00:00:00 IGIHE NETWORK KN KINYARWANDA EN ENGLISH FR FRANCAIS

Abahanga mu by’ubuzima bwo mu mutwe bagaragaje akamaro ko kudaceceka igikomere

Yanditswe na Ntabareshya Jean de Dieu
Kuya 5 Ukuboza 2022 saa 10:06
Yasuwe :

Mu buzima bwa muntu ahura n’ibyiza byinshi ariko n’ibibi ruba rugeretse. Ni yo mpamvu tugira igihe cy’ibyishimo n’igihe cyo kubabara cyane cyane iyo twabuze abacu twakundaga. Rimwe na rimwe ibyo umuntu anyuramo bimusigira urwibutso ibindi bikamutera ibikomere ku mutima bisaba ko yomorwa kugira ngo ubuzima bubashe gukomeza.

Amateka y’u Rwanda yagejeje kuri Jenoside yakorewe Abatutsi mu 1994 yasigiye benshi mu bayanyuzemo ibikomere bitagira ingano ku mutima, abavutse nyuma na bo abagiraho ingaruka mu buryo butandukanye.

Ibi bikomere byavuyemo kwigunga kwa bamwe mu batarifuzaga kwegerana n’abandi ari nayo mpamvu hashyizweho gahunda y’icyunamo yafashije benshi kongera kwicarana no kuganira ku byabaye bikabaruhura umutwaro.

Nubwo byari bimeze bityo ntabwo bose baruhutse, hari n’abo ibyo bikomere byaviriyemo ibibazo by’ubuzima bwo mu mutwe nk’agahinda gakabije, ukwiheba, ihungabana n’ibindi byasabaga ko begerwa bakagira abo kubumva.

Uko ni ko Umuryango Mizero Care Organisation washinzwe ugamije gufasha abagize ibibazo bitandukanye by’ubuzima bwo mu mutwe kubona ubuvuzi binyuze mu kuganirizwa no gufashwa gutura umutwaro w’ibikomere.

Ubushakashatsi bw’Ikigo cy’Igihugu cy’Ubuzima, RBC, bwo mu 2018, bwerekanye ko nibura umuntu umwe muri batanu mu Banyarwanda afite uburwayi bwo mu mutwe.

Igiteye inkeke kuri iki kibazo ni uko urubyiruko ruri hagati y’imyaka 14-18 rwagaragaje ko rufite ibibazo byo mu mutwe ku rwego rwa 10%.

Bwagaragaje ko indwara y’agahinda gakabije ikunda kuviramo benshi kwiyambura ubuzima no kwiyanga iri kuri 11,9% mu Banyarwanda bose.

Iyo ndwara igeze mu barokotse Jenoside isya itanzitse kuko imibare yikubye gatatu aho nibura 35% bafite ikibazo cy’agahinda gakabije.

Ihungabana rishingiye ku mateka ryo ryari kuri 3,6% mu Banyarwanda bose aho ryikubye inshuro hafi enye rikagera kuri 27% mu bacitse ku icumu rya Jenoside yakorewe Abatutsi.

Mu rwego rwo kuvura ibikomere no kwita ku bafite ibibazo by’ubuzima bwo mu mutwe,Umuryango Mizero Care Organisation washyizeho uburyo bwo gusangira ibyishimo no kubwirana ibikomere umuntu yagize uvuga ko butanga umusaruro.

Ibi bikorwa biba buri mwaka kandi bifite insaganyamatsiko zitandukanye, uyu mwaka cyahawe insangayamtsiko igira iti “Wiceceka ibibazo by’ubuzima bwo mu mutwe”.

Mu kiganiro cyiswe icyo gusangira ibyishimo cyabaye kuri uyu wa Gatandatu tariki ya 3 Ukuboza 2022,inzobere ku bibazo by’ubuzima bwo mu mutwe, Prof. Dr Eugene Rutembesa, yagaragaje ko hari uburyo bubiri bwo kuvuga iby’ubuzima bwo mu mutwe ugamije gukira cyangwa gukiza ubufite.

Yagarutse ku bikomere abantu basigiwe na Jenoside yakorewe abatutsi mu 1994 n’uburyo byagize ingaruka ku banyarwanda. Ati “Iyo uri muri ibyo bibazo imbere haba hakingirije.”

Yagaragaje ko abantu bishobora mu ngeso zidasanzwe hari ubwo baba bagaragaza ibimenyetso by’ibibazo by’ubuzima bwo mu mutwe kandi baba bakeneye gufashwa.

Ati “Bariya bose mureba banywa ibiyobyabwenge, bakiyahura, ntabwo aba ari bo baba bari kuvuga ko batameze neza kugira ngo ubafashe. Ugomba kuvuga kuko bavuga ko uvuze ataba agipfuye. Twabonye ko umuntu ari abandi bituma habaho amatsinda y’ibiganiro atandukanye.”

Yagaragaje ko icyumweru cy’icyunamo kigira uruhare runini mu guhumuriza Abanyarwanda no kubakura mu bwigunge kuko habaho umwanya wo kuvuga agahinda n’ibikomere abantu bagakomezanya.

Prof Rutembesa Eugene yagaragaje ko kuvuga biri mu bifasha komora ibikomere

Umukozi mu Kigo cy’Igihugu cy’Ubuzima RBC, ushinzwe ibikorwa by’ubuvuzi bwo mu mutwe, Ndabagaruye Chrysostome, yagaraje ko Abanyarwanda batarasobanukirwa neza indwara zo mu mutwe ku buryo bushobora no gutuma batinda kwivuza uburwayi bukaba bwakomera.

Ati “Iyo umuryango ukomeye nk’uyu ugiye mu giturage kubasobanurira byorohera n’inzego za Leta kubafasha no kubaha ubuvuzi hakiri kare. Niyo mpamvu mbashimira cyane kuko batangije iki gikorwa cyo kujya mu baturage.

“Dufite umubare munini w’abantu bafite ibibazo by’ubuzima bwo mu mutwe, dukeneye gukora ku buryo turengera Abanyarwanda hakiri kare cyane ubu butumwa bwo kuvuga ibanga mu gihe ubona mugenzi wawe afite ikibazo ujye utanga amakuru."

Umukozi muri Minisiteri y’Ubumwe bw’Abanyarwanda n’Inshingano Mboneragihugu, Mbabazi Zakhia, yagarutse ku nshingano za Minisiteri zo kubaka ubumwe bw’Abanyarwanda avuga ko zirimo kubungabunga amateka, gushimangira ubumwe bw’Abanyarwanda no guteza imbere uburere mboneragihugu.

Umuyobozi Mukuru wa Mizero Care Organisation, Mizero Irene, yagaragaje ko uri kugenda wunguka ibikorwa byinshi kandi ko igihugu cyazirikanye ibyo bakora bagashyirwa mu barinzi b’igihango n’Umuryango Unity Club Intwararumuri.

Umuyobozi Ushinzwe iterambere ry’Umuco muri Minisiteri y’Umuco n’urubyiruko, Aimable Twahirwa, yashimye umusanzu wa Mizero Care Organisation ashimangira ko kudaceceka ari inzira yo gukira.

Abafashishijwe gukira barashima

Umunyamabanga Nshingwabikorwa wa Mizero Care Organisation, Muhayimana Pelagie, yagaragaje ko bafasha abantu gusohoka mu bwigunge ku bantu batandukanye barimo abagizweho ingaruka na Jenoside yakorewe abatutsi, abana bavutse nyuma yayo, abavutse ku bayigizemo uruhare ndetse n’abana bishoye mu biyobyabwenge.

Ati “Tubaha ibiganiro by’isanamitima, tukabaganiriza ku bijyanye n’ibibazo by’ubuzima bwo mu mutwe tukanabereka ko hari aho bagomba kuva n’aho bagera kuko bakeneye kugira ejo hazaza heza.”

Umwu mu bagenerwabikorwa, Umuziranenge Marie Josée , yemeza ko kuganirizwa byamuhinduye bikamukura mu bwigunge na we akabasha gutinyuka kuvuga ku buryo ibikomere yari afite byashize.

Ati “Nisanze nsigaye ndi umwana urera abavandimwe. Tubaho mu buzima bugoye cyane ariko turashimira FARG yagiye idufasha mu myigire… nubwo inkunga zabaga zihari ntitwabonaga abantu batuganiriza. Twaje guhura n’uyu muryango, batangira baduha ibiganiro bidufasha kutuvura bigendanye n’imyumvire batwigisha no guhanga imirimo.”

Yagaragaje ko uretse kubomora ibikomere bafashwa no mu rugendo rwo kwiteza imbere kandi ko biri gutanga umusaruro mu buzima bwabo bwa buri munsi.

Uretse abagizweho ingaruka na Jenoside yakorewe Abatutsi hari n’abana baba mu buzima bwo mu muhanda bari gufashwa kwisanga mu muryango nyarwanda, aho bubakiwe ubushobozi kuri ubu bakaba baraciye ukubiri n’ibiyobyabwenge.

Mizero Care Organisation yatangiye gutanga ubujyanama mu 2013 aho imaze kugera ku bagenerwabikorwa barenga 500 mu turere dutanu tw’igihugu.

Intego yayo ni ukwagura ibikorwa byayo bikagera hirya no hino mu gihugu kugira ngo hakomeze gutangwa umusanzu wo gufasha Abanyarwanda guhangana n’ibibazo by’ubuzima bwo mu mutwe byibasiye abatari bake.

Twahirwa Aimable yashimiye Mizero kubera ibikorwa bye byo gufasha Abanyarwanda gukira ibikomere
Umunyamabanga MUkuru wa Mizero Organization, Muhayimana Pelagie, asobanura ibikorwa by'uyu muryango
Umuyobozi Mukuru muri Minisiteri y'Urubyiruko n'Umuco, Twahirwa Aimable yasbaye urubyiruko kwirinda ibiyobyabwenge
Mizero yagaragaje ko yashinze uyu muryango agamije guhuza abari mu bwigunge
Umujyanama Mukuru wa Madamu Jeannette Kagame, Jeanne d'Arc Gakuba, yari yitabiriye
Umuyobozi MUkuru w'Umuryango Interpeace, Fred Kayitare ari mu bitabiriye iyi nama
Umukozi muri Minisiteri y’Ubumwe bw’Abanyarwanda n’Inshingano Mboneragihugu, Mbabazi Zakhia asobanura inshingano zayo
Abitabiriye iki gikorwa bagize umwanya wo kwifatanya n'abatagira ababifuriza isabukuru y'amavuko
Ifoto rusange y'abitabiriye iki gikorwa

Amafoto: Mizero Care Organisation


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .