Nyanza: Abarwara Malaria bavuye ku bihumbi 180 bagera ku bihumbi 50

Yanditswe na Prudence Kwizera
Kuya 2 Werurwe 2020 saa 08:22
Yasuwe :
0 0

Imibare itangwa n’inzego z’ubuzima mu Karere ka Nyanza yerekana ko abarwara Malaria bagabanutse ku buryo bugaragara kubera ingamba zashyizweho zigamije kuyikumira no kuyirwanya.

Byatangajwe n’Ubuyobozi bw’Ibitaro by’Akarere ka Nyanza kuri uyu wa Mbere, tariki ya 2 Werurwe 2020, ubwo hatangizwaga ku mugaragaro igikorwa cyo gutera umuti wica imibu itera Malaria mu nzu z’abaturage.

Umuyobozi Mukuru w’Ibitaro bya Nyanza, Dr Tuyishime Emille, yavuze ko ubukangurambaga bwakozwe mu baturage ku kwirinda Malaria no kuyivuza hakiri kare ku bayirwaye bwatanze umusaruro mwiza.

Ati “Mu 2015 mu mavuriro twakiraga abantu barenga ibihumbi 180 barwaye Malaria ariko mu 2019 twakiriye abatarenga ibihumbi 50 mu karere kose.’’

Yakomeje avuga ko mu 2019 mu Karere ka Nyanza nta muntu wishwe na malaria ariko bihe byashize hari ubwo hapfaga abagera kuri 44 mu mwaka umwe.

Dr Tuyishime yagaragaje ko ibyatumye Malaria ihashywa birimo serivisi zo kuyivura zitangwa n’abajyanama b’ubuzima mu buryo bwihuse kandi bukorerwa hafi y’abaturage mu ngo; abaturage bivuza kare ntibanduze abandi; gutera imiti yica imibu mu nzu z’abaturage; kuvanaho ibinogo n’ibidendezi imibu ishobora kororokeramo; kuryama mu nzitiramibu iteye umuti n’ibindi.

Bamwe mu baturage bo mu Karere ka Nyanza babwiye IGIHE ko bamaze imyaka irenga itatu batarwara Malaria kandi mbere hari n’abayirwaga buri kwezi.

Ntihinyuzwa ati “Kuva natangira kurara mu nzitiramibu bakaduterera n’imiti mu nzu nta Malaria mperuka kurwara; hashize imyaka irenga ibiri. Ubundi buryo nkoresha mu kuyirinda ni ukuvanaho ibihuru byakorora imibu, nkakuraho ibiziba byarekamo amazi.”

Nyirakamana Françoise wo mu Murenge wa Kigoma na we avuga ko adaheruka kurwara Malaria bitewe n’ingamba yafashe.

Ati “Nubahiriza ingamba zose zo kuyirinda; umwana wanjye ni we uheruka kuyirwara ariko hashize nk’umwaka kandi naketse ko umubu wamuririye hanze kuko aryama mu nzitiramibu kandi inzu yacu bari bayiteyemo umuti. Nahise muvuza ahita akira ntabwo yamuzahaje.”

Umuyobozi w’Akarere ka Nyanza, Ntazinda Erasme, yavuze ko ingamba zo kurwanya Malaria no kuyikumira zikomeje gushyirwamo ingufu hagamijwe kuyirandura burundu. Yasabye abaturage gukomeza gukurikiza inama bagirwa zigamije kuyihashya.

Mu Karere ka Nyanza igikorwa ngarukamwaka cyo gutera umuti wica imibu mu nzu z’abaturage kiri kuba ku nshuro ya kane; kizamara iminsi 20 aho hazaterwa inzu zirenga ibihumbi 80.

Ibipimo byo mu 2019 by’Ikigo cy’Igihugu cy’Ubuzima, RBC, byerekanye ko Malaria iri mu Rwanda 80% iri mu Ntara y’Amajyepfo n’i Burasirazuba, kandi Nyanza, Gisagara na Huye ari two turere two mu Majyepfo twibasiwe kurusha utundi.

Abaturage bo mu Karere ka Nyanza bemeza ko badaheruka kurwara cyangwa kurwaza Malaria kuko bubahiriza amabwiriza yo kuyirinda
Bamwe mu batera umuti wica imibu mu nzu z'abaturage bari biteguye gutangira igikorwa kuri uyu wa Mbere
Gutera umuti wica imibu mu nzu z'abaturage ni kimwe mu byafashije mu guhashya Malaria
Inzu zirenga ibihumbi 80 nizo zizaterwamo umuti wica imibu
Umuyobozi Mukuru w’Ibitaro bya Nyanza, Dr Tuyishime Emille, aganira n'itangazamakuru
Umuyobozi w’Akarere ka Nyanza, Ntazinda Erasme, yavuze ko ingamba zo kurwanya Malaria no kuyikumira zikomeje gushyirwamo ingufu hagamijwe kuyirandura burundu

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .