Ubukana bwa COVID-19: Abantu 100 bapfuye mu mezi abiri; ubwandu bwikuba kabiri

Yanditswe na Ferdinand Maniraguha
Kuya 16 Mutarama 2021 saa 07:48
Yasuwe :
0 0

COVID-19 yaje bamwe bayita ibihuha, abandi bavuga ko ari indwara y’abazungu, ko itinya ubushyuhe n’ibindi! Ubu utarayirwara azi uwayirwaye, uwo yazahaje, uwayirwaje cyangwa se uwo yahitanye.

Kugeza tariki 14 Ugushyingo 2020, nyuma y’amezi umunani COVID-19 igeze mu Rwanda, byari amakuru adasanzwe ku Banyarwanda kumva aho iki cyorezo giterwa na Coronavirus cyahitanye abantu batatu umunsi umwe.

Mbere y’iyo tariki inshuro nke cyane ni bwo mu mibare ya buri munsi ya Minisiteri y’Ubuzima, habonekagamo abahitanywe n’icyo cyorezo barenze babiri. Byabaye ku wa 24 Kanama, ku wa 18 Nzeri 2020 no ku wa 25 Nzeri 2020 byongera tariki 9 Ugushyingo 2020.

Iyo tariki yabaye nk’ihindura ibintu mu bijyanye n’icyorezo cya Coronavirus mu Rwanda, kuko cyakajijje umurego kugeza ubwo mu mezi abiri ashize, u Rwanda rumaze kubura abantu bagera ku 100, ni ukuvuga hafi inshuro eshatu z’abahitanywe nacyo kuva muri Werurwe kugeza mu Ugushyingo 2020.

Abanduye Coronavirus mu mezi abiri ashize, bavuye ku 5100 mu Ugushyingo 2020, bagera ku 10300 muri Mutarama 2021, bivuze ko abo mu mezi abiri ashize baruta gato abanduye mu mezi umunani ya mbere.

Amezi abiri ashize kandi COVID-19 yeretse Abanyarwanda ko ntawe ufite ubudahangarwa ku cyorezo kuko cyaseye kitanzitse kuva ku bakuze hejuru y’imyaka 90 kugera no ku bato bitakekwaga ko cyakambura ubuzima, barimo nk’umwana w’imyaka 13. Byaba ari ukwigiza nkana cyangwa hari ikindi kibazo cy’imyumvire habaye hari abakivuga ko ‘Coronavirus ari ibihuha’.

-  Amezi abiri y’ububabare, ishyano mu minsi 11 ishize

Muri Kanama 2020 nibwo u Rwanda rwabonye bwa mbere ubwiyongere bukabije bw’abantu bandura Coronavirus kuko hari n’igihe bwarenze abantu 200 ku munsi nka tariki 23 [handuye 200], 24 [handuye 217] na 25 [handuye 231].

Icyo gihe ubwandu bwinshi bwari mu masoko ahuriramo abantu benshi mu Mujyi wa Kigali no ku mipaka cyane cyane mu Karere ka Rusizi.

Ntabwo abahitanwaga n’icyorezo muri icyo gihe bari benshi kuko ahanini habonekaga nk’umwe kandi nabyo bikaba mu minsi itandukanye.

Hafashwe ingamba zikomeye zirimo gufunga amasoko, gukaza ingamba z’isuku no gupima mu kivunge abantu mu bice bitandukanye; ni icyemezo wavuga ko cyatanze umusaruro kuko byageze mu mpera za Nzeri 2020, abandura ari bake cyane babarirwa munsi y’icumi.

Byakomeje gutyo mu Ukwakira ndetse Guverinoma yiyemeza gufungura amashuri amwe n’amwe n’ibindi bikorwa. Ugushyingo kwagezemo hagati abandura bakiri bake ariko bigeze tariki 9 ibintu bihindura isura.

Icyorezo cyari cyadukiriye za gereza. Kuri iyo tariki muri Gereza ya Nsinda habonetse abagororwa 13 banduye Coronavirus. Kuva uwo munsi uretse kwiyongera kw’abandura, abapfa nabo bagiye bazamuka aho hafi buri munsi, hasohokaga itangazo rivuga ko umwe cyangwa babiri bishwe na Coronavirus.

Ibintu byabaye bibi cyane tariki 14 Ugushyingo, ubwo umubare w’abanduye watumbagiraga ukagera ku 32 barimo 30 bo muri Gereza ya Muhanga. Ku munsi wakurikiyeho handuye abantu 61, batatu irabahitana.

Kugeza tariki 23 Ugushyingo, muri gereza zo mu Rwanda hari hamaze kuboneka abantu 200 banduye Coronavirus mu gihe 11 bari bamaze gupfa.

Kuko ubwandu bwinshi bwabonekaga muri za gereza cyane, hafashwe ingamba zirimo gushyiraho ahantu hihariye ho kuvurira abagororwa, guhagarika ibikorwa byo gusura n’ibindi.

Byabaye nk’ibituza gato, abandura baba bake ugereranyije n’abakira ndetse n’abapfa ntabwo babaga ari benshi. Byatumye tariki 27 Ugushyingo bimwe mu bikorwa byari byarafunzwe bikomorerwa birimo siporo nk’izo muri gyms n’ibitaramo.

Muri icyo gihe agahenge kari katangiye kugaruka ndetse kugeza tariki 2 Ukuboza 2020, abantu 50 ni bo bari bamaze guhitanwa na Coronavirus mu Rwanda. Abari bamaze kwandura bari 5994 barimo 5575 bakize mu gihe 369 bari bakiri mu bitaro.

Byasubiye irudubi tariki 7 Ukuboza ubwo abantu 62 bashya banduraga Coronavirus, hakabura uyikira. Mu minsi yakurikiyeho byakomeje kwiyongera ku buryo ku munsi handuraga abantu 40 barenga. Byageze tariki 13 Ukuboza hatangira kwandura abagera ku 130.

Bwa mbere mu mateka ya Coronavirus mu Rwanda, tariki 21 Ukuboza 2020 hapfuye abantu bane mu munsi umwe. Byabaye uruhererekane kuva icyo gihe, nta munsi washiraga abantu badapfuye.
Mu minsi ya mbere ya Coronavirus hari ibihuha ko ihitana abageze mu zabukuru n’abafite izindi ndwara zidakira, nyamara tariki 30 Ukuboza, hapfuye abantu barindwi barimo n’umwana w’imyaka 13 wo mu karere ka Nyamasheke. Ku munsi wa nyuma w’umwaka wa 2020, Coronavirus yisasiye barindwi, handura 122.

Umwaka mushya ntiwabaye mushya kuri Coronavirus mu Rwanda. Hari hashize iminsi hafashwe ingamba zikomeye zirimo guhagarika ingendo ziva n’izinjira muri Musanze ndetse n’amasaha yo gutaha yashyizwe saa Mbili z’ijoro avanywe saa Yine ariko imibare y’abandura n’abapfa yo ntiyahagaze.

Tariki 4 Mutarama, Inama y’Abaminisitiri yanzuye ko ingendo zihuza Umujyi wa Kigali n’uturere zihagarikwa mu rwego rwo kwirinda ikwirakwira rya Coronavirus. Ibikorwa by’abikorera birimo iby’ubucuruzi, restaurants, butiki, amasoko n’amaduka byategetswe gufunga saa Kumi n’ebyiri za nimugoroba.

Nyamara nubwo hafashwe ingamba zikomeye, guhera uwo munsi kugeza tariki 15 Mutarama 2021, ni ukuvuga mu minsi 11 gusa mu Rwanda hamaze gupfa abantu 36, mu gihe 1897 bashya bayanduye muri iyo minsi.

Kugeza kuri uyu wa Gatanu tariki ya 15 Mutarama 2021 hari hamaze kwandura abantu 10 573 mu bipimo 785 049 byafashwe. Abamaze gusezererwa ni 7028, abakirwaye 3407 mu gihe abapfuye ari 138.

Ikigo gishinzwe Ubuzima (RBC) giherutse gutangaza ko abarwayi bagera ku 2800 bari kuvurirwa mu rugo, icyakora cyagaragaje impungenge z’abarenga ku mabwiriza kandi barwaye, nubwo havuzwe ko atari benshi.

Amaso ahanzwe ku wa Mbere tariki 18 cyangwa ku wa Kabiri tariki 19 Mutarama, ubwo Inama y’Abaminisitiri izaba iterana ivugurura ingamba zafashwe tariki 4 Mutarama zo gukomeza kwirinda ikwirakwira rya Coronavirus

Uko imibare y'abandura, abahitanwa n'abakize Coronavirus yari ihagaze mu mezi abiri ashize
Ishusho y'amatariki y'ingenzi ku cyorezo cya Coronavirus guhera mu Ugushyingo 2020
Umubare w'abicwa na Coronavirus ndetse n'abayandura wagiye wiyongera mu mezi abiri ashize
Uko abantu bagiye bandura Coronavirus hakurikijwe icyiciro cy'imyaka yabo (RBC)

Ibishushanyo bya IGIHE byakozwe na Aimé Steven Niyigena


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .