Ibyo wamenya ku ndwara ya Asima ishobora kuvurwa hifashishijwe ibimera

Yanditswe na Akayezu Jean de Dieu
Kuya 17 Kamena 2019 saa 12:08
Yasuwe :
0 0

Imibare y’Ishami ry’Umuryango w’Abibumbye ryita ku buzima (OMS), yo mu 2015, igaragaza ko indwara ya Asima [Asthma], yahitanye ubuzima bw’abagera ku bihumbi 383.

Raporo ya “The Global Asthma Report 2018” , yagaragaje ko ku munsi abantu ibihumbi bicwa n’iyi ndwara, ndetse abagera kuri miliyoni 339 bakagerwaho n’ingaruka zayo by’umwihariko abo mu bihugu bifite ubukungu buciriritse.

Inzobere mu bijyanye no kuvura indwara zitandukanye hifashishijwe ibimera akaba n’Umuyobozi Mukuru wa Murugu Herbal Clinic- Rwanda, Dr Peter Macharia Murugu, avuga ko iyi ndwara ishobora kuvurwa hifashishijwe ibimera kandi igakira.

Mu kiganiro na IGIHE, Dr Peter Macharia yasobanuye byimbitse uburyo icyo iyi ndwara ari cyo, uko ifata abantu, uburyo bwo kuyirinda by’umwihariko kuyirinda abana bato ndetse n’icyakorwa ku muntu wagaragaje ibimenyetso byayo.

Dr. Peter Macharia asobanura ko Asima ari indwara y’ubuhumekero, ituma uduheha tujyana kandi tukanavana umwuka mu bihaha tubyimba kandi tukikanyaga.

Yavuze ko ifata imyanya y’ inzira z’ubuhumekero y’imbere ijyana umwuka mu bihaha (branchial tubes).

Ubusanzwe ishobora guterwa n’imyuka mibi duhumeka, ibyuka biryana mu maso bikunze kwifashishwa n’inzego z’umutekano mu guhosha imvururu, ubukonje bakabije n’ibindi.

Iyi ndwara itera kubyimba no gufungana kw’inzira z’umwuka, bishobora kugaragazwa na bimwe mu bimenyetso nko gusemeka, kubura umwuka, kwitsamura kenshi, kumva umuntu afunganye mu gituza.

Ibi bimenyetso byigaragaza cyane bwije na mugitondo, bityo bigatuma uyirwaye ahumeka bimugoye cyane; kuburyo atitaweho ngo ajyanwe kwa muganga kugira ngo abone imiti, ashobora no kubura ubuzima.

Uko wakwirinda Asima kuva mu bwana

Dr. Peter Macharia yasobanuye ko kwirinda iyi ndwara bitangira hakiri kare, aho nk’umubyeyi aba asabwa konsa umwana we igihe gihagije nk’amezi atandatu nibura.

Avuga ko konsa umwana bituma agira ubudahangarwa bw’umubiri ari nabwo bubasha guhangana n’iyi ndwara.

Ashimangira kandi ko kurinda umwana iyi ndwara hakiri kare ari ukubahiriza kumuha inkingo zo mu bwana, kumugaburira ibiryo bigenewe abana bakiri bato birimo n’imbuto.

Ati “Inama igirwa abagore bafite abana, ntabwo umwana agaburirwa amandazi n’imitobe, ibiryo by’abantu bakuru ntabwo ari byo by’abana. Rero umwana kugira ngo abashe kugira ubudahangarwa bw’umubiri ni uko agaburirwa ibiryo byoroshye birimo imbuto.”

Yakomeje agira ati “Uburyo uvura umwana siko wavura umuntu mukuru, icyo ugomba kumenya ni uko ku munsi tugira ibihe bitatu, mu gitondo haba hakonje, ku manywa hashyushye byagera ni mugoroba hakongera gukonja.”

“Si byiza rero gushyira umwana hanze mu gihe cy’imbeho kuko byatuma agira ikibazo cy’ubuhumekero. Ikindi umwana agomba guhabwa umwanya wo kuruhuka no kuryama kugira ngo ubwonko bukure bitume n’umubiri ugira ubudahangarwa.”

Asima ishobora kuvurwa hakoreshejwe n’ibimera. Nk’uko Dr. Peter Macharia abivuga, iyo umuntu afite ibimenyetso by’indwara ya Asima akagana iri vuriro rya Murugu Rwanda, kuri ubu rikorera i Nyarutarama ahazwi nko mu Kabuga ka Nyarutarama, ahabwa ubufasha.

Iri vuriro kandi rivura n’izindi ndwara hifashishijwe ibimera dore ko rifite ibikoresho bya laboratwari, imiti y’ubwoko butandukanye ndetse n’abaganga b’inzobere mu kuvura indwara z’ibyorezo.

Dr Peter Macharia Murugu, Umuyobozi Mukuru wa Murugu Herbal Clinic Rwanda avuga ko indwara ya Asima ihangayikishije Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza