Ibigwi by’intwari mu kirango cy’impeta z’ubutwari mu Rwanda rwo hambere

Yanditswe na Nsanzabera Jean de Dieu
Kuya 5 Kanama 2020 saa 02:21
Yasuwe :
0 0

Mu mateka y’umushinga wo kubaka u Rwanda, cyane cyane mu gisata cy’urugamba rwo kwagura u Rwanda no guhashya abagomeramurage wa Gihanga w’igihugu gisangiwe, habayemo intwari zitagira ingano zitimbiye kukirasanira no kugihanganira n’abatagikunda. Nuko abami b’u Rwanda, nabo babigira intego ntagamburuzwa ko bazajya babaha impeta z’ishimwe n’ingororano ku bw’ubutwari bagaragaje mu guhanganira u Rwanda.

Icyakwitabwaho cyane ku bazasoma aya mateka, ni uko impeta z’ubutwari n’ingororano z’intwari zose zatangwaga umuntu akiriho abona n’amaso ye bakamushagara bishimye nawe abibona bakifatanya gutegura ibyo birori byizihie umutima n’amaso.

Nta munyarwanda ubarwa nk’intwari atakiriho nk’uko benshi babivuga, iyo n’imyumvire dukomora ku bakoroni n’Abanyamadini. Kuva ubwo, mu mibereho y’Abanyarwanda, ubutarushwa n’intsinzi biba intego y’ibihe byose. Muri iyi nkuru tukaba tugiye kubataturira impeta z’ubutwari zatangwaga mu Rwanda rwo hambere.

Nk’uko tubikesha igitabo:” Intwari z’Imbanza, zubatse u Rwanda rugahamya igitinyiro” cyanditswe na’Umusizi Nsanzabera Jean de Dieu, inzobere mu muco, amateka n’ubuvanganzo, tugiye kubataturira iby’ayo mateka y’impitabihe ku mitangirwe u’impeta z’ishimwe mu Rwanda rwo hambere.

Mu mateka y’u Rwanda, umwami Ruganzu Ndoli, niwe waciye iteka rishyiraho impeta z’ishimwe zihabwa ingabo zatsinze urugamba n’umugayo w’ibigwari byatengushye igihugu bigaharira abandi umurimo wo kuruhanganira bonyine. Gusa muri iyi nkuru ikigamijwe ni ukubatekerereza iby’impeta z’ubutwari, naho iby’umugayo w’ibigwari byo n’iby’ubutaha.

Umwami Ruganzu Ndoli wakunze kwitwa Cyambarantama mu mateka y’u Rwanda, yatwaye u Rwanda mu bihe bikomeye aho rwari rumaze imyaka isaga 11 ruraranze, nyuma y’amahano yadutse mu bikomangoma byo kwa Gahima bikarwanira ingoma. Juru na murumuna we Bamara bakica mukuru wabo Ndahiro Cyamatare agatanga adatanze.

Bitewe nuko Ruganzu Ndoli yari afite akazi katoroshye ko gushimangira igitinyiro cy’igihugu cy’u Rwanda mu mahanga aruzengurutse no kwihimura ku bapfakaje u Rwanda bakica se Ndahiro Cyamatare na Nyina Nyabacuzi, Ndoli yashakishije ikintu cyatuma abaturage ayoboye n’Ingabo bari kumwe mu igababitero byo koromya amahanga bayagusha ruhabo, bagira ubushake bwo kwitabira no kwitangira igihugu mu mugambi ukomeye barimo w’umushinga wo kubaka u Rwanda, wari ugeze kure mu bitero byo kwagura igihugu no gukomeza guhashya abagomeramurage wa Gihanga w’igihugu gisangiwe.

Muri icyo kibariro, ni bwo yaciye iteka ritanga ingororano ku ntwari zagaragaje ubudasa muri buri gikorwa cyerekeranye na gahunda yari yimirije imbere. Ruganzu Ndoli, niwe wagennye inzego z’Intwari bwa mbere mu mateka y’u Rwanda, anaca iteka rigena impeta z’ubutwari n’ibindi bagomba kugabana.

Izo mpeta z’ubutwari, zatumaga Abanyarwanda barushaho gushira amanga no kurwana ishyaka ryo kwikura mu bucakara bw’amahanga no kwigarurira ibihugu. Inzego z’Intwari n’Impeta zahabwaga Intwari uhereye ku ngoma ya Ruganzu Ndoli, zari titeye zitya:

Umudende: Umudende yari impeta y’ubutwari yambikwaga Intwari yicaga ababisha barindwi ku rugamba ibatsinze mu itsimbiro. Uwo mudende wari icyuma kimeze nk’umukwege bambaraga mu ijosi gitunzweho amashinjo (ibyuma bicuze nk’umuhunda ucuritse birimo amarebe nk’ayo mu nzogera).

Usibye kumwambika uwo mudende, yanahabwaga amashyo y’inka, ubundi agatunga agatunganirwa. Impeta y’umudende, ni imwe mu mpeta zagiraga imihango n’imiziririzo iruhije cyane. Uwahawe umudende, yagombaga kuwubagira buri gihe, hakaba n’ibyo atagombaga kurya no kunywa kubera uwo mudende yabaga atunze.

Impamvu yatumaga Umudende ugira imihango myinshi iruhije kandi itandukanye ni uko ariwo mpeta y’ubutwari yatangwaga bwa mbere ku ntwari yivuganye ababisha ku rugamba. Bityo uyihawe, akaba yaragombaga guhirimbana kugeza ku munota wa nyuma akarwana inkundura ariko akora ibikorwa by’ubutwari bituma ava kuri iyo mpeta akajya ku yindi.

Yagombaga kuruhuka ari uko ageze ku mpeta y’ubutwari ikurikiyeho y’Impotore. Noneho akaba aruhutse imiruho n’imihati y’imihango yasabwaga ku mpeta y’ubutwari y’Umudende.

Impotore: Impotore ni impeta y’ubutwari yambikwaga umuntu wivuganye ababisha cyangwa abanyamahanga 14 abatsinze mu rukubo. Nyuma y’urugamba yambikwaga umuringa usa n’amazi uzinze nk’inyabubiri akawambara ku kuboko kw’iburyo. Usibye kumwambika uwo muringa, yanahabwaga amashyo y’Inka, ubundi agatunga agatunganirwa.

Hari n’abahabwaga Amasibo y’inka, Bisangwa bya Rugombituri niwe wahawe inka nyinshi mu mateka y’u Rwanda, kuko yahawe Isanzu ryose, kubera kuba umugaba w’igihangange mu bihe bya Rwabugili, aho yatwaraga ingabo z’Ingangurarugo.

Gucana Uruti: Impeta y’ikirenga mu Rwanda rwo hambere yari iyo; ‘Gucana uruti’. Iyo mpeta yahabwaga umuntu wishe ababisha 21 ku rugamba, abatsinze mu itsimbiro. Kugira ngo ayihabwe ibwami haberaga imihango ikomeye ikitabirwa n’umwami ubwe.

Uwo muntu wacanye uruti, yabaga yubashywe bitavugwa akanafatwa nk’Intwari y’ikirenga koko!!! Yagabirwaga Inka nyinshi z’Amashyo n’Amasibo, n’imisozi yo gutegeka, agasonerwa kujya ku rugamba, ahubwo akaba umutekereza n’umujyanama w’ibitero byo kwagura igihugu.

Ibyo bikagaragazwa n’uko yafataga icumu rye, akarishinga mu muriro igiti rikwikiyemo kigashya nk’ikimenyetso cy’uko asoje urugamba atazongera kurusubiraho, ari nayo yabaye inkomoko y’iryo zina.

Gusa uwabaga yahawe ingororano zo gucana uruti yari afite amabwiriza akomeye agomba kubahiriza, kuko iyo yagororerwaga bene kariya kageni, ntabwo yongeraga guhura n’umwami yacaniyeho uruti ngo barebane amaso ku maso kugeza atanze, kuko nta bihanga bibiri mu nkono imwe, nta bihangange bibiri mu gihugu kimwe.

Mu mabwiriza y’ubwiru butanga impeta y’ishimwe k’uwacanye uruti, ni uko yagombaga gutura kure y’ibwami ndetse ku nkiko z’u Rwanda n’ibindi bihugu.

Kubera izo mpeta zose, zaba izahawe Impotore, uwahawe Umudende n’uwacanye uruti, zatumaga uwagize ubutwari abiratira abandi mu kivugo cyabimburiga kandi kikanasoza ikintu cyose avuze. Ibyo byatumaga umunyarwanda wese aharanira kuba Intwari bityo agashira ubwoba ku rugamba.

Usibye no kubaha impeta z’ubutwari, ingabo zose zatsinze urugamba zagabanaga iminyago, ugasanga urugo rufite ingabo y’igihugu, ari rwo rukomeye. Uwo mujyo wo kugabira Intwari iminyago no kubaha impeta z’Ubutwari, watumye u Rwanda rubona abana benshi bagana mu itorero kugira ngo bigiremo ibyo kuba Intwari n’imyitozo njyarugamba.

Nuko abitabira kuba Ingabo z’igihugu baba benshi u Rwanda rugira imitwe y’Ingabo myinshi, ku buryo byakangaranyije amahanga aruzengurutse, agatangira kwibaza uko azifata imbere y’igihugu cy’u Rwanda.

U Rwanda rwarinze rwinjira mu gihe cy’ubukoroni mu ndunduro y’Ingoma ya Rwabugili rumaze kugwiza imitwe y’ingabo igera kuri 170. Mu gihe rwahanganywe n’imitwe y’ingabo irindwi mu bihe by’ingoma ya Gihanga ahasaga mu wa 1091, kugeza ku ngoma ya Ruganzu Bwimba ahasaga mu wa 1345.

Kubera ishyaka ry’u Rwanda ryagaragaye ku rugamba ruruhanganira, byageze mu bihe by’ubukoroni abaturage bagifite umutima n’ubushake bwo kwitabira kurasanira igihugu, kubera ibanga ryo gushima no kugabira Intwari ryimakajwe n’Abakurambere mpangarwanda babimburiwe na Ruganzu Ndoli.

Ingabo z'u Rwanda zagabye ibitero byinshi zirabitsinda zimwe zihabwa impeta z'ubutwari

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .