Ni ryari umwana akwiriye kuganirizwa ku bijyanye n’ubuzima bw’imyororokere?

Yanditswe na Ferdinand Maniraguha
Kuya 20 Ukuboza 2020 saa 07:38
Yasuwe :
0 0

Kimwe mu bibazo bibangamiye u Rwanda muri iki gihe, ni ubwiyongere bw’abana bakorerwa ihohoterwa rishingiye ku gitsina ndetse n’abangavu baterwa inda zitateganyijwe.

Impamvu nyamukuru zitangwa ni ubumenyi buke bw’abana ku bijyanye n’ubuzima bw’imyororokere, biha icyuho abashaka kubashuka bababwira ibinyoma bibaganisha mu kubakoresha imibonano mpuzabitsina.

Icyumvikana ni uko abana bakeneye amakuru ajyanye n’imyororokere ariko ababyeyi bakayababwiye bakunze kugira ipfunwe n’isoni zo kubibaganiriza cyangwa bakibaza ikigero cy’imyaka umwana yakabaye aganirizwa.

Umuganga akaba n’Impuguke mu bijyanye n’Ubuzima bw’Imyororokere, Dr Anicet Nzabonimpa, yavuze ko guhera ku myaka itatu, umwana aba agomba gutangira kuganirizwa ku bijyanye n’imyororokere.

Yagize ati “Abahanga bavuga ko kuva ku mwana w’imyaka itatu ushobora kumuganiriza ku bijyanye n’ubuzima bw’imyororokere. Uwo mwana ugeze ku myaka itatu aba atangiye kubaza utubazo ku mubiri we. Kugeza ku myaka irindwi, umwana uba umusubiza ibyo akubajije gusa kandi ntumubeshye.”

Yavuze ko ababyeyi bakunze gukora amakosa ku bana bari muri iki kigero, aho nk’iyo umwana ababajije ibyerekeye igitsina cye, bamubeshya.

Ati “Ababyeyi bakunda kubitinya, umwana yamubaza ati Papa cyangwa mama iki n’iki, yamwereka igitsina cye undi akamubwira ngo ni akanyoni. Ibyo ntabwo aribyo kuko umwana aba azi ko inyoni iguruka mu kirere. Mubwize ukuri uti iki ni igitsina cyawe ndetse yanakubaza ati gikora iki, umubwire imirimo gikora.”

“Iyo abimenye bituma afungira aho ntazajye kubaza abandi bashobora kumubeshya. Iyo ubeshya umwana ikintu kimwe, burya anaganira n’abandi bikazagera aho uko agenda akura akavumbura ko wagiye umubeshya noneho akajya ajya kubaza ababasha kumusubiza kandi bakaba bamuganisha mu nzira mbi.”

Mu gihe umwana ari hagati y’imyaka irindwi n’icumi, inzobere zivuga ko akwiriye kuganirizwa ariko ntihabeho kumubwira byinshi bishobora kumucanga.

Dr Nzabonimpa yavuze ko hagati y’imyaka 10 na 19, umubiri w’umwana uba utangiye kuzana impinduka ari nacyo gihe cyo kwitondera ku makuru umwana ahabwa ku bijyanye n’imyororokere.

Ati “Aba ageze mu gihe cy’impinduramatwara mu mubiri we kuko ni igihe kiba kiri kumuvana mu bwana kimwerekeza mu gihe cy’abantu bakuru ndetse n’umubiri we utangiye kugaragaza impinduka usa n’uw’abantu bakuru. Aba atangiye kumera amabere ku mukobwa, kugara mu matako, kujya mu mihango.”

“Atangira kwibaza utubazo twinshi ariko kuko kenshi nta bisubizo aba afite, biramuhangayikisha cyane, akaba yata umutwe agahangayika. Umwana wo mu myaka 12, 13, 14 akwiriye kuganirizwa cyane kuko aba ari kubona impinduka atiteguye ku buryo ashobora kugira ngo ni uburwayi kandi umubiri we uba uri gukora neza.”

Kuva ku myaka 14 kugera ku myaka 19, umwana aba atangiye gusobanukirwa kandi ibyo atabwiye ashobora kubyisomera. Muri iyo myaka niho abana batangira kujya mu kigare, bagahanahana amakuru ashobora no kuba atariyo.

Dr Nzabonimpa yavuze ko aho ariho uruhare rw’ababyeyi rukwiriye kugaragarira, bakababa hafi kugira ngo amakuru y’ibihuha bahawe atabagiraho ingaruka zirimo no guhohoterwa cyangwa guterwa inda.

Yaburiye kandi ababyeyi babona abana bageze mu bwangavu n’ubugimbi, bakavuga ko batangiye kwitwara nabi.

Ati “Hari abavuga ngo barasuzugura. Siko bimeze kuko imibiri yabo iba itangiye gukora ya misemburo ibaganisha ku bantu bakuru, iyo misemburo ikababwira ko bakuze bagatangira kumva ko bageze ku rwego runaka, bakumva bafata ibyemezo runaka rimwe na rimwe batagishije inama.”

“Si byiza gucyaha cyangwa gutuka umwana, si byiza kumukubita kuko biramukanga, ikibi kiri kumwoshya ni ya misemburo iba imurimo. Inkoni rero ikubita umusemburo ni ibiganiro.’’

Umuyobozi Mukuru w’Umuryango ufite mu ntego zawo gufasha urubyiruko kumenya amakuru ajyanye n’ubuzima bw’imyororokere, Save Generations Organisation, Nyinawumuntu Yvette, yavuze ko ababyeyi bagomba gusubira ku muco wo kuganiriza abana nkuko byahoze mu muco Nyarwanda, aho abana boherezwa kwa sewabo cyangwa nyina wabo kuganirizwa mu bijyanye n’imyororokere.

Yagize ati “Kutaganiriza umwana bigira inzitizi kuko iyo atahawe amakuru yizewe bishobora kumugiraho ingaruka. Ababyeyi bombi umugabo n’umugore bafite uruhare mu kuganiriza abana ku bigendanye n’ubuzima bw’imyororokere kandi umuhungu n’umukobwa bafite uruhare bwo kubyumva bose. Iyo habayeho uko gufatanya baganiriza abana, bigira agaciro kanini.”

Niyokwizera Fideline, umwe mu bana b’abanyeshuri bahabwa inyigisho biciye muri gahunda za Save Generations Organisation, yavuze ko byamufashije kwirinda ibishuko.

Yagize ati “Byamfashije kwirinda abanshuka, bimfasha no kumenya kuvuga Oya, nirinda n’abandi bashaka kunshuka banjyana mu mibonano mpuzabitsina.”

Ababyeyi bagiriwe inama yo kudatinya kuganiriza abana babo ibijyanye n’imibonano mpuzabitsina bitwaje ko nta makuru ahagije babifiteho, ngo kuko n’ubuzima banyuzemo mu bwangavu n’ubugimbi bwabo byaba isomo ku bana.

Dr Nzabonimpa yavuze ko guhera ku myaka itatu umwana aba ashobora kubwirwa amakuru ajyanye n'imyororokere
Abana biga mu mashuri abanza, inzobere zigaragaza ko bakwiriye kuganirizwa hibandwa ku bibazo bafite
Umuyobozi Mukuru wa Save Generations Organisations, Yvette Nyinawumuntu, yavuze ko guhisha umwana amakuru ajyanye n’imikorere y’umubiri we, ntacyo bimaze kuko bituma ajya kwishakira aye akaba yabeshywa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .