Sobanukirwa indwara ya Asima ikunze kwibasira abantu mu bihe by’ubukonje ikaba yanabica (Video)

Yanditswe na Evariste Nsengimana
Kuya 16 Werurwe 2020 saa 01:24
Yasuwe :
0 0

Inzobere mu by’ubuzima zivuga ko Asima/Asthma ari indwara ikunze kwibasira imyanya y’ubuhumekero, ituma uduheha tujyana tukanavana umwuka mu bihaha tubyimba kandi tukikanyaga bigatuma umwuka udatembera mu bihaha uko bikwiye.

Umuyobozi w’ishami rishinzwe kuvura indembe mu bitaro bya Muhima, akaba n’umuganga w’indwara rusange, Dr Maniraguha Yeze Aimée Victoire, yabwiye IGIHE ko Asima yibasira abantu b’ibyiciro byose.

Ati “Akenshi Asima ni indwara y’uruhererekane mu miryango bitewe n’uburyo abasirikare b’umubiri bitwara igihe bahuye n’ikintu kidasanzwe (Allergies).”

Ubusanzwe Allergies ziterwa n’ibintu byinshi birimo kuba zahererekanywa mu muryango, imiterere y’ikirere, imiterere y’umwuka cyangwa impumuro y’amavuta, isabune, amarangi n’ibindi.

Asima akenshi iyo umuntu yayanduye bitewe n’uko hari umwe mu bo bafitanye isano wayirwaye, atangira kugaragaza ibimenyetso akiri umwana.

Ati “Uretse ko no mu bantu bakuru bashobora kubigaragaza mu bwana batarigeze babigaragaza. Igira ibimenyetso byo kunanirwa guhumeka, umuntu akumva igituza kiraremereye, guhumeka bikanga, yasohora umwuka ukumva bivuga nk’agapusi.”

Itabi n’umubyibuho ukabije biri mu bikunze gushyirwa ku rutonde rw’imbarutso yo kurwara indwara ya Asima.

Dr Maniraguha ati “N’umubyibuho ukabije, ibinure bigenda bifunga ya miheha ijyana umwuka na byo bishobora gutera Asima. Ni bimwe mu bitera Asima ku bantu bakuru, bidaturutse mu miryango.”

Ubusanzwe nibura 80% by’abantu barware Asima usanga ari bo baba barayanduye bitewe n’uko hari umuntu bafitanye isano mu muryango uyirwaye cyangwa mu batakiriho wayirwaye. Ibyo ngo bituma kuyirinda ari ibintu bigora kuko umuntu ashobora kwirinda nibura 20% bisigaye.

Ati “Biragoye kwirinda ikintu cyaturutse ku bakurambere bawe. Gusa iyo umaze kumenya ikibigutera, niba ugirwaho ingaruka n’imiterere y’ikirere ushobora kwifubika, kwirinda ahari ivumbi rikabije, kwirinda impumuro zikugiraho ingaruka. Iyo byanze habaho ubuvuzi.”

Ku bana usanga ibimenyetso bya Asima bitinda kugaragara, bisaba igihe kirekire n’ubushishozi kugira ngo umuntu abe yatahura ko ayirwaye.

Dr Maniraguha ati “Gusa usanga umwana akorora cyane cyane nijoro, ugasanga umwana ntasinzira, mu gitondo akaba afite ibitotsi, ugasanga ntakurikira neza mu ishuri. Icyo gihe utangira kumuvuza kare. Hari imiti bamuha igabanya ubukana bwa allergies igatuma ugabanya kugira ikibazo cya asima, bimwe twita ‘Crise’.”

Akenshi icyo kibazo umuntu iyo akigize ananirwa guhumeka, kuvuga bikanga. Iyo bimaze umwanya urenze iminota itatu bishobora gutuma umuntu apfa. Iyo umuntu abimenye kare, akihutira kwivuza kugira ngo bitamugiraho izindi ngaruka zirimo nko kwangirika kw’imiheha ijyana umwuka.

Dr Maniraguha avuga ko asima ikunda gukara cyane mu mezi arangwamo imvura nka Werurwe, Mata, Nzeri n’Ukwakira.

Ati “Iyo imvura igiye kugwa akenshi hari umuyaga uzamuka, umubiri w’urwaye Asima ugatangira kugaragaza ibimenyetso, akiyumvamo ko atangiye gufungana, ananiwe guhumeka cyangwa akumva amazuru yafunze.”

Asima ishobora gutuma umuntu arwara izindi ndwara zirimo nk’umutima, umuvuduko w’amaraso bitewe n’uko ibihaha bikorana bya hafi n’umutima.

Dr Maniraguha ati “Umuntu usanzwe uzi ko agira asima tumugira inama yo guhorana kariya gapompe kabongerera umwuka igihe cyose kuko iyo afashwe ahita agakoresha. Iyo afashwe umwegereye, ikintu cyihutirwa ni ukumukorera ubutabazi bwihuse kugira ngo agere kwa muganga bamufashe.”

Asima ni imwe mu ndwara zidakira umuntu asabwa guhora yitwararitse yirinda ingaruka zayo zirimo kubura umwuka. Ni imwe mu zikomeje kwiyongera mu banyarwanda bitewe n’ihindagurika ry’ibihe bitewe n’ukwiyongera kw’ibyuka biva mu nganda n’ibindi.

Uyirwaye asabwa kwisuzumisha inshuro nyinshi nibura rimwe mu kwezi kandi agakurikiza amabwiriza ahabwa n’umuganga. Gusa ikibazo kiriho ni uko ubuvuzi bway0 usanga bukiri hejuru ku buryo nk’uwo imaze kurenga bimusaba imiti ihenze. Nka pompe iri mu zifashishwa mu kubongerera umwuka nibura igura 20 000Frw.

Ikigo cy’Abanyamerika gishinzwe gukumira indwara muri Amerika kigaragaza ko nibura umuntu umwe muri 13 aba afite ikibazo cya Asima mu gihe muri rusange muri Amerika abayirwaye barenga miliyoni 25.

Ishami ry’umuryango w’Abibumbye ryita ku buzima (OMS) rigaragaza ko mu 2015 ku Isi abarwaye Asima barengaga miliyoni 235 mu gihe abarenga ibihumbi 338 ibica.

Dr Maniraguha Yeze Aimée Victoire asobanura ko indwara ya Asima ishobora no kuba uruhererekane rw'umuryango

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .