U Rwanda rwakajije ingamba zo kurwanya Ebola, abarenga 300 bayikingirwa buri munsi i Rubavu

Yanditswe na Twarabanye Venuste
Kuya 20 Mutarama 2020 saa 07:44
Yasuwe :
0 0

Minisiteri y’Ubuzima ikomeje gushyira imbaraga mu kurwanya Ebola no kwitegura uko yakwita ku murwayi wayo igihe yaba agaragaye aho ariho hose mu Rwanda.

Imibare yo ku wa 14 Mutarama 2020 yerekana ko abapfuye bazize Ebola muri Repubulika Iharanira Demokarasi ya Congo bageze ku 2236 bavuye ku 2000 babarurwaga muri Nzeri 2019 ni mu gihe abo imaze kugaragaraho muri rusange ari 3288 kuva mu 2018.

Mu mwaka ushize amakuru yumvikanye ko Ebola yagaragaye mu Ntara ya Kivu y’Amajyaruguru na Ituri no hafi y’imipaka ishyira Uburengerazuba bw’u Rwanda.

Ibyo byatumye Minisiteri y’Ubuzima mu Rwanda ifata ingamba zitandukanye zo gukumira icyo cyorezo. Hubatswe ibyumba abakekwaho icyo cyorezo bashyirwamo hategerejwe ambulance ku mipaka ya Rubavu na Rusizi ndetse hatangizwa n’ubukangurambaga bwo gukangurira abanyarwanda kwirinda icyo cyorezo.

Ibyumba byubatswe hafi ya Camera zishobora gutahura umurwayi wa Ebola hagendewe ku muriro afite. Camera zireba abashaka kwambuka umupaka bafite umuriro wa dogre Celsius 38 ni mu gihe ubushyuhe bw’umuntu udafite ikibazo buba hagati ya 36 na 37. Iyo zimubonye zitanga intabaza akajya kwitabwaho n’abaganga.

Indi ngamba n’iy’ubukangurambaga bwiswe ‘Umurinzi’ bugamije gukingira abagera ku 200 000 biganjemo abakora ubucuruzi hagati y’u Rwanda na RDC. Ni urukingo rutemewe ku bana bari munsi y’imyaka ibiri n’abagore batwite.

Ku ikubitiro rwahawe abagera ku 3 000 barimo abaganga n’abandi bakora mu rwego rw’ubuzima umwaka ushize naho abagera kuri 336 bakora ibikorwa byambukiranya umupaka w’u Rwanda na Repubulika Iharanira Demokarasi ya Congo mu Karere ka Rubavu bakingirwa buri munsi.

Umuyobozi w’Ibitaro by’icyitegererezo bya Rubavu, Dr William Kanyankore avuga gukingirwa ari ubushake kandi ko bibanda ku bakora ubucuruzi kuri uwo mupaka kubera ko ari bo bafite ibyago byinshi byo kwandura.

Ati “Gukingirwa ni ubushake nta wubihatirwa abo tureba cyane ni abakora ubucuruzi bwambukiranya umupaka wa Congo kuko ari bo bafite ibyago byo kwandura iyo virusi.”

Ni urukingo rwemejwe n’Ishami ry’umuryango w’Abibumbye ryita ku buzima, OMS. Umaze gufata urukingo ajyanwa mu cyumba amaramo iminota igera kuri 15 harebwa niba nta ngaruka rwamugizeho.

Aho uwo Ebola yagaragaraho yafashirizwa

Ibitaro by’icyitegererezo bya Rubavu biherereye mu Karere ka Rubavu, ni bimwe mu bifite ibyangombwa by’icyumba cyihariye cyo kwita ku murwayi wa Ebola igihe yaba agaragaye.

Bifite icyumba cyitaruye kandi cyubatse ku buryo umurwayi wa Ebola atagira aho ahurira n’abandi hirindwa ko yabanduza.

Umurwayi atwarwa mu modoka itwara abarwayi ’ambulance’ nta muganga bari kumwe kandi ntanaho yahurira n’umushoferi umutwaye.

Iyo umurwayi ashobora kwigenza yakirwa n’abaganga babiri bambaye ku buryo bwagenwe yaba atabishoboye akakirwa na bane bambaye ku buryo batagira aho bahurira na we.

Hakurikiraho kumujyana muri cya cyumba kitagerwamo n’undi muntu uretse umurwayi n’abaganga bipfutse ku buryo bushoboka. Umurwayi akimara gukurwa muri ambulance, ihita isukurwa hakoreshejwe umuti wica udukoko (0.5 Chlorine).

Abaganga nabo iyo bavuye kureba umurwayi bakaraba uwo muti inshuro nyinshi bagakoresha n’indi miti mbere yo gukuramo imyambaro ibarinda.

Ni imyenda iteganyijwe ko yambarwa mu minota 50 kubera ko iba ishyushye kandi ipfutse cyane ku buryo guhumeka bitorohera abayambaye.

Ahavurirwa Ebola hafite icyumba kijyanwamo abari koroherwa bakitwabwaho. Iyo umurwayi apfuye hari aho umuryango we ushobora kumurebera ariko batamwegereye. Kubera ko umurambo w’uwazize Ebola wanduza cyane.

Kugeza ubu u Rwanda rwubatse ahantu hatandukanye mu turere twa Rubavu na Rusizi no mu Mujyi wa Kigali, abagaragaraho Ebola bajyanwa bakitabwaho kandi n’abaganga bo kubitaho barahuguwe. Ambulance eshatu zihariye nazo zarateguwe.

Miliyoni $17 zimaze gukoreshwa mu bikorwa byo kwirinda ko hagira umunyarwanda wandura Virusi ya Ebola no gutegura uburyo bwo kwita ku wo yagaragaraho.

Nubwo ibyo byose byakozwe, Abanyarwanda basabwa kwirinda bakurikiza inama bahabwa zo kwirinda Ebola.

Gukaraba intoki ni imwe mu ngamba zo kwirinda Ebola

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza