Abahanga bari gusiganwa amasigamana bashaka urukingo rwa Coronavirus

Yanditswe na IGIHE
Kuya 30 Mutarama 2020 saa 06:56
Yasuwe :
0 0

Virus nshya ya Coronavirus ikomeje koreka imbaga, yahereye mu Bushinwa ariko ikomeje kwigabiza n’ibindi bice by’Isi, nta rukingo.

Ni virusi ya kane izengereje isi mu myaka itanu ishize nyuma ya Ebola, Zika na Mers ijya gusa nka coronavirus kuko nayo ifata nk’indwara y’ubuhumekero.

Abasaga ijana bamaze gupfa kubera Coronavirus, mu gihe ibihumbi n’ibihumbi byanduye.

Igitandukanya coronavirus n’izindi ndwara zabanje ni uko zo byafataga igihe kinini ngo haboneke inkingo ariko kuri coronavirus abashakashatsi n’inzobere ntibari kugoheka, guhera umunsi wa mbere itangazwa nk’icyorezo bari kureba ko babona urukingo rwayo.

Ibirango bishingiye ku tunyangingo by’iyo ndwara byahise bigaragazwa ubwo u Bushinwa bwavumburaga ko bwatewe n’icyorezo gishya. Ni ibirango bizwi nka genetic code bifasha abahanga kumenya aho iyo virusi yaturutse, uko yacibwa intege n’uburyo abantu bayirinda.

Ubufasha bwa Guverinoma zitandukanye buri gutangwa ngo ubushakashatsi bugende neza, hanyuma umuti n’urukingo by’iyo ndwara biboneke vuba.

Ikigo cyiswe Inovio kiri i San Diego muri California, abashakashatsi bacyo bari kwifashisha uburyo bushya mu gupima isanomuzi (DNA) mu kurema urukingo rw’iyo virusi. Urwo rukingo rwiswe ‘INO-4800’ biteganyijwe ko ruboneka mu mezi make ari imbere rugatangira kugeragezwa.

Umuyobozi wungirije ushinzwe ubushakashatsi muri Inovio, Kate Broderick, yabwiye BBC ko ubwo u Bushinwa bwatangazaga ibirango by’iyo virusi , bahise bakoresha ikoranabuhanga ryabo bagashaka uburyo bakora urukingo.

Inovio yatangaje ko igerageza rya mbere ry’urwo rukingo nirishoboka, bazakurikizaho andi magerageza akomeye ku buryo mu mpera z’umwaka bazaba bafite urukingo rwuzuye rwabasha guhangana n’iyo ndwara.

Mu 2000 ubwo virusi ijya gusa na Coronavirus yitwa Sars yadukaga mu Bushinwa, icyo gihugu cyabaye nk’ikibihisha Isi ntiyamenya uko bihagaze ku buryo abakora ubuvumbuzi bw’urukingo batangiye imirimo icyorezo cyarangiye.

Ubushakashatsi bushya buri guterwa inkunga n’ihuriro ry’ibigo bikora ubushakashatsi ku byorezo, Cepi, rigizwe n’ibihugu byose n’imiryango mpuzamahanga.

Ni ihuriro ryashinzwe nyuma y’icyorezo cya Ebola cyabonetse muri Afurika y’Iburengerazuba mu 2015, hagamijwe guhangana n’indwara nshya z’ibyorezo.

Hari izindi gahunda ebyiri Cepi iri gutera inkunga nazo ziri gukora urukingo rwa coronavirus.

Kaminuza ya Queensland iri gukora urukingo rwitezweho kwifashishwa mu guhangana n’uturemangingo tugize virusi ya coronavirus. Ni mu gihe ikindi kigo cyitwa Moderna Inc giherereye muri Massachusetts nacyo cyatangiye ubushakashatsi kuri iyo virusi gifatanyije n’ikigo cya Leta Zunze Ubumwe za Amerika gishinzwe kurwanya indwara zandura.

Umuryango mpuzamahanga wita ku buzima, OMS wavuze ko uri gukora ibishoboka byose ngo haboneke urukingo rushya. Icyakora imbogamizi igihari ni uko ahari gukorwa ubushakashatsi kuri iyo ndwara hose bikiri ku rwego rwo hasi mu gihe indwara yo ikomeza gukaza umurego.

Nta bushakashatsi na bumwe butanga icyizere ko buzarangira bugakoreshwa mu guhangana n’iki cyorezo ubu cyibasiye u Bushinwa.

OMS ivuga ko ariyo izatangaza mu minsi ya vuba, urukingo ruzakoreshwa mu igerageza rigamije guhashya icyo cyorezo.

Abashakashatsi bari gukora ibishoboka byose ngo haboneke urukingo rwa coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .