imbunda zo mu bwoko bwa Howitzers, n’imbunda nini zishobora guhangana n’ibitero byo mu kirere.

Uwo mwaka kandi Koreya yemeye gufasha u Rwanda mu mishinga irimo uwo kubaka ikigo cy’amashuri cyakira abanyeshuri 400, kubaka ibitaro n’uruganda rw’ibireti.

Umubano w’u Rwanda na Koreya ya Ruguru warakomeje kugeza mu 1994 muri Jenoside yakorewe Abatutsi.

Nyuma yo guhagarika Jenoside, umubano w’u Rwanda na Koreya ya Ruguru wabaye nk’ukonje uretse ko n’ijambo rya Koreya ya Ruguru mu ruhando mpuzamahanga ryasaga nk’aho ntaryo, kandi intambara y’ubutita yatumaga ibihugu byiremamo udutsiko nayo yari yarahosheje.

Tariki 18 Kanama 2010, Kim Jong Il wayoboraga Koreya yoherereje ubutumwa bw’ishimwe Perezida Paul Kagame amushimira kuba yongeye gutorerwa manda ya kabiri ku majwi 93 %.

Ibiro Ntaramakuru bya Koreya, Korea News Services (KNS) byatangaje ko Kim yifurije ishya n’ihirwe Perezida Kagame ndetse ko yizeye iterambere ry’umubano w’ibihugu byombi.

Guhera mu 1994, nta mubano ushingiye kuri za ambasade ibihugu byombi bifite.

Leta ya Habyarimana imaze kwihanangirizwa, yagenje make mu mubano wayo na Koreya ya Ruguru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza