00:00:00 IGIHE NETWORK KN KINYARWANDA EN ENGLISH FR FRANCAIS

Bishengura umutima! Wabyitwaramo ute igihe utakaje uwawe wa bugufi yiyahuye?

Yanditswe na Léana Bisa
Kuya 9 February 2022 saa 02:04
Yasuwe :

Niba warigeze kubura umuvandimwe, umubyeyi, umwana wawe, inshuti yawe ya hafi n’abandi wumvise ukuntu bizamura amarangamutima yawe, bikagutera agahinda kubera urwo rupfu rutunguranye.

Ako gahinda ntikabonerwa igisobanuro, ni cyo kintu gikomeye kigoye guhangana nacyo kandi ntawe mwagisangira, buri wese yirwanaho. Gashobora gushibukamo gutakaza ibiro, kunanuka, gusinzira bigoranye, kuribwa umutwe n’ibindi bibazo bishobora kuganisha ku ndwara cyangwa ibindi bibazo by’ubuzima.

Ubusanzwe iyo umuntu yitabye Imana ntibyorohera abagize umuryango we n’inshuti ze kubyakira. Biba ibidasanzwe ariko iyo yapfuye yiyahuye kuko byo birushaho kubashegesha kuko na sosiyete ibitiza umurindi kuko hari abafata umwanzuro wo kwiyahura nk’ubugwari bwo kunanirwa guhangana n’ibibazo.

Muri icyo gihe, umuntu ahangana n’ibibazo bibiri birimo kubura uwe ariko akanasigarana akangononwa gashingiye ku buryo afatwa n’abandi muri sosiyete.

Icyemezo cyo kwiyahura, benshi bajya kugifata bitewe n’uko barangaranywe ndetse na sosiyete rimwe na rimwe ikabifata nk’ibisanzwe.

Biterwa ahanini no kuba benshi bagifata ubuzima bwo mu mutwe nk’ibintu byoroshye, bigira ingaruka ku bantu bake muri sosiyete. Hari abo muhurira muri byinshi mukajyana mu kazi ndetse mukaba muri kumwe ahantu hatandukanye ariko ntibyorohe kumenya ko bafite agahinda gakabije n’ibindi bibazo by’ubuzima bwo mu mutwe.

Ikigo cy’Igihugu gishinzwe Ubuzima (RBC) giheruka gutangaza ko 20,5% by’Abanyarwanda bangana na miliyoni 2.6 bagendana indwara zo mu mutwe.

Abantu benshi mu Rwanda iyo bafite ikibazo cy’agahinda gakabije (depression) bakomeza kubana na byo ntawe ubizi, bikagera aho bafata icyemezo cyo kwiyahura.

Mu kiganiro cyihariye na IGIHE, Inzobere mu bijyanye n’Ubuzima bwo mu Mutwe n’Imitekereze ya Muntu akaba n’Umwarimu muri Kaminuza y’u Rwanda, Dr. Jeanne Marie Ntete, yavuye imuzi imyitwarire ikwiye kuranga uwabuze uwe kubera yiyahuye.

Yavuze ko iyo umuntu apfushije uwe yiyahuye biba bitunguranye kandi bigoye kubyakira vuba.

Dr. Ntete yasobanuye ko hari ibyiciro bitanu by’akababaro umuntu acamo igihe yagize akababaro.

Iyo umuntu afite intimba yatewe no kubura uwe abanza kutabyakira, yumva ko ibyabaye bidashoboka. Nyuma y’aho agira uburakari, akaba yarakarira uwiyahuye cyangwa akirakarira ubwe.

Icyiciro gikurikiraho ni icyo kwirengagiza amarangamutima yose atuma yumva usa n’uwicira urubanza. Kigakurikirwa no kugira agahinda gaterwa no kumva uburemere buri mu gutakaza umuntu, aha ni na ho yerekana ibimenyetso by’ufite agahinda gakabije.

Inama ku wahuye n’ihungabana ku wabuze uwe wiyahuye

Dr Ntete yagaragaje ko uwahuye n’iki kibazo hari ingingo enye zamufasha gusubira mu bihe bisanzwe; zirimo gusobanukirwa amarangamutima ye, kwibuka ko ubuzima bwe budakwiye guhuzwa n’ibyo yakoze, kureba ahazaza no kwiyitaho.

Yavuze ko nyuma yo kugira agahinda gakabije habaho kwakira no kwemera ibyabaye.

Ati “Muri iki cyiciro amarangamutima yawe atangira kongera gusubira ku rugero rukwiye. Byose bishobora kuba mu gihe gito cyangwa bigatinda. Si ngombwa ko bikurikirana ahubwo icy’ingenzi ni uko wemera kumva amarangamutima yawe uko aje, ntuyirengagize cyangwa se ngo uyahishe.’’

Uyu muhanga mu by’Imitekerereze avuga kandi ko uwagezweho n’ikibazo adakwiye guheranwa nabyo ahubwo hari ibindi yaha agaciro mu buzima bwe.

Ati “Ugomba kwibuka ubuzima bwe, ibyo yagukoreye uko yari ameze ndetse n’uko mwari mubanye. Bigufasha kwihanganira urupfu rwe ahubwo ukita ku buzima yabayeho. Ujye ukomeza kubika ibyo ufite byose bisigaye, inyandiko, impano, amashusho, video n’ibindi ubinyuzemo amaso buri gihe wibuke ubuzima bwe.’’

Izindi nama zitangwa ni izijyanye no kwiyitaho kuko kubura umuntu bishobora kugira ingaruka ku buzima bwo mu mutwe mu gihe atarabasha kubyakira neza.

Dr. Ntete ati “Ugomba kujya wita ku buzima bwawe haba ubwo mu mutwe cyangwa ubwo ku mubiri. Iyo umuntu atakiriye urupfu rw’uwe, akagira iryo hungabana ntiyivuze bishobora na we kumutera kwiyahura.’’

Yakomeje ati “Kubura umuntu yiyahuye birababaza cyane ariko ugomba kureba imbere ugasiga inzika n’uburakari inyuma, ukareka kwibaza ibibazo byinshi.’’

Ibisigazwa inyuma, ntibiba bivuze ko wibagiwe uwo muntu ahubwo ni ukwemera ibyabaye ariko ntiwemere ko bigusiga ahabi ahubwo ukaba wakwita ku bawe usigaranye.

Dr. Ntete avuga ko uwahuye n’ihungabana aba agomba gufashwa kwiyakira kuko na we yakwiyahura kubera agahinda gakabije. Ati “Ni byiza kuba hafi abantu bahuye n’icyo kibazo, umuntu akabatega amatwi.”

“Iyo umaze nk’amezi atandatu ugifite ihungabana, utaragera ku cyiciro cya nyuma cyo kwakira, ni bwo bitangira gufatwa nk’indwara ugakenera ubufasha bw’abaganga.”

Atanga inama ko mu gihe cyo kunyura mu byiciro byose ari ingenzi kwegera abaganga bakamufasha binyuze mu kumutega amatwi no kumuyobora.

Yakomeje ati “Hari Umuryango w’Abahanga mu kwita ku Buzima bwo mu Mutwe (RPS) ihuza abashaka kwivuza n’abaganga bo kubafasha.”

Ibyiciro bitanu byo guhangana n’agahinda ushobora kubisanga mu buryo burambuye mu gitabo “Death and Dying” cy’umwanditsi Elisabeth Kübler-Ross uvura indwara zo mu mutwe.

Umuntu wabuze uwe wiyahuye ashobora kugira agahinda gakabije mu gihe atabawe hafi na we bika byamuviramo gufata icyo cyemezo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .