Impungenge ku musaruro w’impuguke zizacukumbura uruhare rw’u Bubiligi ku bukoloni mu Rwanda

Yanditswe na Ferdinand Maniraguha
Kuya 9 Nyakanga 2020 saa 06:59
Yasuwe :
0 0

Abantu batandukanye batangiye kugaragaza impungenge ku bizava mu bushakashatsi bw’impuguke zagenwe n’inzu ndangamurage ibitse amateka yo muri Afurika yo hagati, Musée Royal de l’Afrique Centrale iherereye i Tervuren mu Bubiligi, ku ruhare rw’u Bubiligi mu bukoloni bw’u Rwanda, Congo n’u Burundi.

U Bubiligi bwakolonije u Rwanda kuva mu 1916 busimbuye u Budage kugeza rubonye ubwigenge mu 1962. Ni kimwe mu bihugu bishinjwa guteza umwiryane ushingiye ku moko mu banyarwanda, byagejeje igihugu kuri Jenoside yakorewe Abatutsi.

Musée royal de l’Afrique Centrale (MRAC) iherutse gushyiraho Komisiyo izacukumbura uruhare rw’u Bubiligi mu bibazo byaranze ubukoloni bwabwo muri Afurika, ihita inasohora urutonde rw’impuguke 20 zizafasha iyo komisiyo.

Mu mpuguke zatanzwe harimo abanyafurika icumi n’Ababiligi icumi, hakabamo abagabo 12 n’abagore umunani.

Abanyarwanda bagize impungenge ku bagize izo mpuguke kubera ko harimo amazina azwi mu kugoreka amateka y’u Rwanda nk’Umwarimu Filip Reyntjens n’umunyamakuru Peter Verlinden.

Abagize ihuriro ry’Abanyarwanda baba mu Bubiligi, DRB-Rugari n’Ishyirahamwe ry’Abarokotse Jenoside yakorewe Abatutsi Ibuka Mémoire et Justice asbl, babaye aba mbere bagaragaje impungenge ku bizava mu icukumbura ry’izo mpuguke.

Bavuze ko impuguke nka Reyntjens na Verlinden uko bazwi “bihabanye cyane n’intego iyo Komisiyo yashyiriweho yo gushakisha ukuri ku mateka".

Bavuze ko agaciro k’iyo Kimisiyo kazagaragarira mu guha ijambo abanyafurika bagizweho ingaruka n’ubukoloni kandi bigakorwa mu murongo utari uwa gikoloni.

Umubiligi Filip Reyntjens, avuga ko ari inzobere mu mateka y’u Rwanda ndetse yanagize uruhare mu kwandika Itegeko Nshinga ku bwa Perezida Habyarimana, ryagize uruhare rukomeye mu guheza igice cy’Abanyarwanda.

Umubiligi Peter Verlinden na we yagaragaye kenshi ahamya ko habayeho Jenoside ebyiri, inyandiko ze zasohotse guhera mu 2008 zagaragazaga kurwanya gukomeye ubutegetsi buriho mu Rwanda.

Uretse mu Rwanda, u Bubiligi bushinjwa gukorera iyicarubozo abaturage ba Congo ubwo bwayikolonizaga

Umuyobozi w’Ingoro z’Umurage w’u Rwanda, Amb Masozera Robert yabwiye IGIHE ko igitekerezo cyo gukora icukumbura ku mateka y’ubukoloni bw’u Bubiligi ari cyiza, gusa ntiyemeranya n’uburyo impuguke zatoranyijwe.

Yagize ati “Ni ikintu cyiza gushyiraho iriya komisiyo kuko baravuga ko bashaka ko Ababiligi bamenya ukuri kugaragara, kuko hari byinshi buriya bibitse iwabo bitashyizwe ahagaragara , hari n’Ababiligi benshi b’iki gihe batamenye ukuri kwa biriya bintu bakiri imbata y’umurage w’ubukoloni.”

"Reyntjens na Verlinden ni ikibazo"

Ambasaderi Masozera yavuze ko impungenge bagifite ari uburyo icyo gitekerezo kizashyirwa mu bikorwa.

Yavuze ko gufata abantu nka Reyntjens na Verlinden bakajya mu mpuguke zizacukumbura ku Rwanda ari ikibazo.

Ati “Uwo [Reyntjens] uburyo tumuzi , uko tubona asesengura amateka y’u Rwanda, ni wa muntu wari umushakashatsi waje guhinduka abishyira ku ruhande aba umuntu ugoreka ku bushake amateka, ubona agamije kuyobya abantu. Ntabwo ari wa muntu wasesengura ibyo tutazi ngo atange inama yaganisha aho u Bubiligi buzamenya ukuri byaba ngombwa bugasaba imbabazi cyangwa bukiyunga n’u Rwanda.”

“Uruhande aherereyemo rurazwi ni ururwanya u Rwanda. Ashobora no kujya mu murongo wo guhishira ibibi byakozwe n’abakoloni. Komisiyo yakongera ikareba amazina babahaye, yabanza ikongera ikareba kuko harimo ahita agaragaza ko harimo ibibazo”.

Musée Royal de l’Afrique Centrale (MRAC) yashyizeho Komisiyo ishinzwe kugaragaza ukuri no kwiyunga, « Vérité et Réconciliation » ku hahise h’ubukoloni bw’u Bubiligi mu Rwanda, Congo n’u Burundi.

Impuguke 20 nizo zatanzwe ngo zizafatanye na Komisiyo gushakisha uruhare rw’u Bubiligi mu bukoloni muri Afurika.

Iyo komisiyo igomba kuba yagejeje ku Nteko Ishinga Amategeko imbanzirizamushinga y’ubwo bushakashatsi tariki 15 Nzeli 2020, hakagaragazwa ku ncamake h’ahahise h’u Bubiligi mu bukoloni, guhuza ibibazo by’irondamoko by’ahahise n’ibibazo by’ivanguraruhu biri kugaragara muri iyi minsi. Bafite kandi inshingano zo kugaragaza uruhare rw’ayo mateka ku burezi n’ubwiyunge.

Umuyobozi wungirije w’ishuri ry’imiyoborere muri Kaminuza y’u Rwanda, akaba impuguke mu mateka, Dr Nkaka Raphael, yabwiye IGIHE ko nubwo harimo abakemangwa nka Reyntjens na Verlinden, hari amahirwe ko harimo Abanyarwanda n’abandi banyafurika bazi ukuri kw’amateka.

Ati “Ntabwo Komisiyo ari urukiko. Nibabeshya bazanyomozwa kuko ibyo bazandika ntibizaba bifite imbaraga z’amategeko. Harimo abo ntishimiye nka Reyntjens. Ariko harimo abandi nshyigikiye nka Elikia M’bokolo cyangwa Dantes Singiza.”

Yavuze ko bitashoboka ko izo mpuguke zishyirwaho uko buri wese abishaka ariko uzabeshya amateka kandi ukuri kuzwi azanyomozwa.

Ati “Bareke bakore, nibatabikora neza tuzabanyomoza ariko kuvuga ngo uriya akwiye kuvamo nta cyo naba nshingiyeho, namureka agakora, yabeshya nkamunyomoza. Ni abashakashatsi si abacamanza.”

Izo mpuguke zizafasha Komisiyo gucukumbura ukuri k’u Bubiligi ku hahise habwo muri Afurika ziyobowe na Guy Vanthemsche wigisha muri Vrije universiteit Brussel, (VUB) , umwungirije ni umunyamateka Isidore Ndaywel é Nziem (Université de Kinshasa). Umunyamabanga ni umunyamateka Bérengère Piret (Université Saint-Louis) .

Harimo abanyarwanda babiri barimo Olivia Rutezibwa wigisha muri Kaminuza ya Portsmouth na Dantès Singiza ukora muri Musée Royal de l’Afrique Centrale.

Uretse uruhare mu bibazo by’amoko byaranze u Rwanda mu gihe cy’ubukoloni na nyuma yabwo, u Bubiligi bunashinjwa iyicarubozo muri Congo. Kuva mu 1885 kugeza mu 1908, miliyoni z’abanye-congo zari zimaze gupfa zishwe, ziciwe amaboko, zikubiswe kubera ibikorwa by’ubugizi bwa nabi byabaga byategetswe n’umwami Léopold II wayoboraga u Bubiligi.

Filip Reyntjens ni umwe mu bashakashatsi ushinjwa kubogama cyane iyo avuga ku birebana n'u Rwanda
Umunyamakuru Peter Verlinden azwiho kutavuga neza Leta y'u Rwanda ari nayo mpamvu hibazwa ku buziranenge bw'ibizava mu icukumbura yagizemo uruhare
Guy Vanthemsche wigisha muri Vrije universiteit Brussel niwe wagizwe umuyobozi w'itsinda ry'impuguke
Umunye-Congo Elikia M’bokolo ni umwe mu mpuguke zizacukumbura uruhare rw'u Bubiligi mu bukoloni muri Afurika
Umunyamateka Isidore Ndaywel é Nziem wigisha muri Université de Kinshasa ni umwe mu mpuguke
Olivia Rutezibwa yigisha muri Kaminuza ya Portsmouth
Umunyarwanda akaba n'umuhanga mu mateka, Dr Dantes Singiza ni umwe mu banyafurika icumi bashyizwe mu itsinda ry'impuguke

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .