00:00:00 IGIHE NETWORK KN KINYARWANDA EN ENGLISH FR FRANCAIS

Impamvu Habyarimana yagiye guhura na FPR Inkotanyi mu ndege kandi hateguwe imodoka

Yanditswe na Ferdinand Maniraguha
Kuya 21 Ukuboza 2022 saa 07:23
Yasuwe :

Guhera tariki 19 kugeza tariki 25 Nyakanga mu mwaka wa 1993, i Kinihira mu karere ka Rulindo kuri ubu FPR Inkotanyi yaharaniraga kubohora u Rwanda yahakoreye ibiganiro na Guverinoma y’u Rwanda yari iyobowe na Perezida Juvenal Habyarimana.

Intego kwari ugushakira umuti intambara yari imaze imyaka itatu ibahuje, aho FPR Inkotanyi yasabaga ko impunzi ziganjemo Abatutsi zahejejwe ishyanga zitaha, kandi igihugu kikagendera ku iyubahirizwa ry’amategeko ntawe uhejwe azizwa uwo ari we.

Ibiganiro byasojwe no gusinya ku mpande zombi, icyo gihe Perezida Juvenal Habyarimana aza ahagarariye Leta. Byari biteganyijwe ko Habyarimana aza mu modoka nk’ibisanzwe ariko mu buryo butunguranye ahagera mu ndege ya kajugujugu.

Bamwe bavuga ko yaba yaragize ubwoba ko ashobora kugabwaho ibitero dore ko ibice by’Amajyaruguru bigana i Kinihira byari mu maboko y’ingabo za FPR Inkotanyi.

Cprl (rtd) Senkeri Salathiel icyo gihe yari umwe mu barinda Perezida Habyarimana ndetse bari bajyanye i Kinihira.

Uyu musaza kuri ubu utuye mu karere ka Rubavu, yasobanuye uko byagenze ngo Habyarimana agende mu ndege kandi yaragombaga kugenda mu modoka.

Mu kiganiro cyihariye yahaye IGIHE yagize ati “Yagombaga kugenda n’imodoka noneho habaho umunsi mubi atinya ubunyereri. Hari hapanzwe n’imodoka zo kujyayo ziranagenda ariko bavuga ko kugira ngo yihute kandi anagende neza, agomba kugenda na kajugujugu.”

I Kinihira yari mu gace ingabo za RPA zari zimenyereye dore ko byinshi mu bice bihakikije yari yarabyigaruriye inahafite ibirindiro. Byasabye Guverinoma ya Habyarimana koherezayo ingabo uwo munsi ngo zibanze gusuzume niba umutekano we uza kuba wizewe.

Senkeri ni umwe mu bari bageze i Kinihira aho yagiye mu modoka y’intambara izwi nka blindé, yagombaga kwifashishwa gucunga umutekano wa Habyarimana.

Yavuze ko nta butumwa bw’umwihariko bari bahawe uwo munsi bw’uko imodoka zitwaye Perezida zishobora kuraswaho, icyakora ngo ni amakuru bari bamaze igihe babwirwa.

Ati “Bavugaga ko ashobora kuraswa igihe icyo aricyo cyose, twagendaga twiteguye ibyo nkuko twavaga kuri Perezidansi duti birashoboka. Hari ahantu habaga hateye inkeke nka Remera, tugakeka hano kuri CND [Inteko Ishinga Amategeko] , aho hantu twabaga tuhafite mu mutwe ku buryo twahatinyaga. Twagiye [Kinihira] tuvuga ngo wenda birushijeho kuko tugiye mu gace karimo imbaraga zabo.”

Amasezerano ya Kinihira yemereraga FPR gutangira ibikorwa bya politiki nk’ishyaka ryemewe mu gihugu hamwe n’aya Arusha yasinywe tariki 4 Kanama 1993, ntabwo yigeze yubahirizwa kugeza kuwa 7 Mata 1994 ubwo Jenoside yakorerwaga Abatutsi yatangiraga, Ingabo za FPR zigafata umwanzuro wo kuyihagarika.

Imwe mu ndege za kajugujugu igisirikare cya Habyarimana cyakoreshaga. Zakozwe n'uruganda Aérospatiale Gazelle rwo mu Bufaransa
Senkeri avuga ko byabaye ngombwa ko Habyarimana ajya i Kinihira na kajugujugu kuko hari haramutse umunsi mubi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .