Dr. Sinarinzi Paméla wa Baho Hospital yakomoje ku byo ukwiye kumenya ku nkingo zihabwa abana

Yanditswe na Twarabanye Venuste
Kuya 28 Gicurasi 2020 saa 07:15
Yasuwe :
0 0

Gukingiza umwana akivuka no gukurikiranya inkingo uko byateganyijwe, ni bimwe mu byo abahanga mu kwita ku buzima bw’umwana bashimangira ko byongerera umubiri w’umuntu ubushobozi bwo guhangana n’indwara.

Mu rwego rw’ubuzima, buri gihugu kigira inkingo giha abana bitewe n’ubuzima bw’abagituye, virusi zikibamo, indwara zishobora kwandura zihagaragara n’izindi mpamvu z’ubuzima zitandukanye.

Mu Rwanda buri mwana akingirwa Imbasa, Igituntu, Kokorishi, Agakwega (Tetanosi), Akaniga, Hapatite B, Pinemokoke, impiswi (Rotavirus), Iseru na Rubeyole.

Ni inkingo zitangwa kuva umwana akivuka kugeza ku mezi 15, umubyeyi wese akagirwa inama yo kubahiriza gahunda ya muganga yo kuzikurikiranya.

Mu kiganiro IGIHE yagiranye na muganga w’abana muri Baho International Hospital, Dr. Sinarinzi Paméla, yavuze ko gukingira umwana byongerera umubiri we ubudahangarwa.

Ati “Impamvu dukingira abana ni ukongera ubwo budahangarwa mu mubiri bigatuma ba basirikari baturwanirira bakomera […] Inkingo ziri mu bifasha umwana gukura atarwaragurika.”

Nubwo gukingiza umwana bidasobanuye ko atazarwara, ni byiza gukurikiza gahunda ya muganga yo gukingiza. Dr. Sinarinzi avuga ko hari ababyeyi bibwira ko umwana avukana uburyo kamere bwo kwirwanirira k’umubiri, ntibakingize cyangwa bakajyayo uko bishakiye.

Ibyo ngo bigira ingaruka zikomeye ku mwana, zamuviramo ubumuga, kuzahazwa n’indwara cyangwa gutinda gukira igihe yakomeretse ku mubiri.

Ati “Nk’urugero kudakingira imbasa bishobora gutera ubumuga bw’ingingo. Akaniga n’Agakwega bidakingiwe bishobora gutera ibibazo byo mu buhumekero. Hari na Tetanus idakingiwe, umwana agakomereka cyangwa agashya, ibisebe bye bishobora gitinda gukira kandi bikagira ubwandu (infection) bukomeye kurusha uwakingiwe.”

Kimwe n’indi miti umuntu ashobora kunywa ikamuvura ariko akaba yagira impinduka ku mubiri cyangwa mu mubiri, umwana wakingiwe na we ashobora kugira umuriro, gufuruta, kubyimbirwa aho bateye urukingo cyangwa kugira utubyimba ku mubiri, gucika intege ntabashe konka, rimwe na rimwe hakaba n’abagira ibibazo bikomeye byo kugagara.

Dr. Sinarinzi avuga ko kenshi izo ngaruka z’inkingo zitamara igihe kirekire. Cyakora ngo hari igihe umubyeyi aba akwiye kugana kwa muganga, bitewe n’uko umwana amerewe.

Ati “ Nk’uyu munsi yakingiwe ukabona agize umuriro mwinshi, ejo arawugize no ku munsi wa Gatatu arawugize. Ukabona agize umuriro uri hejuru ya 38.5 kandi bikaguma gutyo buri masaha ane kugeza ku munsi wa gatatu kandi uri no kumuha umuti w’umuriro aho haba harimo n’ikindi kibazo aba akwiye kujya kwa muganga.”

Impamvu zishobora gutuma umwana adahabwa inkingo cyangwa zigahagarikwa

Nubwo amabwiriza ya Minsiteri y’Ubuzima asaba ababyeyi gukingiza kandi bakurikiranya neza inkingo, hari igihe umwana adahabwa urukingo runaka, kurusiba cyangwa rugahagarikwa ariko bitegetswe na muganga.

Dr. Sinarinzi avuga ko ibyo bikunze kuba ku nkingo umwana ahabwa inshuro zirenze imwe. Iyo umwana agize ikibazo gikomeye ku rwa mbere ntabwo aterwa izikurikiraho kuko umubiri we uba wagaragaje ko utakira ibyo rukozemo.

Ati “Iyo habayeho inkurikizi zikomeye ku rukingo runaka, biba bisobanuye ko uwo mwana atazongera guhabwa urwo rukingo n’urukurikira rwa kabiri cyangwa urwa gatatu biba bihagaze kuko aba yagaragaje ibimenyetso ko umubiri we utakira, ibikoze urwo rukingo.”

Uburwayi umwana afite bushobora kuba impamvu yo gusibywa urukingo kubera indi miti ari gufata cyangwa ubushobozi bw’umubiri we. Icyo gihe umubyeyi ashobora gusabwa na muganga gusiba uko kwezi akazasubirayo ku gukurikiyeho.

Hari kandi abana bavukana indwara zikomeye nka kanseri nabo badashobora gukurikiranya inkingo nk’abandi.

Ati “Hari n’abana bari mu rwego rwihariye, bariya bavukana indwara zikomeye nka za Kanseri abo bo ntabwo bashobora gukurikiranya inkingo nk’uko bigenda ku bandi bana bavutse nta kibazo bafite.”

Uretse inkingo, mu gukurikirana ubuzima bw’umwana mu Rwanda, umwana ahabwa Ikinini cya Vitamini A rimwe mu mezi atandatu kuva agize amezi atandatu kugeza ku myaka itanu. Buri mwana wujuje amezi 12 kandi ahabwa ikinini kivura inzoka zo mu nda buri mezi atandatu kugeza yujuje imyaka itanu.

Muganga w’abana muri Baho International Hospital, Dr. Sinarinzi Paméla, yavuze ko gukingira umwana byongerera umubiri we ubudahangarwa
Gukingiza no gukurikiranya inkingo ni ingenzi ku buzima bw'umwana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .