Umugore w’imyaka 25 yishwe na COVID-19, haboneka abarwayi bashya 28

Yanditswe na Rabbi Malo Umucunguzi
Kuya 29 Ugushyingo 2020 saa 10:20
Yasuwe :
0 0

Minisiteri y’Ubuzima yatangaje ko umugore w’imyaka 25 yabaye umuntu wa 48 wishwe n’icyorezo cya COVID-19 mu Rwanda, mu gihe habonetse abarwayi 28 bashya mu bipimo 2042 byafashwe.

Imibare mishya y’abanduye yatumye abamaze gusangwamo iki cyorezo mu Rwanda baba 5919. Abarwayi bashya babonetse i Kigali (8), Musanze (8), Rubavu (4), Rusizi (3), Gicumbi (2), Nyagatare: (1), Gatsibo (1) na Burera (1).

Mu itangazo Minisiteri y’Ubuzima yashyize hanze kuri iki Cyumweru, yakomeje iti “Twihanganishije umuryango w’umugore w’imyaka 25 witabye Imana i Kigali.”

Mu bantu bose hamwe bamaze kwandura, abagera ku 5480 bangana na 92.5 ku ijana by’abanduye bose bamaze gukira, ku buryo abakirwaye ari 391.

Guverinoma y’u Rwanda ikomeje kongera imbaraga mu gupima COVID-19, ku buryo hamaze gufatwa ibipimo 624.115. Biteganywa ko mu kwezi gutaha hazatangira no kwifashishwa imbwa mu gupima iki cyorezo.

Tariki 14 Werurwe 2020 nibwo Minisiteri y’Ubuzima yemeje ko Coronavirus yageze mu Rwanda. Yagaragaye ku Muhinde wageze mu gihugu ku wa 8 Werurwe 2020, avuye i Mumbai.

Abaturarwanda basabwa gukomeza kubahiriza amabwiriza yo kwirinda iki cyorezo, hitabwa cyane cyane ku gukaraba intoki kenshi n’amazi meza n’isabune, kwambara udupfukamunwa n’amazuru mu gihe umuntu avuye mu rugo, no gusiga intera hagati y’umuntu n’undi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .