00:00:00 IGIHE NETWORK KN KINYARWANDA EN ENGLISH FR FRANCAIS

Ikinyoma cyabeshyewe Abacyaba imyaka ikaba ibaye amagana

Yanditswe na Nsanzabera Jean de Dieu
Kuya 31 May 2022 saa 09:15
Yasuwe :

Imyaka yihiritse ari amagana inkuru zarabaye kimomo ngo “Abacyaba batera umwaku”;wasesengura ukabura imvano y’icyo gihuha ukaba wanakwibaza uwagikwirakwije kugeza ubwo cyambuka ibinyejana byinshi nta we uragihagarika.

Hari igihe uba mu gihugu ukumva ibyo amatwi agushyira wakora ubusesenguzi bwimbitse ukabona bihabanye n’ukuri kw’ibiriho ukumva biteye ikibazo kinini.

Igitabo “Intwari z’imbanza, zubatse u Rwanda rugahamya igitinyiro”, cya Nsanzabera Jean de Dieu, havugwamo byinshi byaranze umurage w’Abacyaba mu mateka y’ u Rwanda ari naho harimo bimwe byahinduriwe igisobanuro kibakururira kubeshyerwa ko batera umwaku.

Igihe cyaregeze Gihanga cyahanze u Rwanda ashaka gutanga umurage mu bana be icyenda yabyaye ku bagore be bane. Icyo gitekerezo akomeza kukinoza ariko asanga umukobwa we w’ikinege Nyirarucyaba hatazwi aho aherereye, nyuma yo gukora amahano yo kwica mukase Nyirampirangwe akamufomoza umwana w’umuhungu waje kwitwa Gafomo .

Gihanga intasi ze zamubwiye ko Nyirarucyaba muri kwa guhunga kwe yagiye mu ishyamba ahura n’inyeshyamba y’ umuhigi yitwa Kazigaba nuko baribanira babyarana abana batandatu aribo Kagara (Gacyaba), Kanage, Karashi, Kabuguma, Karandura na Rusengo.

Mu nama y’umushyikirano yabereye i Nyamirembe ya Humure ahasaga mu wa 1120, Gihanga yahaye abana be umurage n’abana ba Nyirarucyaba uko ari batandatu baraganwa na ba nyirarume.

Abacyaba ni bamwe mu bafite inkomoko mu gicumbi gikuru cy’imiryango y’Abanyiginya bahawe imirage myinshi nyuma y’Abega kuko Abacyaba bahawe imirage igera kuri itanu, ari nayo yabaremyemo gukora cyane bityo bagwiza ubuhangange

Umurage wa mbere Gihanga yahaye Abacyaba ni igisigara cy’ubutaka bwari hagati y’u Bunyoro, Ndorwa, Burera, Rwankeli y’Abalindi na Rwankeli y’abaguyane. Baremyemo igihugu cy’igihangange cyitwa “ Bugara”.

Igihugu cy’u Bugara, cyari giherereye hagati y’ibiyaga bya Burera na Ruhondo, bigashorera muri Mukungwa, kikagera no mu Bufumbira. Tubibutse ko iyo bavuze Abacyaba, buri wese yakagombye kumva umuryango w’abakomoka ku bana batandatu ba Nyirarucyaba.

Barazwe kuba Abatangampundu b’ingoma y’i Rwanda ari na bo bari bashinzwe gukomera amashyi no kuvuza impundu mu bitaramo by’ibwami cyane cyane mu bitaramo mvarugamba. Nibo ni bo bari bashinzwe kongera akanyabugabo (Morale) mu ngabo zose zigiye guhangana n’umwanzi.

Baraziherekezaga, baririmba, babyina amashyi ari urufaya n’impundu z’urwanaga. Bagera mu rugero urugamba rutamitse, bagasubira inyuma bagataha mu ngo za bo.

Ni bo bari bafite umurage wo kwaha no gufata impumbya z’urugamba ingabo z’u Rwanda zagiyemo. Bishatse kuvuga ko iyo bakubukaga mu rugendo rwo guherekeza ingabo z’u Rwanda zagiye ku rugerero rwo guhangana n’umwanzi, basubiraga mu byimbo byabo, bagakora umugenzo wo kwaha impumbya no gufata iry’iburyo, mu rwego rwo kwifuriza intsinzi ingabo zagiye ku rugamba.

Uwo wo murimo wo kwaha impumbya bagombaga kuwukora amanywa n’ijoro igihe cyose u Rwanda rufite urugamba ruriho, bakabihagarika ari uko urugamba rurangiye.

Nk’uko izina ryabo riri, Abacyaba bahawe umurage wo kuba Abatsuramubano (Abadipolomate), bashinzwe kubanira u Rwanda no kurusabanisha n’amahanga aruzengurutse, cyane cyane ko bari bahawe n’igihugu cya kure mu rwego rwo kwamamaza amatwara y’ihuzabihugu yashyiriweho umukono i Nkotsi ba Bikara ahasaga mu wa 1100.

Undi murage Abacyaba bahawe, wacishije ururondogogoro abatazi intekerezo z’i Rwanda bakabigoreka, ni uko ari bo bahawe umurage wo kuba “Abahennyi b’i Rwanda”. Inshingano za bo zari i zo kuvuma abanzi b’u Rwanda. Kuva ku ngoma ya Gihanga, ni bo bari Abanyamihango b’ibwami bashinzwe kuvuma Ababisha badakunda u Rwanda.

Kugeza ku ndunduro y’ingoma ya cyami, Abacyaba bari bakiri abaragwa bo kuvuma ababisha badakunda u Rwanda.

Kubera ipfobyamateka ryagiye ribaho mu bihe bitandukanye rigamije kwangisha Abanyarwanda politiki ya cyami no guteranya imiryango migari y’Abanyarwanda ngo yishishane hagati ya bo, ni bwo bageze ku Bacyaba buririra ku murage bahawe wo kuba “Abahennyi b’i Rwanda”, barema ikinyoma ko bari abateramwaku.

Mu murage abacyaha bahawe harimo no kuba abahennyi b'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .