Ishimwe rya Mico The Best kuri Perezida Kagame n’ubusabe bwe mu guhashya Igituntu

Yanditswe na Uwiduhaye Theos
Kuya 11 Kamena 2020 saa 10:47
Yasuwe :
0 0

Umuhanzi mu njyana ya Afrobeat, Mico The Best uherutse kwinjira mu bukangurambaga bwo kurwanya indwara y’Igituntu mu Rwanda yashimye ingamba zashyizweho na Leta y’u Rwanda iyobowe na Perezida Paul Kagame by’umwihariko mu guhangana na Coronavirus.

Yabigarutseho mu kiganiro yagiranye n’Umuyobozi ushinzwe kurwanya Igituntu mu Ishami ry’Umuryango w’Abibumbye ryita ku Buzima (OMS), Dr Lucica Ditiu.

Ikiganiro Mico The Best yagiranye na Dr Lucica Ditiu cyabaye ku mugoroba wo kuri uyu wa 11 Kamena 2020, hifashishijwe ikoranabuhanga.

Aba bombi baganiriye ku ngingo zibanze ku bukangurambaga bwo kurwanya igituntu by’umwihariko muri ibi bihe bidasanzwe Isi yose ihanganye na COVID-19.

Mico mu butumwa yatanze yashimiye Perezida Kagame kubera ingamba ubuyobozi bw’Igihugu bwashyizeho mu guhangana na Coronavirus kandi zikaba zaratanze umusaruro.

Ati “Ndashimira Perezida Paul Kagame, nkashima cyane Minisitiri w’Ubuzima n’Ikigo gishinzwe Ubuzima mu Rwanda (RBC) bagize uruhare rukomeye mu guhangana na Coronavirus n’ubwo itararangira. Ndashimira cyane n’abaturage kuko bumviye ubuyobozi, ibindi bihugu byitwaye nk’uko u Rwanda rwitwaye mu guhangana na Coronavirus nziko iki cyorezo cyahita gikendera.”

Uyu muhanzi yavuze ko yagize igitekerezo cyo gutangiza ubukangurambaga bwo kurwanya Igituntu nyuma yo kwitabira inama mpuzamahanga yo kurwanya igituntu yabereye mu Rwanda mu 2019.

Akimara kuyivamo yahise yiha intego yo gukangurira Abanyarwanda kumenya ububi bw’Igituntu bakacyirinda n’ababashije kurwara bakivuza neza cyane ko gikira.

Yavuze ko akiri umunyeshuri yajyaga yumva abantu bavuga igituntu ariko atazi ko kiri mu ndwara zihitana abantu benshi ku Isi no mu Rwanda gusa ngo atangira ubukangurambaga abantu bamwe baramusekaga cyane. Ibitaramo byo gukora ubukangurambaga byakomwe mu nkokora na Coronavirus, yatumye ibikorwa byose bihuriza abantu benshi mu ruhame bihagarikwa.

Mico The Best yasabye abantu biganjemo abazwi cyane cyane abahanzi bagenzi ko nabo bafata iya mbere mu guhangana n’Igituntu.

Ati “Hari ikintu njye ubu nasaba, nifuza ko habaho ba Ambasaderi bo kurwanya Igituntu benshi muri Afurika, cyane cyane b’abahanzi cyangwa ibindi byamamare. Buri gihe gihugu kikagira umwe. Mu Rwanda ndahari, muri Uganda hari Bebe Cool; muri Kenya dukeneye ko itsinda nka Sauti Sol ryakwinjira mu bukangurambaga muri Tanzania Diamond Platnumz nawe akaba yabikora byaba byiza cyane.”

Muri Mutarama 2020 Mico The Best yatangaje ku mugaragaro ko yinjiye mu bukangurambaga bwo kurwanya indwara y’Igituntu. Uyu muhanzi abarizwa muri KIKAC Music ihagarariye inyungu ze muri muzika.

Mico The Best yashimye uburyo Leta y'u Rwanda yitwaye mu guhangana na Coronavirus avuga ko bikwiye kuba isomo ku bindi bihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .