Malaria ikomeje guhitana imbaga nubwo hashyizweho ingamba zinyuranye zo kuyihashya

Yanditswe na Ndayikunda Josué
Kuya 19 Ukuboza 2019 saa 12:01
Yasuwe :
0 0

Raporo igaragaza uko icyorezo cya Malaria gihagaze ku rwego rw’isi mu 2019 ivuga ko bimwe mu bihugu byo muri Afurika bikomeje kuza imbere mu kugira abaturage benshi barwaye iyo ndwara.

Raporo igaragaza ko Nigeria yihariye umubare munini w’abarwaye iyi ndwara aho ifite 25%, ikurikirwa na Repuburika Iharanira Demokarasi ya Congo ifite 12%, Uganda na 5%, mu gihe Cote d’Ivoire, Mozambique na Niger buri kimwe gifite 4%.

Hari ingamba zagiye zishyirwaho hirya no hino ku isi mu guhashya malaria zikaba zaranatanze umusaruro kuko imibare igaragaza ko abantu bavuye kuri miliyoni 177 mu 2010 bakagera kuri miliyoni 155 mu 2018. Abapfa bahitanywe na malaria bavuye ku bihumbi 400 mu 2010 bagera ku bihumbi 260 mu 2018.

Uganda nka kimwe mu bihugu byazahajwe bikomeye na malaria yafashe iya mbere mu bihugu byo mu karere k’ibiyaga bigari aho yatangije ubukangurambaga bwari bugamije kugabanya malaria kugera ku kigero cya 40% bitarenze 2020, na 75% mu 2025.

Nubwo hagiye hagaragara kugabanuka mu bijyanye n’abandura malaria ndetse n’abo yahitanaga, bigaraga ko igabanuka ryayo rigenda biguru ntege. Nko mu 2013 ubwandu bwa maralia bwavuye kuri 60% igera kuri 57%, kuva icyo gihe kugera mu 2018 imibare ntiyigeze itirimuka.

The East African ivuga ko mu karere ka Afurika y’Iburasirazuba, Tanzania iyoboye ibindi bihugu mu kugira umubare munini w’abahitanywe na malaria mu 2018 aho ifite abagera 21,500, ikurikirwa na Uganda ifite ibihumbi 13, u Rwanda ruza ku mwanya wa gatatu n’abagera ku 3,200, Kenya ikagira ibihumbi bibiri.

Itangazo Minisiteri y’ubuzima muri Uganda iheruka gusohora rigaragaza ko abarenga miliyoni barwaye malaria hagati y’ukwezi kwa Kamena na Nyakanga. Rikomeza rivuga ko imihindagurikire y’ikirere n’imvura ikabije biri mu byatumye iyi ndwara yibasira umubare munini muri iki gihugu.

Ishami ry’Umuryango w’abibumbye ryita ku buzima (OMS) rigaragaza ko kimwe mu bitera ubwiyongere bukabije bw’abandura malaria n’abo ihitana ari ubwitabire buke bukigaragara mu kubona imiti no kuyifatira ku gihe, ndetse n’ikibazo cy’amikoro adahagije.

Muri Afurika y’iburasirazuba usanga ibihugu byinshi byitabaza inzitiramibu mu rwego rwo kurwanya malaria. Mu 2018 Uganda yatanze inzitiramibu zigera kuri miliyoni 11, Kenya itanga miliyoni 2.3, u Rwanda rutanga 974,800, mu gihe Tanzania itigeze itanga inzitiramibu mu 2018.

Kenya yashoye miliyoni 200 z’amashiringi akoreshwa muri icyo gihugu mu gutera imiti irwanya ikwirakwizwa rya malaria.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .