00:00:00 IGIHE NETWORK KN KINYARWANDA EN ENGLISH FR FRANCAIS

Amashirakinyoma ku miryango bavuga ko itera umwaku

Yanditswe na Nsanzabera Jean de Dieu
Kuya 14 June 2022 saa 06:02
Yasuwe :

Mu njore y’amateka y’u Rwanda ashingiye ku iyororoka ry’Abanyarwanda mu miryango migari bakomokamo, ntitwabuze no kwinjira mu gikari, ngo tubatekerereze imyenda yuzuyemo ibizinga yahabonetse, ubwo imiryango migari yakatazaga mu gushinga imizi n’imiganda mu murage bajejwe.

Aho bamwe bubakaga umurage bahawe no kuzuza inshingano za bo mu mushinga wo kubaka u Rwanda, abandi bagomera umurage w’ubupfura n’ubudahemuka barazwe n’abakuru b’ibicumbi bikuru by’imiryango, babaye imbanza mpangamiryango dufite ubu. Abagomeramurage babayeho, ni bo babaye inkomoko y’imvugo yabaye kimomo mu Rwanda no mu gihugu birukikije, y’uko habaho imiryango migari itera umwaku.

Nk’uko amateka y’impitabihe ku gihugu cy’u Rwanda abitugaragariza, cyane cyane mu mibereho n’imibanire ya bo, hari ahagaragaye ibidutekerereza ko hari imiryango migari y’Abanyarwanda itera umwaku. Ese koko yaba ibaho? Ese ubundi umwaku ni iki? Waba uterwa n’iki?

Igitabo: ’’Iyororoka ry’Abanyarwanda, inkomoko y’imiryango migari” kigendeye ku biboneka mu ruhererekanemvugo rw’amateka y’u Rwanda, cyabacukumburiye byimazeyo, kibagerera kure ku mashirakinyoma y’iyo miryango bavuga ko itera umwaku. Gusa iyo miryango yagiweho n’icyo cyasha, yagiriwe ibanga muri iki gitabo, mu rwego rwo kubumbatira ituze n’umutekano muri rubanda, no kwirinda ipfunwe by’abashobora kwibona muri yo, nk’abakomoka muri iyo miryango yavuzweho icyo cyasha.

Ubushakashatsi bwasanze mu by’ukuri bivugwa mu mateka y’u Rwanda ko hari imiryango migari itera umwaku ari ukuri, inkomoko y’iyo mvugo yo gutera umwaku, igakomoka ahanini ku muvumo babaga baravumwe n’abakurambere babo mu bihe runaka kubera impamvu runaka.

Ubuteramwaku bw’ iyo miryango, kenshi bukomoka ku ndangagaciro na za kirazira babaga barirengagije mu mibereho n’imibanire n’abandi, bazirengaho bikabakururira umuvumo w’ababavumye, ukabokama mu ruhererekane-maraso na bugingo n’ubu.

Uko gukora ibizira no kurenga ku mahame agenga imico mbonera y’ubumuntu, ni byo byakuruye uwo muvumo benshi bakunze kwita umwaku. Gutera umwaku bikomoka ahanini ku miziro uba wararenze bakakuvuma, ingaruka z’uwo muvumo, ni zo ahanini bakunze kwita umwaku.

Mu myumvire y’igenantekerezo ry’Abanyarwanda bemeraga ko uwo bavumye n’Imana iba imuvumye, ingaruka z’ibyo yakoze zikamugeraho n’Imana imuhagarikiye, aho ni ho hagiye hagaragara benshi mu bagiye bagwirirwa n’akaga gakomoka ku ishyano babaga bagushije i Rwanda, kuko babavumiraga ku mana yeze, bakagwirirwa n’umurage w’umuvumo bagombaga guhererekanya mu miryango yabo, imyaka n’imyaniko.

Habayeho imiryango migari ibiri n’inzu y’umuryango mugari umwe, yakoze ibikorwa biyambika icyasha cyo kuba abateramwaku. Imvano yo kuba abateramwaku, ifite ibirari by’igihe kirekire kuko bihera ahasaga mu wa 700 mu kibariro cy’ibihe byacu. Mushobora kwibaza muti kuba abateramwaku, byaba byaraturutse he?.

Muri icyo kibariro, umugabo umwe na murumuna we ndetse n’umuhungu we bavuye mu Rwanda, bajya kwiba inka mu Bahima b’Ababanyankore. Bibye inka mu bice bya za Bufumbira barahayogoza bagera no muri za Kabare, ariko amateka akaba agaragaza ko Abanyakabare ari bo babahaye ibirari by’aho bajya kwiba izo nka.

Muri uko kwiba inka, babigize umuco w’igihe kirekire, abatunzi bo muri ibyo bice babura inka, ntibamenye irengero ryazo. Kuko iminsi y’umujura ibaze, bageze igihe barafatwa, biyemeza kubaryoza inka zose bibye muri ako karere, barabafashe babajyana ku mutware wariho muri iyo misozi, babanza kubaraguriza ngo babanze kumenya abo ari bo babone n’uko babafatira ibihano birimo kwicwa.

Indagu zarabimanye kuko zasanze kubica byaba ari ukwikora mu nda kuko basanze ari bene wabo babakomokaho, kuko benshi mu Banyarwanda bafitanye isano ya hafi n’Abahima. Barangije bafata umwanzuro wo kubavumira ku mana yeze (Umutima w’imfizi babaze), kugira ngo uwo mwuga mubi bahisemo uzabokame kandi bazawuzire.

Bamaze kubavuma barabarekura, ariko babavuma imivumo igera kuri ine mibi by’akaburarugero yabokamye kugeza magingo aya ubwo aya mateka yandikwaga. Iyo mu mivumo bavumwe ni iyi ikurikira:

Umuvumo wa mbere bavumwe, ni uwo kuzapfa batoroye inka: kuko ari yo babafatiyeho igihanga baje kuziba, ikindi cyatumye babavuma uwo muvumo, ni uko inka yari ubukungu bw’ikirenga mu Rwanda no mu bihugu birukikije, bityo, uwakwangaga wese, uwaguhaga igihano gisumbye ibindi, yakuvutsaka korora inka.

Kuva icyo gihe uturere twose bagiye baturamo mu Rwanda, kimwe na za Kabare n’u Bufumbira muri Uganda, babahaye inzira zo kunyuramo bayogoza inka wahasangaga ubworozi bw’ihene n’intama gusa ukongeraho n’imikeno itagira ingano y’imbwa.

Babavumye kokamwa n’ubujura cyane cyane ubw’inka: Mu mivumo y’Abanyarwanda bakundaga kuvuma umuntu wafatiwe mu cyuho yiba, bagiraga bati: "Uzapfe urwo", bishaka kuvuga ko icyo cyaha yafatiwemo n’ubundi kizamwokame kugeza ku ndunduro y’ubuzima bwe, ndetse azakigwemo. Ni ko byagendekeye iyo miryango, kubera gufatirwa mu bujura bw’inka, bavumwe kuzokamwa n’ubujura bw’inka, kugeza ku bisekuruza by’ibihe ibihumbi.

Kandi byarahamye, kuko hari abakomoka muri iyo miryango benshi bari bakomeye mu Rwanda, ariko bakarenga bakiba inka. Kugira ngo bazimangatanye ibimenyetso biranga izo nka babaga baribye, bazicaga amahembe, bagatwika uruhu rwayo, igahindura ibara, ku buryo na nyirayo atabasha kuyimenya, Ubujura bavumwe kuzokamwa na bwo, si ubw’inka gusa, ni ukokamwa n’ingeso mbi z’ubujura bw’uburyo bwose

Iyo miryango yavumwe kudatanga imbuto. Mu muvumo yo miryango yavumwe, harimo no kudatanga imbuto, ushaka kubiba imbuto yayisaba muri iyo miryango, ntimere! N’iyo imeze ikabemba! Itabemba, ikera ariko ikabora cyangwa se ikamungirwa ku ruti kandi mu murima. Ibitabaye ibyo, umurima wose ukanjamwa n’ibyonnyi. Ukomoka muri iyo miryango, uciye igitoki mu nsina zawe, ntizongera kwana! Unyuze mu myubati akarandura umwe, isigaye ntishore, cyangwa ikaborera ku giti! Uciye igihaza, ibisusa n’ubututu ku ruyuzi, ruruma cyangwa se ibisigeyaho bikabora!.

Iyo miryango yavumwe umuvumo wo kudatanga abageni: Kubera imivumo y’ingeri nyinshi yokamye iyo miryango, byageze na ho igera no mu rushako. Babavumye kudatanga abageni. Abantu babashakamo (Babakuramo umugore), bahuraga n’akaga ko kutabyara, kubyara bapfusha, gukuramo inda, kutagira umwero w’ubutaka, kutarumbura amatungo n’ibindi. Kudashakwamo kw’iyo miryango migari, byatumye abayigize bahera mu bwigunge, bagashakana bo ubwa bo bonyine.

Usibye ko abagabo bakomoka muri iyo miryango bo bashoboraga gushaka mu yindi miryango migari itari iyo bakomokamo, bakagira ihirwe, ariko benshi bahoraga basenya kuko hari ingeso nyinshi babaga bafite zitatumaga bihanganirwa n’abagore babo nk’ubujura butunguranye kandi budafite impamvu n’ibindi.

Muri make, imivumo yavumwe iyo miryango yagiye kwiba inka mu Bahima b’Abanyankore, wagiye mu bintu byose: ariko umuvumo wa bo ukabamo ibice bitandukanye, hari aho wabaga mu muri iyo miryango hagati ya bo, hakaba n’uwavaga muri iyo miryango ujya mu bandi batari bo.

Mu guhangana n’umwaku wavanga muri iyo miryango yavumwe, ujya mu bandi batari bo, abakomoka mu yindi miryango y’Abanyarwanda, bagiye bashyiraho uburyo bwo gukumira iyo myaku yokamye iyo miryango kugira ngo itabageraho kandi babashe kubana na yo no gushyikirana nta nkomyi. Ni bwo bagiye barema imigenzo imwe n’imwe y’abaturanyi babo yo kohera uwo mwaku nko:

Kunywa amazi mu gitondo, Guhekenya impeke z’amasaka Kuvuga imvugo zimwe na zimwe zohera iyo myaku, aho bagiraga bati: " Nabanje Imana" Ubwo akabona gusohoka mu rugo ajya mu mirimo yo hanze cyangwa se ahandi hose ashobora kuba yahurira n’abo muri ubwo bwoko bw’abatera umwaku.

Mu gutsinda abo batera umwaku: Hari n’igihe babitsindishaga kuvuga kimwe mu bintu uwo muteramwaku akunda. Aho nk’iyo babaga baturanye n’umuteramwaku ukunda itabi, bavaga mu rugo babanje kuritekera kabone n’ubwo batarinywaga, cyangwa bakivugisha ngo: Sinava mu rugo ntatekeye itabi, Sinava mu rugo ntanyweye mu gikatsi, Sinava mu rugo ntatamiye akajumba….»

Kutavuga amazina yabo nyayo: Hari n’aho bafataga amazina y’abo bateramwaku, bakayahinduramo amazina yo kubatsinda kuko baramutse bavuze uwo muntu utera umwaku mu izina rye, wabahama. Ibyo byatumaga benshi babahimba amazina muri ubu buryo: Rukara=Runoir, Ruhamanya=Ruhago, Byimana=Byavu, Byamungu=Byotsi, Nyiringango=Nyirimbogo, Byungura=Nyirishyamba, Gafora= Ahoruhiniye, Gashabizi = Gabiro n’ayandi.

Ahantu hatuye abateramwaku benshi ugasanga bahise irindi zina byo kuhatsinda. Ni ba hitwaga ku Gaseke, ukumva abantu bahita mu Kebo.

Igihanitse kuri ibyo, ni uko iyo bavumaga umuntu mu buryo bw’ikirenga, igihugu cyose cyarabimenyaga n ‘ibihugu by’abaturanyi bikabimenya, kuko hatangwaga impuruza ko uwo muntu ari ikivume n’igicamuke mu isi no mu gihugu, abantu bagomba kumuha akato iyo umuvumo yavumwe ukamushyiramo, cyangwa se bakagira ibyo bamwirindaho. Uko ni ko umuvumo n’ubuteramwaku bw’iyo miryango byagiye byamamara bikamenyekana ko ibaho, bikageza no mu bihe byacu.

Gusa kubera ubuhangange mu by’ubushakashatsi n’ubuhanga mu buvuzi gakondo, Abanyarwanda baremye uburyo bukoreshwa mu kuzirura imiziro yabaga yakuruwe n’iyo miryango yagwiririwe n’umuvumo wo gutera umwaku, kugira ngo babashe kubana na bo, basangire ubuzima n’ubusabane.

Imwe mu miziro bashyizeho yabashije kumenyekana, harimo ahanini ishingiye ku kuzirura umukobwa wo muri uwo muryango mu gihe agiye gushyingirwa mu muryango badahuje umuryango mugari. Imwe mu migenzo yakorwaga, ni iyi ikurikira:

Iyo bajyaga gushyingira mu muryango adahuje inkomoko, bababanzaga gukora imihango yo kugira ngo bohere iyo mivumo. Imwe mihango bakoraga na n’ubu igikorwa harimo nko kubwejuza imbwa ( Gukubitira imbwa ku nkomo ikabwejura inshuro eshatu) mbere y’uko umugeni asohoka mu irembo agiye gushyingirwa, yamara kubwejura izo nshuro, bagakurikizaho kuvuza mpundu, umugeni akabona gusohoka.

Mbere y’uko umusore washyingiwe umukobwa ukomoka muri iyo miryango yavumwe, atangira umuhango wo kurongora, umusore yaryamaga ku buriri ahagana k’urwuririro, ubundi nyamukobwa akamurenga akajya mu kiryamo cye, ubundi umuhango ukabona gukorwa.

Kandi cyaraziraga ko umugabo washatse muri iyo miryango, abyuka mbere y’umugore mu gitondo, umugore ni we wabanzaga akamurenga, umugabo agakurikiraho. Kimwe no kuryama umugabo yarabanzaga, umugore agakurikiraho akamurenga. Iyo migenzo igahoraho kandi
igakurikirana ityo kugeza ku ndunduro y’ubuzima bwa bo.

Kugira ngo umugore ukomoka muri iyo miryango y’abateramwaku aho yashatse baramye umuryango n’ubutunzi, basabwaga kumwitirira ibintu byose mu rugo rw’umugabo we, aho bagiraga bati: "Inka ni iza nyirakanaka, ibishyimbo ni ibya nyirakanaka, amasaka ni aya nyirakanaka” n’iyindi.

Iyo mihango iyo itakorwaga, byakururiga ubuvukasi n’ubukenyuke bw’umuryango we ndetse bikaba byawuviramo guhona. Icyo aya mateka atugaragarije, hakurikijwe ibyo dutekererejwe haruguru, ni uko gutera umwaku, atari umwihariko w’umuryango mugari uyu n’uyu, ahubwo ko umuryango wese warenga ku miziro y’ibintu byaziririjwe, ugahura n’ingaruka zikakaye, na wo wakwinjira mu ruhando rw’abateramwaku, bakoreye igihugu ibara, bakazanira imiryango yabo, icyago, icyagane n’ubuvukasi.

Uru akaba ari urugero rumwe dutanze mu buryo buziguye bw’ibyatumye bamwe bitwa abateramwaku, ariko bitakiri ingorabahizi kuwubabona ho, kuko imigenzo yagiye ikuraho uwo muvumo, yagiye iba myinshi, abayikoze bagahanagurwaho icyo cyasha, n’ababa bakiwufite hagakorwa imigenzo yo kuwohera.

Imiryango y'abanyarwanda yirwanyeho kugira ngo yohere umwaku wokamye bagenzi babo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .