00:00:00 IGIHE NETWORK KN KINYARWANDA EN ENGLISH FR FRANCAIS

Ntitudohoke twirinde ko haba indi nkundura y’iki cyorezo - Dr Nsanzimana

Yanditswe na Akayezu Jean de Dieu
Kuya 30 Werurwe 2021 saa 01:25
Yasuwe :
0 0

Umuyobozi Mukuru w’Ikigo cy’Igihugu cy’Ubuzima, RBC, Dr Nsanzimana Sabin yagaragaje ko ubwiyongere bukabije bw’ubwandu bwa Coronavirus mu Ntara y’Amajyepfo bushobora gutuma habaho inkundura ya gatatu y’icyorezo cya Covid-19.

Ni ubutumwa yatanze nyuma y’uko itangazo ryo mu Biro bya Minisitiri w’Intebe rishyiraho ingamba n’amabwiriza mashya yo kwirinda ikwirakwira rya Covid-19, rishyize umwihariko ku Turere tw’Amajyepfo aho ingendo zibujijwe guhera saa moya z’ijoro kugera saa kumi z’igitondo.

Ni mu gihe mu bindi bice by’igihugu, ho ingendo zibujijwe guhera saa tatu z’ijoro kugera saa kumi z’igitondo naho ibikorwa by’ubucuruzi byo bigomba gufunga saa mbili kugira ngo abantu bagere mu ngo nta muvundo mu nzira.

Dr Nsanzimana yagaragaje ko imibare y’abandura Coronavirus mu Ntara y’Amajyepfo iteye inkeke ku buryo habayeho gukomeza kudohoka igihugu cyajya mu nkundura ya gatatu ya Covid-19.

Mu butumwa yanyujije kuri Twitter yagize ati “Imibare mishya ya RBC, igaragaza ko Covid-19 iri kugabanuka mu Mujyi wa Kigali ariko iriyongera mu Majyepfo. Ntitudohoke twirinde ko haba indi nkundura y’iki cyorezo.”

Imibare igaragaza ko kuva tariki 1 kugeza kuri 26 Werurwe 2021, Intara y’Amajyepfo yari iri imbere mu bwandu bushya bwa Coronavirus kuko nibura muri icyo gihe uturere twayo tune dufite ubwandu buri hejuru y’abantu 140.

Muri iyo minsi Akarere ka Gisagara kari imbere n’umubare munini w’abandura aho gafite abanduye 231, Nyanza ni 208, Nyamagabe 180 naho Huye ni 149.

Muri iyi ntara kandi Akarere ka Nyaruguru nako kari mu dufite ubwandu bwinshi mu minsi ishize aho hagati ya tariki 1-26 Werurwe kari gafite abanduye bashya 123.

RBC igaragaza kandi ko mu ibarura yakoze kuva mu Ukwakira 2020 kugeza muri Werurwe 2021, ubwiyongere bw’abandura muri Kigali bwagiye bugabanyuka.

Ijanisha ry’abandura mu Ukwakira 2020 ryari kuri 0.1% , Ugushyingo 0%, Ukuboza 1.9%, Mutarama 2021 ijanisha ryari kuri 2.7% naho mu mpera za Mutarama rigera kuri 5.3%, muri Gashyantare ryageze kuri 2.2% naho muri Werurwe 2021, ijanisha ryaramanutse rigera kuri 0.5%.

Amajyepfo yakajije ingamba

Uturere twa Nyanza, Gisagara na Bugesera twari tumaze ibyumweru bibiri, dushyiriweho ingamba zihariye aho ingendo ziduhuza n’ibindi bice by’igihugu zari zibujijwe [Guma mu Karere], kaza gukomorerwa ariko by’umwihariko uturere two mu Majyepfo dushyirirwaho isaha yo gutaha itandukanye n’ahandi mu gihugu.

Imibare itangazwa n’ubuyobozi bw’Akarere ka Nyanza igaragaza ko nibura abantu 114 aribo barwariye Coronavirus mu ngo zabo bakaba bari kwitabwaho.

Mu kiganiro na IGIHE, Umuyobozi w’Akarere ka Nyanza, Ntazinda Erasme, yavuze ko abaturage bari bamaze kumva neza uburyo bwo kwitwara muri iki gihe ndetse ngo n’imibare y’ubwandu yari yatangiye kugenda igabanyuka.

Ati “Abaturage bumvise ubukana bw’ikibazo […] imibare yaragabanyutse ubu dufite abantu 114 barwariye mu ngo kandi bamenye uburyo bwo kwitwara, ndetse n’ababakurikirana nabo barabikora neza uyu munsi.”

Meya Ntazinda yavuze ko hari imirenge yari imaze iminsi yugarijwe kurusha indi cyane irimo iya Busesamana, Cyabakamyi, Kibirizi na Ntyazo ndetse ngo mu gukora ubukangurambaga ibyo bice byahawe umwihariko.

Yakomeje agira ati “Ubukangurambaga tubukora mu buryo ari ugukoresha indangururamajwi zigendanwa, abahwituzi ariko noneho na ba Mutwarasibo n’Abayobozi ku rwego rw’umudugudu dufatanya mu guhwitura abantu tubibutsa uburyo bwo kwitwara. Ni ubukangurambaga navuga ko bwagutse.”

Kuva ku wa 14 Werurwe 2020 ubwo umuntu wa mbere yagaragaraga mu gihugu yanduye Covid-19 kugera ku wa 30 Werurwe 2021, hamaze gufatwa ibipimo 1.130.945 aho hagaragayemo banduye 21.490.

Imibare ya Minisiteri y’Ubuzima igaragaza ko abantu 19.860 bamaze gukira iki iki cyorezo naho abakirwaye bakaba 1.325 mu gihe barindwi barembye. Abamaze kwitaba Imana ni 305.

Minisante itangaza ko muri gahunda yo gukingira abanyarwanda haherewe ku byiciro by’abafite ibyago byo kwandura kurusha abandi, abagera ku 348.926 bamaze gukingirwa iki cyorezo.

Abanyarwanda bagirwa inama yo gukomeza kubahiriza amabwiriza yashyizweho, bibuka kwambara agapfukamunwa buri gihe bavuye mu ngo, bakaraba intoki kenshi, birinda amakoraniro n’ibindi byose bishobora guhuriza hamwe abantu benshi.

Umuyobozi Mukuru w’Ikigo cy’Igihugu cy’Ubuzima, RBC, Dr Nsanzimana Sabin, yagaragaje ko ubwiyongere bukabije bw’ubwandu bwa Coronavirus mu Ntara y’Amajyepfo bushobora gutuma habaho inkundura ya gatatu y’icyorezo cya Covid-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .