00:00:00 IGIHE NETWORK KN KINYARWANDA EN ENGLISH FR FRANCAIS

Amateka y’Ibimana by’inzuki, ibiti byameze ahahambwe ikimasa cy’umwami i Rutunga

Yanditswe na Nsanzabera Jean de Dieu
Kuya 26 January 2022 saa 09:09
Yasuwe :

Hirya no hino mu Rwanda, hanyanyagiye byinshi mu bimenyetso ndangamateka bihamya neza ko iki n’iki cyabayeho mu mateka y’u Rwanda.

Byinshi muri ibyo bimenyetso bibitse amateka ya mbere y’uko u Rwanda rubaho, ihangwa n’iyubakwa ryarwo n’ibikorwa byakozwe bigasiga umugani.

Umurenge wa Rutunga wo mu Karere ka Gasabo ni umwe muri 416 igize u Rwanda, ubitse amateka menshi y’ihangwa ry’urw’Imisozi 1000, iturwa ryarwo, isenyuka ryarwo ndetse na bimwe mu bimenyetso byo kongera kubaho kwa rwo.

Nta mugayo kuko n’ubundi Rutunga rwa Gasabo, ni ho hakomoka amateka yo kubaho k’u Rwanda, dore ko ariho habaye intebe ya mbere y’ihangwa ry’ u Rwanda, ari na ho ukura icyubahiro cyo kuba sekuruza w’imirenge yose uko ari 416.

Mu bimenyetso ndangamateka biboneka i Rutunga rwa Gasabo, hari n’ibiti bitangaje kubera amateka byagize mu kuranga ibihamya by’ihihibikana ry’abakurambere mpangarwanda ngo bagire ubuzima buzira umuze n’imibereho izira amakemwa.

Hari n’ibindi bihari bigaragaza ububasha abakurambere mpangarwanda bari bafite mu kurema imitsindo ibatsindira ibyago. Ibyo biti bitangaje, ni byo mu mateka y’u Rwanda byiswe "Ku mana y’inzuki”.

Ni ibiti biherereye mu Mudugudu wa Nyamise wo mu Kagari ka Kabaliza ko mu Murenge wa Rutunga mu Karere ka Gasabo.

Ku “Ku mana y’inzuki” haboneka ibiti by’imivumu byiremye mu bitsina bitatu. Bamwe bavuga ko byakomotse kuri kimwe cyahameze mu rwego rwo kubyarira imana zeze. Hari umuhanda unyura hagati ya byo.

Ibyo biti biri ahantu kuva kera hatuwe n’umuryango w’abitwa Abareka bafite inkomoko kwa Sebireka ari we Sekuruza wa bo bakuraho inyito (Bakomoka mu muryango mugari w’Abanyiginya mu nzu y’Abakobwa). Bahoze ari abatahira b’Inka za Kigeli IV Rwabugili.

Amateka agaragaza ko mu nka z’umwe mu bami ba kera, higeze kubamo ikimasa cy’urutare, kikitwa Rutare, umwami akagikunda cyane.

Cyari imfizi ifite umwihariko kuko yabyaraga inyana gusa. Kimaze gupfa, aho cyashyinguwe hamera igiti. Rutare imaze gupfa, umutahira w’umwami, witwaga Sebireka yarongoye indi nka, ajya kubimenyesha umwami.

Umwami yategetse ko ikimasa Rutare bagishyingura hafi y’aho bari batuye, kandi bigakorwa mu mihango yihariye ngo kugira ngo urupfu rwa cyo rudakukira mu ishyo ryose.

Kera kabaye, aho bashyinguye icyo kimasa haje kumera igiti cyo mu bwoko bw’umuvumu cyagiye gikura kibyara n’ibindi bifite amashami y’inganzamarumbu.

Hashize igihe inzuki zaje kugitaha, kandi zikakibamo ari nyinshi cyane. Ubuki bahakuyemo bukajya bugemurwa ibwami. Kuva ubwo cyiswe ‘Ikimana cy’inzuki’, cyaje gushibukaho ibindi byinshi, byose biza kwitwa ‘Ibimana by’inzuki.’

Muri ibyo biti harimo ibinogo, bitahamo inzuki. Amateka avuga ko Umwami yategetse ko bakirinda kuko havagamo ubuki.

Igihe kimwe uwitwa Kalimba wari Umunyamabanga wa Rudahigwa, yagiye gukoresha imihanda i Rutunga rwa Gasabo. We yari atuye i Nyamagana ya Karuranga rwa Rutunga rwa Gasabo.

Muri ibyo biti yahacishije umuhanda ugihari na bugingo n’ubu, bimwe muri ibyo biti barabyangiza. Nyuma y’aho yaje kurwara igituntu kiza no kumuhitana.

Rubanda bati “Bya bimana yasagariye ni byo bimusamye, biramuhitanye da!”.

Ibiti bimwe biri mu muhanda rwagati. Ibindi birawegereye cyane, bigenda byangizwa n’abahisi n’abagenzi, ku buryo bitabungabunzwe mu myaka iri imbere byazazima burundu.

Kubera imihanda ihari inyurwamo n'abanyamaguru n'ibinyabiziga, imbuga yabyo yahindutse nk'igikumba, nta buhumekero bifite
Mu Murenge wa Rutunga rwa Gasabo, ni wo ubonekamo ibyo biti by'imana y'inzuki bibibitse amateka y'u Rwanda akomeye
Ni ibiti binyurwamo n'ibinyabiziga, bibyangiza kubera kubinyura iruhande n'icumbi ribyima ubuhehere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .