00:00:00 IGIHE NETWORK KN KINYARWANDA EN ENGLISH FR FRANCAIS

Impamvu twese duterekera

Yanditswe na Nsanzabera Jean de Dieu
Kuya 19 June 2022 saa 12:47
Yasuwe :

Imyaka 120 irihiritse Abanyarwanda bahora bikubita mu gatuza, bakamagana n’ijwi rirenga ko batandukanye no guterekera nk’umuhango wa gipagani badatinya no kwifatira ku gahanga bavuga n’ijwi rirenga ko abakurambere bawukoraga bari abapagani mu rwego ruhanitse.

Iyo usuzumanye ubushishozi, ukabona abo bose biyasira bavuga ayo magambo y’ipfobyamuco ngo batandukanye n’imihango gakondo ya gipagani yo guterekera, usanga ari abana b’ejo mu gitondo n’abakuru bataraba ubukombe.

Iyo myitwarire idahwitse, yo kurwanya no kwamagana ibyo badasobanukiwe, iteye inkeke kuko irimo ipfobyamuco ryo mu rwego rwo hejuru, ariko riniganjemo ubuswa bwinshi bwo kwamagana ibyabaritse mu mutima no mu bwenge kandi bahora babikora, bagasoza bagaragaza ko batandukanye na byo kandi aribyo bahoramo.

Guterekera, nta bwo ari umuhango nkezamana nk’uko benshi babyigishijwe na bo bakabitwarira iyo bigoramiye. Gutekerekera ni umuhango mbonezamubano uhuza abariho n’abakurambere babo batakiriho.

Dukurikije ibikorwa n’imiterere y’umuhango wo guterekera mu mateka y’u Rwanda, usanga ari ijambo ry’impine ryunze amuga abiri ari yo “Guteka” no “Gutereka”. Mu Ikeshamvugo rya Kinyarwanda, guteka bivuga kwicara k’umwami cyangwa undi munyacyubahiro, na ho gutereka bikavuga gushyikiriza imbaga y’abantu bateranye bahuje n’umugambi umwe, ibiribwa n’ibinyobwa ngo basangire.

Guterekera ni ukwibuka Abakurambere b’Intwari babayeho mu muryango nyarwanda. Ni umurimo uhuzaga, abariho n’Abakurambere babo batakiriho (Abazimu n’Abazima) mu rwego rwo kubibuka. Mu guterekera, hibukwaga Intwari z’Abakurambere gusa, nta bigwari byibukwaga.

Guterekera, ni umurimo ukorwaga kenshi, nk’uko amadini yigisha abantu gusenga buri teka. Nta muntu washoboraga kumara iminsi myinshi cyangwa ukwezi, adaterekereye.

Bitewe nuko Guterekera byakorwaga mu buryo bwo kwibuka no kuzirikana intwari z’Abakurambere zo mu muryango uyu n’uyu, byose bigamije guha agaciro Abakurambere bubatse ishyanga iri n’iri no kuzirikana umurage basize mu iyubakagihugu cyabo.

Guterekera bikorwa mu buryo bwo kwita umwana izina ry’umukurambere w’igihangange wabayeho mu muryango uyu n’uyu. Noneho uko bamuhamagara iryo izina, bakaba banibuka uwo mukurambere w’intwari bakomokaho, bitiriye uwo mwana. Ari nayo mpamvu mu muco w’Abanyarwanda, usanga baziririza kwita izina ridafite ibigwi, kugira ngo umwana baryise ritazamwokama.

Guterekera kandi bikorwa no mu buryo bwo gutekereza amateka y’umukurambere wo mu muryango uyu n’uyu. Bishaka kuvuga ko iyo abantu bateranye baganira ku mateka y’ibikorwa bya kanaka, baba barimo kumuterekera.

Guterekera kandi, bikorwa mu buryo bwo gushyiraho umunsi ngarukamwaka wo kwibuka nyakwigendera cyangwa izindi ntwari z’igihugu, hagakorwa imigenzo runaka yo kubibuka, abantu bagasangira ari na ko bavuga amateka yabaranze.

Ibi bigaragaza ko nta muntu ubaho adaterekera, ahubwo nuko habayeho kuyobya amateka, hakaba ubwo abantu baterekera abakurambere batari ababo. Nko kwibuka abatagatifu b’Abanyaburayi, nk’aho bakwibutse Abakurambere mpangarwanda, barwubatse rukaganza, ruhamije igitinyiro.

Gucwekera kw’imigenzo myiza ya Kinyarwanda irimo no guterekera byaturutse ku butumwa Leopold II wari umwami w’u Bubiligi yahaye Abamisiyoneri b’amadini ubwo binjiraga mu iyogezabutumwa muri Afurika. Ubu butumwa yabubahaye mu mpera z’umwaka wa 1885, ubwo biteguraga kuza kwamaza iyogezabutumwa muri Afurika.
Yagize ati “ Muzabakuremo kuzirikana intwari zabo no kuzifataho ibyitegererezo, mubateremo umutima wo gukunda no kwiyambaza intwari z’iwacu gusa”.

Kuva mu wa 1900, bakigera mu Rwanda imihango n’imigenzo nyarwanda yose batangiye kuyigera amajanja ngo bayikureho. Uwo bahereyeho kandi wari ukomeye mu bihango by’Abanyarwanda ni uwo guterekera. Batangira guhimba ibinyoma byabaye gikwira mu Rwanda ko guterekera ari icyaha.

Guterekera wari umuhango mwiza abanyarwanda bakoraga bibuka intwari n'abandi bakoze ibyiza batakiriho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .