Ubushakashatsi bwagaragaje ko umubyeyi ashobora kwanduza Covid-19 uwo atwite

Yanditswe na Iradukunda Serge
Kuya 10 Nyakanga 2020 saa 11:22
Yasuwe :
0 0

Ubushakashatsi bushya bwakorewe mu Butaliyani bwagaragaje ko umugore utwite ashobora kwanduza icyorezo cya Covid-19 umwana ukiri mu nda.

Kuva Covid-19 yakwaduka mu mpera za 2019, abaganga n’abashakashatsi batangiye kugira impungenge bibaza niba umubyeyi adashobora kuyanduza umwana atwite nk’uko bigenda ku zindi virusi zirimo itera Sida (HIV) na ZIKA, iyo hatafashwe uburyo bw’ubwirinzi.

Muri bimwe mu bihugu byagezemo iki cyorezo hagiye hagaragara abana b’impinja bacyanduye, ariko abaganga bagakomeza gukeka ko banduzwa n’ababyeyi babo nyuma yo kubabyara, nyamara abandi bakagaragaza ko bishoboka cyane ko baba bandura bakiri mu nda.

Ubushakashatsi bushya bwakozwe n’itsinda ry’inzobere zo mu Butaliyani bugashyirwa hanze ku wa 9 Nyakanga, busa n’ubwashyize iherezo kuri uku gushidikanya kuko bwagaragaje ko umwana ashobora kwanduzwa na nyina umutwite.

Ubu bushakashatsi bwakorewe ku bagore 31 barwaye Covid-19, babyaye mu mezi ya Werurwe na Mata.

Izi nzobere zivuga ko amaraso zakuye ku rureri (umbilical cord) rw’aba bagore yerekana ko yararimo utunyangingo duto twa coronavirus ndetse umwe muri bo bakaba baranadusanze mu mashereka.

Uretse ibi, muri aba bagore bakoreweho ubushakashatsi babiri muri bo babasanzemo utu tunyangingo twa Coronavirus mu myanya myibarukiro.

Uwayoboye itsinda ry’impuguke zakoze ubu bushakashatsi akaba n’umwarimu muri kaminuza ya Milan, Dr. Claudio Fenizia, avuga ko hari aho babonye ibimenyetso ntashidikanywaho ko umwana ashobora kuvuka yanduye Covid-19.

Yagize ati “Hari hamwe twabonye ibimenyetso ntashidikanywaho byerekana ko umwana yavutse yanduye Covid-19 kubera ko coronavirus twayisanze ku maraso y’ururiri ndetse no mu ngombyi."

Dr. Ashley Roman na we uri mu itsinda ryakoze ubu bushakashatsi, yavuze ko hari n’aho bagiye basanga uduce duto twa Coronavirus iruhande rw’umwana ukiri mu nda, ariko akongeraho ko abagore baramutse bubahirije amabwiriza asanzwe yo kwirinda covid-19, byabafasha bigafasha n’abo batwite.

Ati: “Ikintu cy’ingenzi abagore batwite bagomba kumenya ni uko ari ingenzi gusiga intera hagati yabo n’abandi bantu, ni ingenzi kwambara agapfukamunwa, no gukaraba intoki, si ngombwa ko abagore batwite baca ukubiri n’abandi, ahubwo bakwiye gutekereza ku ngaruka byazana ku buzima bwabo igihe batwite”

Ubu bushakashatsi buvuga ko bishoboka cyane ko umubyeyi yakwanduza Covid-19 umwana ukiri mu nda ariko bukongeraho ko ibi byago biri hasi cyane ndetse n’ingaruka byagira ku mwana zidakanganye.

Umubyeyi ashobora kwanduza Covi-19 uwo atwite

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .