U Rwanda ruhagaze rute mu gukumira Ebola ikomeje kwica benshi muri RDC?

Yanditswe na Evariste Nsengimana
Kuya 24 Ukuboza 2018 saa 05:53
Yasuwe :
0 0

Nubwo icyorezo cya Ebola kimaze iminsi cyibasiye Repubulika iharanira Demokarasi ya Congo (RDC), kitaragaragara ku butaka bw’u Rwanda, hari byinshi rwakoze hagamijwe gukumira ko cyahagera no gufasha uwagira ibyago byo kuyirwara.

Mu cyumweru gishize, Minisiteri y’Ubuzima muri RDC yatangaje ko abantu basaga 300 bamaze kwicwa na Ebola. Muri 542 bavuzweho ibimenyetso byayo mu Ntara ya Kivu y’Amajyaruguru, 494 barayisanganywe.

Kuva muri Kanama Ebola yongeye kugaragara muri RDC ku nshuro ya 10, U Rwanda n’ibindi bihugu bihana imbibi n’Intara z’iki gihugu byatangiye kwirinda ko yagera ku butaka bwabyo.

Mu Kiganiro cyatambutse kuri Radiyo Rwanda kuri iki cyumweru, Minisitiri w’Ubuzima, Dr. Gashumba Diane, yavuze ko ‘Igihugu cyacu gihora cyiteguye kurinda ubuzima bw’abanyarwanda kugira ngo hatagira ikibahungabanya, birimo ibyorezo nka Ebola.’

Mu byakozwe harimo kongera ubukangurambaga ku rwego rw’umudugudu hifashishijwe abajyanama b’Ubuzima, abaturage basobanuriwe Ebola, ibimenyetso byayo n’ibyo bakora mu gihe hari ugaragaje ibimenyetso byayo hagamijwe kwirinda ko yayikwirakwiza mu bandi.

Dr. Gashumba yavuze ko ubukangurambaga bugamije kongera kwibutsa abanyarwanda ko kuba batarya inyama z’inkende Ebola yanduriramo cyane, hari ubundi buryo bayandura.

Hari no kwirinda ingendo zambukiranya imipaka zitari ngombwa, n’uko abazikora bakwitwara nko kwirinda gukora ku wagaragaje ibimenyetso bya Ebola.

Ubukangurambaga bwakorewe mu Turere 13 dukora ku mipaka ya Uganda na Congo na dutatu tw’Umujyi wa Kigali, twegereye ikibuga cy’indege no mu bitangazamakuru.

Minisitiri Gashumba ati “Ubundi nta kibazo twagakwiye kugira ariko kuko igihugu cyacu kigendwa, abaturage bacu nabo bagenderera ibihugu by’abaturanyi, icyo kibazo gishobora kwinjira mu Rwanda tutabaye maso.”

Mu bimenyetso bihita bigaragara ku urwaye Ebola ni uguhinda umuriro, gucika intege, kubabara mu ngingo, kubabara umutwe no mu muhogo, bishobora kugaragara nyuma y’iminsi ibiri kugeza kuri 21 nyuma y’ubwandu.

Ishami ry’umuryango w’Abibumbye ryita ku Buzima (OMS) rivuga ko ibi bimenyetso umuntu ashobora kubanza kubyitiranya n’iby’izindi ndwara nka Malaria, Tifoyide cyangwa Mugiga.

Hari ibindi bimenyetso birimo nko guhitwa, kuruka cyane kandi kenshi, kuribwa mu nda no kuva amaraso ahantu hose hari umwenge ku mubiri w’umuntu.

Dr. Gashumba yavuze ko ubu u Rwanda rufite Laboratwari zishobora gupima umuntu waketsweho Ebola, zikagaragaza niba ayifite cyangwa atayifite, rukagira imiti n’abaganga bashobora kumufasha.

Ibi bishimangirwa n’umwitozo wiswe ‘Kumira Ebola Simulation Exercise’ wo guhangana n’iki cyorezo, uheruka gukorerwa mu bitaro bya Gisirikare i Kanombe n’abaganga b’u Rwanda.

Uretse ibyo Minisiteri y’Ubuzima inagaragaza ko yagiye ihugura abakozi batandukanye bashinzwe Ubuzima mu Turere n’ab’Ibitaro byatwo, iby’Intara n’ibya Kaminuza no mu Mirenge.

Minisitiri Gashumba yakomeje agira ati “Igihugu cyacu kiritegura kwakira inkingo za Ebola, dukingiza abantu begereye umuntu wagaragaje ibimenyetso byayo.”

Umuryango w’Abaganga Batagira Umupaka (MSF) uvuga ko Ebola ari cyo cyorezo gitwara ubuzima bw’abantu benshi ku Isi, kigafatwa nk’indwara yandura cyane; ishobora kwica 90% by’abayanduye, igateza ihahamuka n’ubwoba muri rubanda kandi ntigire urukingo.

Ebola yandurira mu matembabuzi nk’amacandwe , ibimwira, amaraso, amazirantoki, ibirutsi n’ibindi by’umurwayi wayo.

Minisitiri w'ubuzima, Dr Diane Gashumba avuga ko u Rwanda rwakoze ibishoboka mu gukumira Ebola

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza