Undi muturage w’i Rwamagana yabaye uwa 42 wishwe na Coronavirus mu Rwanda

Yanditswe na Ishimwe Israel
Kuya 13 Ugushyingo 2020 saa 09:56
Yasuwe :
0 0

Minisiteri y’Ubuzima yatangaje ko undi muturage w’i Rwamagana yishwe na COVID-19, umubare w’abamaze guhitanwa n’iki cyorezo cyugarije Isi ugera kuri 42.

Umurwayi witabye Imana kuri uyu wa Gatanu ni umugabo w’imyaka 72 wo mu Karere ka Rwamagana. Muri aka gace hamaze iminsi haboneka abantu bahitanwa na Coronavirus kuko muri iki cyumweru gusa batanu yarabahitanye.

Minisante yatangaje ko kuri uyu wa 13 Ugushyingo 2020, habonetse abarwayi 43 basanganywe COVID-19 iterwa n’agakoko ka Coronavirus mu bipimo 2759 mu gihe abakize ari 19.

Abarwayi bashya barimo abakuwe muri Kigali:1, Kirehe:1, Muhanga:36 (abapimwe muri Gereza ya Muhanga), Nyamagabe:2, Rubavu:2 na Rwamagana:1

Mu Rwanda hamaze gufatwa ibipimo bya Coronavirus 582 412, hasanzwemo abantu 5362 banduye. Muri bo 4994 basezerewe nyuma yo gupimwa bagasangwa nta bwandu bagifite mu gihe 328 bakiri kwitabwaho.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwirinda imihuro itari ngombwa no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .