00:00:00 IGIHE NETWORK KN KINYARWANDA EN ENGLISH FR FRANCAIS

Drones mu kwica imibu: Uko u Rwanda rwagabanyije abarwara malaria ho miliyoni 3.7 mu myaka itanu

Yanditswe na Cyprien Niyomwungeri
Kuya 28 April 2022 saa 10:21
Yasuwe :

Hambere aha by’umwihariko mu bihe iby’imvura, iyo wageraga ku kigo nderabuzima cyangwa ibitaro wasanganirwaga n’umurongo w’abaturage bose bivuza Malaria. Iyi ndwara yari ihangayikishije cyane Abaturarwanda n’isi muri rusange, ku buryo n’uwafatwaga n’ubundi burwayi yabanzaga gutekereza ko ari yo.

Hari abihinaga mu nkike bakahira imiti ya kinyarwanda ngo ivura malaria, bamwe muri aba yarabahitanye abandi bamara iminsi kwa muganga bitabwaho. Ingamba nyinshi zarafashwe zaba iz’imbere mu gihugu n’izo ku rwego mpuzamahanga mu guhangana n’iyi ndwara, ku buryo bitagutungura ubajije umunyarwanda igihe aheruka kuyirwara akabanza kureba hejuru ngo yibuke imyaka neza.

Icyakora, nta wakwirengagiza ko buri mwaka hakiri ibihumbi 600 byicwa n’iyi ndwara ku Isi nubwo mu Rwanda abayirwara n’abo yica bakomeje kugabanuka. Ibi byerekana ko hakiri umukoro ukomeye wo kudakerensa Malaria no gukomeza gukaza ingamba zo kuyirinda no kuyirwanya kugira ngo intego yo kuyirandura burundu igerweho.

Imibare y’’Ikigo cy’Igihugu cy’ubuzima (RBC), yerekana ko hagati ya 2017 na 2021 [ni ukuvuga mu myaka itanu ishize] u Rwanda rwagabanyije abarwaraga malaria ku kigero cya 76%. Mu 2021 abarwaye malaria bari miliyoni 1.1 bavuye kuri miliyoni 4.8 mu 2017.

Kuri malaria y’igikatu, mu 2021 abayirwaye ni 1900 bavuye ku 11,000 mu 2017, hakaba harabayeho igabanuka rya 85%. Ku bigendanye n’abishwe na malaria, mu 2021 yishe abantu 69 mu gihe mu 2016 bari 706, bakaba baragabanutseho 90 ku ijana.

Mu 2017, nibura abantu 409 ku 1000 barwaye malaria, mu gihe mu 2021 abayirwaye ari 86 ku 1000. Iyi akaba ari intambwe ikomeye mu rugendo rwo kurandura malaria mu gihugu.

Ibi birerekana ko mu myaka itanu abanyarwanda barwaraga malaria bagabanutseho miliyoni 3.7 bitewe n’ingamba zirimo gutanga inzitiramibu ku baturage bose, gutera imiti yica imibu, kwegereza abaturage ubuvuzi, gukangurira abaturage kurwanya no kwirinda malaria n’ibindi.

Mu ntangiriro za 2020, Guverinoma y’u Rwanda yatangiye kwifashisha indege nto zitagira abapilote (Drones) mu bikorwa byo gutera imiti (Larvicide) yica imibu itera Malaria n’amagi yayo mu bishanga, mu bidendezi by’amazi n’ahandi ishobora kwihisha.

Inzego z’ubuzima zasobanuye ko ibi byari bigamije kunganira gahunda isanzwe yo kurwanya imibu mu nzu z’abaturage kuko wasangaga hanze y’inzu aho imibu ituruka nta kintu cyakorwaga, cyane cyane mu bishanga aho imibu yororokera. Ubu ni uburyo bushya bwo kunganira ubusanzwe bwo gusanga imibu hanze itaragera mu nzu.

Imiti iterwa yitwa "Bacillus Thuringiensis Israelensis" (BTI). Ni imiti ya Larvicide, ubwoko bwa insecticide yica imibu y’ingore itera malaria. Muri iyi gahunda, hari drones zikoreshwa mu kugaragaza ahari amagi y’imibu n’izindi zikoreshwa mu gutera imiti aho yagaragaye.

Umuyobozi wa Porogaramu y’Igihugu yo kurwanya Malaria muri RBC, Dr Mbituyumuremyi Aimable, avuga ko gukoresha drones, byari bigamije kwica amagi y’imibu aho yororokera mbere y’uko akura akavamo imibu. Hari kandi kurinda abaturage indwara yica abarenga ibihumbi 500 ku mwaka biganjemo Abanyafurika.

Ati "Drones zakoreshejwe muri gahunda y’igerageza mu Murenge wa Jabana mu Karere ka Gasabo, mu kureba ko bitanga umusaruro. Ibisubizo byagaragaje ukugabanuka gukomeye kw’imibu muri ako gace nyuma yo gutera imiti twifashishije drones".

Uyu mwaka iyi gahunda izaguka igezwe mu turere dutandatu mu kunganira izindi ngamba zo kwirinda malaria zihari, umusaruro uzavamo uzereka ubuyobozi niba bwakwaguka bukagera n’ahandi.

Dr Mbituyumuremyi yavuze ko igabanuka rya malaria rituruka ku ruhurirane rw’ingamba nyinshi no kongerera ubushobozi abajyanama b’ubuzima bwo gusuzuma, kuvura no gutanga imiti ya malaria, aho umuturage ashobora kuvurwa bitamusabye kujya kwa muganga.

Dr Mbituyumuremyi avuga ko ’kugeza ubu abajyanama b’ubuzima bavura malaria ku kigero cya 60% by’abayirwaye bose, bavuye kuri 52% mu 2017. Ibi bisobanuye ko abarwayi babonera ubuvuzi ku gihe kandi byagize akamaro gakomeye mu kugabanya abicwaga na malaria’.

Gutera imiti yica imibu mu nzu byakozwe mu ngo zo mu turere 15 tw’igihugu twibasirwa cyane na malaria. Mu turere 30 twose tw’u Rwanda haboneka malaria, ariko by’umwihariko mu Burasirazuba bw’u Rwanda no mu Majyepfo hari uturere 15 gusa duturukamo malaria irenga 70% mu gihugu hose.

Gutanga inzitiramibu ku baturage bose ni indi ngamba ikomeye mu guhangana na malaria. Uyu mwaka Leta y’u Rwanda irateganya gutanga inzitiramibu miliyoni umunani mu gukomeza kwirinda no kurwanya malaria.

Ubushakashatsi bwa gatandatu ku buzima n’imibereho bwashyizwe ahagaragara mu mpera z’umwaka ushize, bwerekanye ko ingo zifite inzitiramibu ziteye umuti zagabanutse zikava kuri 84% mu mwaka wa 2014-2015 zikagera kuri 66% mu mwaka wa 2019-2020.

Bwagaragaje ko 34% by’ingo mu Rwanda zidatunze inzitiramibu, ariko kandi ngo n’ingo nyinshi zizifite ziri mu Mijyi kuko zihariye 76%, mu gihe ingo zo mu cyaro zifite inzitiramibu ziteye umuti ari 64% by’umubare w’abazifite wagaragajwe n’ubushakashatsi.

Inzego z’ubuzima zisobanura ko imibare y’abatunze inzitiramibu yiyongereye kuko ubushakashatsi bwakozwe mbere y’uko zitangwa mu 2020, bityo bukaba butarafashe iyi mibare.

Bamaze imyaka itatu batarwara Malaria

Bamwe mu baturage bishimira ko malaria ikomeje kugenda igabanyuka mu gihugu kuko mu myaka ishize hari ubwo wasangaga hari urugo rurwaza iyi ndwara buri kwezi, bikadindiza imirimo n’umusaruro wabo.

Mukanyandwi Gaudence wo mu Karere ka Bugesera mu Ntara y’Iburasirazuba, avuga ko yahawe inzitiramibu kandi akigishwa kurwanya malaria atema ibihuru bimukikije, asiba ibinogo byakororokeramo imibu n’ibindi byatumye amaze imyaka itatu atarwara malaria.

Ati "Njye n’abana banjye malaria yaradukundaga, buri kwezi habaga hari uwarwaye malaria ugasanga imirimo yanjye irahagaze n’abana bagasiba amashuri barwaye."

"Ubu hashize imyaka itatu tutarwara malaria, niyo ntameze neza njya ku mujyanama w’ubuzima akansuzuma akambwira ko atari yo [malaria]".

Muri Mata na Gicurasi nibwo malaria yiyongera cyane kubera ibihe by’imvura. Mbituyumuremyi asaba abaturage gukaza ingamba zo kwirinda.

Ati "Malaria iracyari kumwe na twe kandi igira ingaruka ku byiciro by’imyaka yose mu gihugu, twese tugomba kugira uruhare mu kubahiriza ingamba zo kwirinda no kurinda imiryango yacu, tukabigira ibyacu".

Ishami ry’Umuryango w’Abibumbye ryita ku buzima (OMS), rigaragaza ko abarenga miliyoni 200 barayirwara ikica abarenga ibihumbi 600 ku Isi yose. Abenshi yica ni abana bakiri bato muri Afurika.

Drones zica imibu itera malaria n'amagi yayo zigiye kwifashishwa mu tundi turere
Drones zatanze umusaruro ukomeye mu kugabanya umubare w'abarwaraga malaria kuko zica imibu mu bishanga n'ahandi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .