Abashakashatsi bavumbuye imiterere mishya ya virusi itera Sida

Yanditswe na IGIHE
Kuya 7 Ugushyingo 2019 saa 12:17
Yasuwe :
0 0

Ku nshuro ya mbere mu myaka 19 ishize, abashakashatsi bo muri Leta Zunze Ubumwe za Amerika bavumbuye imiterere mishya ya virusi itera sida, nk’uko byatangajwe na Abbott Laboratories yakoze ubwo bushakashatsi.

Ni ubushakashatsi bwakozwe ku bufatanye na Kaminuza ya Mossouri mu mujyi wa Kansas, butangazwa mu kinyamakuru cyitwa Journal of Acquired Immune Deficiency Syndromes, kuri uyu wa Gatatu.

Virusi itera Sida izwi nka HIV, irimo ibyiciro bitandukanye, ndetse kimwe n’izindi virusi, ishobora kwihinduranya uko iminsi igenda ishira. Ni ubwa mbere havumbuwe ubundi bwoko bwayo mu myaka hafi 20 ishize, uhereye ubwo hashyirwagaho amabwiriza agenderwaho mu gushyira mu byiciro VIH mu mwaka wa 2000.

Umwe mu bakoze raporo y’ubwo bushakashatsi, Mary Rodgers akaba n’umushakashatsi muri Abbott, yavuze ko ari ngombwa gukurikira uko VIH igenda ihindagurika, kugira ngo uburyo bwo kuyisuzuma no gushakisha imiti iyigabanyiriza ubukana bikomeza kujyana n’igihe.

Ikigo cye gisanzwe gisuzuzuma ubwoko busaga 60% bw’amaraso atangwa hirya no hino ku Isi, harebwa niba nta virusi ifite imiterere mishya irimo gukwirakwira.

Umuyobozi w’Ikigo gishinzwe Indwara zandura muri Amerika, Dr. Anthony Fauci, yavuze ko uburyo bukoresha mu kuvura virusi itera Sida bushobora gutanga umusaruro kuri ubu bwoko bwa virusi kimwe n’ubundi busanzwe.

Yagize ati “Nta mpamvu zo gukuka umutima cyangwa kuyihangayikira cyane. Ntabwo ari abantu benshi bayifite. Iri ahantu hake cyane.”

Kugira ngo byemezwe ko ari ubwoko bushya bwa virusi bubonetse, biba bigomba kugaragazwa ahantu hatatu hatandukanye kandi bikemezwa n’abaganga b’inzobere.

Inshuro ebyiri za mbere zemejwe muri Repubulika ya Demokarasi ya Congo mu 1983 no mu 1990. Ubwo bwoko bubiri bwari budasanzwe kandi butandukanyije kamere na virusi zari zimenyerewe.

Ibipimo bya gatatu byabonetse muri Congo mu 2001 mu nyingo yari igamije gushaka uburyo bwo kurengera ubuzima bw’umwana ngo atanduzwa virusi n’umubyeyi we.

Gusa ngo ibipimo byari bike ku buryo abaganga batabashije kubikoraho inyigo ihagije, kandi ikoranabuhanga muri icyo gihe ryari ridahagije ngo hemezwe niba ari ubwoko bushya bwa virusi. Icyo abashakashatsi ba Abbott bakoze bafatanyije na Kaminuza ya Mossouri ni uguhanga uburyo bushya bwo gusuzuma ibipimo byo mu 2001.

Rodgers yagize ati “Byari bimeze nko gushakisha urushinge mu kirundo cy’ibyatsi, warangiza ukagerageza gukurura rwa rushinge ukoresheje rukuruzi.”

Baje kwemeza ko ari virusi ya L yo muri Group M. Ntabwo biramenyekana uburyo ishobora guhindura umubiri w’umuntu wayanduye, gusa hatekerezwa ko uburyo bukoreshwa mu kugabanya ubukana bwa virusi zisanzwe bunakora kuri ubu bwoko.

Umwalimu muri Kaminuza ya Missouri, Dr. Carole McArthur yagize ati "Iri vumburwa ritwibutsa ko kugira ngo turangize burundu HIV, tugomba gutekereza cyane kuri izi virusi zikomeza kwihinduranya maze tugakoresha ikoranabuhanga rigezweho n’ubushobozi buhari mu gukurikirana uko zigenda zihinduka."

Habarwa ko bantu miliyoni 36.7 ku Isi yose banduye virusi itera Sida, nk’uko imibare y’ishami ry’Umuryango w’Abibumbye ryita ku Buzima, OMS, ibigaragaza.

Habarwa ko nibura mu 2016 abantu miliyoni 1.8 banduye iyo ndwara itarabonerwa umuti n’urukingo.

Abashakashatsi bakomeje gukurikiranira hafi ihindagurika rya virusi itera Sida

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza