Icyorezo cya Ebola ntikigiteye ubwoba nka mbere- Dr Ndimubanzi

Yanditswe na Habimana James
Kuya 27 Kamena 2019 saa 09:14
Yasuwe :
0 0

Umunyamabanga wa Leta muri Minisiteri y’Ubuzima ushinzwe Ubuzima rusange, Dr. Ndimubanzi Patrick, yavuze ko kugeza ubu icyorezo cya Ebola kidateye ubwoba nk’uko byari bimeze mbere, ariko ko abantu bagomba guhora biteguye.

Dr Ndimubanzi yabigarutseho kuri uyu wa Kane mu kiganiro Minisante n’Ikigo cy’Igihugu cy’Ubuzima, RBC, byagiranye n’abaterankunga ngo babagaragarize gahunda ihari ikeneye ubufatanye kugira ngo iki cyorezo gihashywe.

Aba baterankunga barimo Ikigega cy’Abongereza gishinzwe Iterambere Mpuzamahanga (DFID), Ishami ry’Umuryango w’Abibumbye ryita ku Buzima (OMS) n’abandi.

Dr Ndimubanzi yavuze ko mu nama yahuje impande zombi, u Rwanda rwagaraje ingamba rufite mu kurwanya icyorezo cya Ebola gikomeje kugaragara mu Burasirazuba bwa Repubulika Iharanira Demokarasi ya Congo na Uganda.

Yavuze ko iki cyorezo cyagaragaye kuva muri Kanama 2018 muri Congo, ariko kuva muri Mutarama uyu mwaka u Rwanda rutangira gushyiraho ingamba zo kugihashya.

Ubwo yabazagwa niba iki cyorezo nta nkeke giteye igihugu, Dr Ndimubanzi yagize ati “Icyo tubabwira ni uko kwitegura ni uguhozaho ariko ntibiteye ubwoba nk’uko byari bimeze mbere; kwitegura no gutegura ni ngombwa mu gihe abarwayi baramuka babonetse, kwa muganga ni ko dukora duhora twiteguye, abantu bagahamagara kuri 114 umujyanama w’ubuzima.’’

Umuyobozi wungirije wa DFID mu Rwanda, Heather Opie, yavuze ko nyuma ya Jenoside yakorewe Abatutsi, uyu muryango ukorana neza n’u Rwanda.

Yagize ati “DFID imaze igihe kinini ikorana na Leta y’u Rwanda mu myaka 25 ishize. Twiteguye kandi kuzatanga miliyoni imwe y’amadorali mu guhangana n’iki cyorezo kandi twamaze gutanga miliyoni 2.6 bivuze ko umusanzu wose uzaba ari miliyoni 3.6 z’amadorali.”

Yakomeje agira ati “U Rwanda ruri ahantu iki cyorezo gishobora kuvuka ariko cyakemurwa no guhora abantu biteguye, iki kibazo cyagaragaye muri Uganda ariko u Rwanda ruramutse rwiteguye neza rushobora kukigabana, tuzavugana na Minisiteri y’Ubuzima turebe igihe inkunga izabonekera kuko irahari.”

Umuyobozi wa OMS mu Rwanda, Dr Kasonde Mwinga, yavuze ko uyu muryango ufite ishingano zo guhuza abafatanyabikorwa mu kurwanya iki cyorezo no kwitegura.

Yavuze ko nko mu Rwanda, Sudani, u Burundi na Uganda, aho iyi ndwara ishobora kwandura, OMS icyo yakoze ni ugushaka uko ibi bihugu byakwitegura, kohereza abahanga bahugura abagomba guhangana na yo n’ibindi.

Muri rusange Minisante ivuga ko ikenekeye miliyoni $12 ngo ikomeze kugeza ibikorwa byo guhangana na Ebola ahantu hose mu gihugu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza